އިހަވަންދޫގެ ތަރައްގީ ހުއްޓި، ކުނީގެ މައްސަލަ އިންތިހާއަށް ބޮޑުވެ ރައްޔިތުން ތިބީ ވަރަށް ބޮޑު ކަންބޮޑުވުމެއްގެ ތެރޭގައި!
18 އެޕްރީލު 2026 | ހޮނިހިރު 09:28ހއ. އިހަވަންދޫގެ ތަރައްގީގެ މަޝްރޫއުތައް ހުއްޓި، ކުނި މެނޭޖްނުކުރެވޭ މައްސަލަ އިންތިހާއަށް ބޮޑުވެފައިވާތީ އެރަށުގެ އިންތިޚާބީ ރައީސް އަލީ ފަވާޒު ވަނީ ކަންބޮޑުވުން ފާޅުކުރައްވާފައި. ރައީސް މުއިއްޒު އެރަށަށް ވެވަޑައިގެންނެވި ހޮސްޕިޓަލާއި، ހައުސިން ޔުނިޓް އަދި ފިޝަރީޒް ކޮމްޕްލެކްސް ފަދަ މުހިންމު ވައުދުތަކުގެ އަމަލީ މަސައްކަތް ނުފެށި ލަސްވަމުންދާކަން އޭނާ ފާހަގަކުރެއްވި. އެހެންކަމުން، ރަށުގެ ތަރައްގީއަށްޓަކައި ސަރުކާރުގެ އެހީތެރިކަމާއެކު މި މައްސަލަތަކަށް އަވަސް ހައްލެއް ބޭނުންވާކަމަށް ފަވާޒު ވިދާޅުވި.
ފަށާއިރު ޕްރޮގްރާމްގައި އިހަވަންދޫ ކައުންސިލްގެ އިންތިޚާބީ ރައީސް އަލީ ފަވާޒު ވާހަކަ ދައްކަވަނީ. | ރާއްޖެއެމްވީ
ހއ.އިހަވަންދޫގެ ތަރައްގީ ހުއްޓި، ކުނީގެ މައްސަލަ އިންތިހާއަށް ބޮޑުވެފައިވާ ކަމަށާއި، ރައްޔިތުން ތިބީ ވަރަށް ބޮޑު ކަންބޮޑުވުމެއްގެ ތެރޭގައި ކަމަށް އިހަވަންދޫ ކައުންސިލްގެ އިންތިޚާބީ ރައީސް އަލީ ފަވާޒު ވިދާޅުވެއްޖެ އެވެ.
ހޮނިހިރު ދުވަހު ކުރިއަށް ގެންދިޔަ ރާއްޖެޓީވީގެ ފަށާއިރު ޕްރޮގްރާމްގައި ފަވާޒު ވިދާޅުވީ، ރަށުގެ ތަރައްގީ އެކުއެކީގައިހެން ހުއްޓިފައިވާ ކަމަށާއި، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ފަށާފައިވާ ޒަމާނީ ފެންވަރަށް މަގުތައް ތަރައްގީ ކުރުމުގެ މަޝްރޫއު ވަރަށް ސްޕީޑް ލަސްކޮށް ކުރިއަށްދާ ކަމަށެވެ. ހުރަވީ ދަނޑުގައި ލައިޓް ޖެހުމުގެ މަސައްކަތް ވެސް ކުރިއަށް ދާ ކަމަށް އޭނާ ވިދާޅުވި އެވެ. އެހެން އެއްވެސް މަޝްރޫއެއްގެ އަމަލީ މަސައްކަތް ކުރިއަށް ނުދާތީ އެކަމުގެ ކަންބޮޑުވުން ވެސް ވަނީ ފާޅުކޮށްފަ އެވެ.
އެރަށަށް ދިމާވެފައިވާ އެންމެ ބޮޑު ޒަމާންވީ މައްސަލައަށް އިޝާރާތް ކުރައްވައި ފަވާޒު ވިދާޅުވީ އެރަށުގައި ކުނި މެނޭޖްނުކުރެވި، ބޮޑު ކުނި ފުންޏެއް ހެދިފައިވާ ކަމަށާއި، މިއީ އެރަށުގެ ރައްޔިތުންގެ ވަރަށް ބޮޑު ކަންބޮޑުވުމެއް ކަމަށެވެ. އަދި މިހާރު މިއޮތް ކައުންސިލަށް މިމައްސަލަ ހައްލު ނުކުރެވޭނެ ކަމަށް އޭނާ ވިދާޅުވި އެވެ.
އަމާޒަކީ މިފެށޭ ކައުންސިލްގައި ކުނި މެނޭޖް ކުރުމުގެ ކަންކަން އިރާދަކުރެއްވިއްޔާ ކުރިއަށް ގެންދާނަން އަޅުގަނޑުމެން. އެހެންނަމަވެސް މި ކަމަކީ ސަރުކާރުގެ ވަރަށް ބޮޑެތި އެހީތެރިކަން ބޭނުންވާނެ ކަމެއް. މިރަށުގައި މިހާރު ވެސް ވެމްކޯ އެބައޮތް ގާއިމް ކުރެވިފައި. މުވައްޒަފުންވެސް އެބަތިބި. އެކަމަކު ކުނި މެނޭޖް ކުރުމަށާއި، ކުނީގެ މައްސަލަ ހައްލު ކުރުމަށް މިހާތަނަށް އެއްވެސް މަސައްކަތެއް ކުރެވިފައިނުވޭ.ހއ. އިހަވަންދޫ ކައުންސިލްގެ އިންތިޚާބީ ރައީސް އަލީ ފަވާޒު
އިހަވަންދޫ ތަރައްގީއަށް ރައީސް ޑރ.މުހައްމަދު މުއިއްޒު ގިނަ ވައުދުތަކެއް ވެވަޑައިގެންނެވިކަން ފާހަގަކުރައްވައި ފަވާޒު ވިދާޅުވީ، ހޮސްޕިޓަލް ގާއިމް ކުރުމާއި، ސްކޫލުގެ އައު އިމާރާތާއި، 200 ހައުސިންގ ޔުނިޓް ގާއިމް ކުރުމާއި، ދިގުފަރު ހިއްކައި، އިހަވަންދޫ ކޯޒްވޭ އަކުން ގުޅުވާލައި އެރަށުގައި އިންޑަސްޓްރިއަލް މަސައްކަތް ކުރެވޭނެ މަގުފަހިކޮށްދީ، ފިޝަރީޒް ކޮމްޕްލެކްސް ގާއިމްކުރުމާއި، މިމަޝްރޫއާއެކު 1000 ޓަނުގެ ކޯލްޑްސްޓޯރޭޖް ކެޕޭސިޓީ، އަދި 50 ޓަނުގެ ބްރައިން ފްރީޒިންގ ކެޕޭސިޓީ ގާއިމްކޮށް، މަސްކިރުން ފަސޭހަކުރުމަށްޓަކައި ތިން ޕޮއިންޓަކުން މަސްކިރޭގޮތަށް ޖެޓީއަކާއި ބަނދަރެއްވެސް މި ކޮމްޕްލެކްސްގައި ގާއިމް ކޮށްދިނުން ހިމެނޭ ކަމަށެވެ.
ނަމަވެސް މިއިން އެއްވެސް މަޝްރޫއެއްގެ މަސައްކަތް ކުރިއަށް ނުދާ ކަމަށް އޭނާ ވިދާޅުވި އެވެ.
މީގެ އިތުރުން ފަވާޒު ވިދާޅުވީ ކުރީ ސަރުކާރުގައި އެރަށަށް ދިމާވެފައިވާ އެންމެ ބޮޑު މައްސަލަ ކަމަށްވާ ބިމުގެ ދަތިކަން ހައްލު ކޮށްދިނުމަށްޓަކައި 25 ހެކްޓަރުގެ ބިން އިތުރު ކޮށްދިން ކަމަށެވެ. އަދި އިންޖީނުގޭގެ އައު އޮފީސް އިމާރާތް ގާއިމް ކުރުމާއި، ކަރަންޓާއި ފެނުގެ ކެޕޭސިޓީ އިތުރު ކުރުމާއި، ފުޓްބޯޅަ ދަނޑެއް ގާއިމް ކޮށްދިނުމުގެ އިތުރުން ތަރައްގީގެ ގިނަ މަޝްރޫއުތައް ކުރިއަށް ގެންދިޔަ ކަމަށް އޭނާ ވިދާޅުވި އެވެ.
