ވެމްކޯ މުވައްޒަފުންނަށް ގަވާއިދުން މުސާރަ ނުދޭތާ 10 މަސް!
4 އޮކްޓޯބަރު 2026 | އާދީއްތަ 08:14ވެމްކޯގެ ބައެއް މުވައްޒަފުންނަށް މުސާރަ ދިނުން ލަސްވެ، ޕެންޝަން ފައިސާ ޖަމާނުކުރާ މައްސަލަ ބޮޑުވެފައިވާއިރު، މިކަމާ ގުޅޭގޮތުން ޝަކުވާ ކުރާ މުވައްޒަފުންނަށް ކުންފުނިން ބިރުދައްކާ ކަމުގެ ތުހުމަތު ވަނީ ފެންމަތިވެފައި. ސިޔާސީ މަގާމުތަކަށް މީހުން އިތުރުކުރުމުގެ ސަބަބުން ކުންފުނި ބަގުރޫޓުވެދާނެ ކަމުގެ ބިރު އޮތްއިރު، އާންމު މުވައްޒަފުންނަށް މުސާރަ ނުލިބި ލަސްވި ނަމަވެސް ސިޔާސީ މުވައްޒަފުންނަށް ގަވާއިދުން މުސާރަ ލިބޭ ކަމަށް މައުލޫމާތު ލިބޭ
ރައީސް މުއިއްޒު އާއި ވެމްކޯގެ އެމްޑީ މުޖުތަބާ: މިދިޔަ 10 މަސް ދުވަހު އެ ކުންފުނީގެ މުވައްޒަފުންގެ މުސާރައިގެ މައްސަލަ ދިމާވިކަމަށް ރިޕޯޓްކޮށްފައިވޭ | ވެމްކޯ
ވޭސްޓް މެނޭޖްމެންޓް ކޯޕަރޭޝަން (ވެމްކޯ) ގެ ބައެއް މުވައްޒަފުންނަށް ނިމުނު ސެޕްޓެމްބަރު މަހުގެ މުސާރަ ނުލިބޭ ކަމަށް އެ ކުންފުނީގައި މަސައްކަތް ކުރާ ބައެއް ފަރާތްތަކުން ބުނެފި އެވެ.
މިދިޔަ 10 މަސް ދުވަހު އެ ކުންފުނީގެ މުވައްޒަފުންގެ މުސާރައިގެ މައްސަލަ ދިމާވިކަމަށް ރިޕޯޓު ކުރެވުނުއިރު، މިހާތަނަށް ވެސް އެ ކުންފުނީގެ ބަހެއް ލިބޭގޮތް ވަނީ ނުވެފަ އެވެ. މިދިޔަ ޑިސެމްބަރުން ފެށިގެން އެ ކުންފުނީގެ ބައެއް މުވައްޒަފުންނަށް މުސާރަ ދިނުމުގައި ލަސްތަކެއް ކުރިމަތިވެފައިވާއިރު، ޑިސެމްބަރުން ފެށިގެން ކޮންމެ މަހަކު ބައެއް މުވައްޒަފުންނަށް މި މައްސަލަ ދަނީ ކުރިމަތިވަމުންނެވެ.
މިކަމާއި ގުޅިގެން ވެމްކޯގެ ކަމާއި ގުޅުން ހުރި ފަރާތަކުގެ ބަހެއް ލިބިފައިނުވާތީ މުސާރަ ލަސްވާ ސަބަބާއި، މުސާރަ ނުލިބެނީ ކިތަށް މުވައްޒަފުންނަށްކަން ސާފެއް ނުވެ އެވެ. މީގެ ކުރިން ވެސް ދިމާވި މުސާރައިގެ މައްސަލައިގައި ވެމްކޯއިން ޖަވާބު ދީފައި ނުވެ އެވެ.
ރާއްޖެޓީވީއާ ވާހަކަދެއްކި ވެމްކޯގެ ބައެއް މުވައްޒަފުން ބުނީ، މަސައްކަތްތެރިންގެ ހައްގުތަކަށް މި ސަރުކާރުން ވަރަށް ބޮޑަށް އިހުމާލުވެފައިވާ ކަމަށެވެ. އެގޮތުން ވެމްކޯގައި މަސައްކަތް ކުރާ ބައެއް ދިވެހި މުވައްޒަފުންނަށް މަހުގެ މެދަށްދާއިރު ވެސް މުސާރަ ނުލިބޭއިރު، މަހުގެ ފަހު 10 އަކަށްދާއިރު ބިދޭސީ މުވައްޒަފުންނަށް މުސާރަ ނުލިބޭ ކަމުގެ މައުލޫމާތު ލިބިފައިވާ ކަމަށެވެ.
މުސާރައިގެ އިތުރުން ވެމްކޯގެ މުވައްޒަފުންގެ ޕެންޝަން ފައިސާ ޖަމާނުކުރާ މައްސަލަ ވެސް ބޮޑުވެފައިވެ އެވެ. އެގޮތުން ޕެންޝަނަށް ކަނޑާ އަދަދު މުވައްޒަފުންގެ މުސާރަ އިން އުނި ކުރި ނަމަވެސް، އެ އަދަދު މުވައްޒަފުންގެ ޕެންޝަނަށް ޖަމާ ނުވާ މައްސަލަ ވަނީ ފެންމަތިވެފަ އެވެ. އަދި މިދިޔަ ރަމަޟާން މަހުގެ އިނާޔަތް ވެސް ވެމްކޯ މުވައްޒަފުންނަށް ދީފައިވަނީ ވެސް ޚަބަރުތަކުގައި ޖަހައި، އެތައް ބައެއްގެ ފާޑުކިޔުން އަމާޒުވުމުންނެވެ.
ވެމްކޯގެ އިދާރީ ހިންގުމުގެ ގިނަ މައްސަލަތަކެއް ހާމަވަމުންދާއިރު، ނަން ނުޖެހުމަށް ޝަރުތުކޮށް ވެމްކޯގައި މަސައްކަތް ކުރާ ސީނިއަރ ބޭފުޅަކު ވިދާޅުވީ، މުސާރަ ނުލިބޭ ވާހަކަ ނުދެއްކުމަށް އަންގައި ބައެއް މުވައްޒަފުންނަށް އެ ކުންފުނިން ބިރު ދައްކަމުންދާ ކަމަށެވެ.
ކުންފުނިތަކުން ވެމްކޯއަށް ދައްކަން ޖެހޭ ފައިސާ ނުދައްކާ ކަމަށް މެނޭޖްމަންޓުން ކުރާ ތުހުމަތުތަކަށް އިޝާރާތް ކުރައްވައި އޭނާ ވިދާޅުވީ ކޮންމެ ދުވަހަކު ވެސް އެ ކުންފުންޏަށް ނަގުދު ފައިސާ ވަރަށް ގިނައިން ވަންނަ ކަމަށާއި، ކުންފުނިތަކުން ވެސް ބިލްތަކަށް ފައިސާ ދައްކާ ކަަމަށެވެ. އަދި ބައެއް ކުންފުނިތަކުން ފައިސާ ދެއްކުމަށް ބައެއް ފަހަރު ލަސްތަކެއް ކުރިމަތިވި ނަމަވެސް ބިލަށް ފައިސާ ދޭ ކަމަށް އޭނާ ވިދާޅުވި އެވެ.
އޭނާ ވިދާޅުވީ މިއީ ދައްކާ އުޒުރެއް ކަމަށާއި، އެއީ އަސްލު މައްސަލަ ނޫން ކަމަށެވެ. މިހާރު ވެސް ކުންފުންޏަށް ގެއްލުންވާ ގޮތަށް ސިޔާސީ ގޮތުން އެތައް ބަޔަކަށް ވަޒީފާ ދީފައިވާ ކަމަށާއި، އެމީހުންނަކީ ފިންގަރ ޖެހުމަށްފަހު ގެއަށްދާ މީހުން ކަމަށް އޭނާ ވިދާޅުވި އެވެ. އަދި ވިދާޅުވީ ބައެއް މީހުން އޮފީސްތެރޭގައި ތާސް ކުޅުމާއި އެކި ކަހަލަ ކުޅިވަރު ކުޅުމުގައި ވަގުތު ހޭދަކުރާ ކަަމަށެވެ.
ނަމަވެސް އެމީހުންގެ މުސާރަ ކުންފުނީގައި މަސައްކަތް ކުރާ މުވައްޒަފުންނަށް ވުރެ އެތައް ގުނައެއް ބޮޑު ކަމަށާއި، މުސަރާގެ މައްސަލައެއް ސިޔާސީ މުވައްޒަފުންނަށް ކުރިމަތިނުވާ ކަމަށެވެ. މަސް ފެށުމުގެ ކުރިން އެމީހުންނަށް މުސާރަ ވެސް ލިބޭ ކަމަށާއި، ރޯދަ އިނާއަތް ވެސް އަވަހަށް ލިބުނު ކަމަށް އޭނާ ވިދާޅުވި އެވެ.
ވެމްކޯގެ ހާލަތު ވަރަށް ގޯސްކަން ފާހަގަކުރައްވައި އޭނާ ވިދާޅުވީ މިގޮތަށް މިކަން ހިނގާނަމަ މާގިނަ ދުވަހެއް ނުވެ، ޚިދުމަތްތަކަށް ބުރޫއަރައި، ކުންފުނި އެއްކޮށް ބަގުރޫޓުވެދާނެ ކަމަށެވެ. އަދިި މިހާރު ވެސް ވެމްކޯ ހިންގަމުންދަނީ ގެއްލުމުގައި ކަމަށް އޭނާ ވިދާޅުވި އެވެ.
