ގައު ކުނޑި އުކާލުމުގައި ދަތިތަކެއް ދިމާވެ، އާންމުންގެ ކަންބޮޑުވުން
21 ސެޕްޓެމްބަރު 2026 | ހޯމަ 05:11އެ ކުންފުނީގައި ވެހިކަލްގެ ކެޕޭސިޓީ ހުރި މިންވަރަށް ބަލައި، ކޮންމެ ދުވަހަކު ވެސް އެ ޚިދުމަތް ދެމުންް އަންނަނީ ލިމިޓުކޮށްގެން ކަމަށް ވެމްކޯ އިން ބުނެފައިވޭ
ވެމްކޯގެ ކުނި އުކާ އުޅަނދެއް | ސޯޝަލް މީޑިއާ
ގައު ކުނޑި އުކާލުމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އެތައް ދަތިތަކެއް ދިމާާވެ، އާންމު ރައްޔިތުން ކަންބޮޑުވުން ފާޅުކޮށްފި އެވެ.
ރާއްޖެ އެމްވީ އަށް މައުލޫމާތު ދެމުން ބައެއް ފަރާތްތަކުން ބުނެފައި ވަނީ، ގައު ކުނޑި އުކާލުމުގައި މިހާރު އިންތިހާ އަށް ދަތިވެފައިވާ ކަމަށާއި، ހަފުތާ ވެގެންދާއިރު ވެސް ގައު ކުނޑި އުކައިނުލެވޭ ކަމަށެވެ. އަދި ކޮންމެ ދުވަހެއްގެ ހެނދުނު 08:30 ގައި ވެމްކޯ އަށް ގުޅައިގެން ވެސް އެކަން ކުރެވޭ ގޮތް ނުވާ ކަމަށް ބުނެފައިވެ އެވެ.
އެކަމާ ގުޅޭ ގޮތުން މައުލޫމާތު ސާފު ކުރުމަށް ރާއްޖެ ޓީވީގެ ފަށާއިރު ޕްރޮގްރާމް އިން ގުޅުމުން ވެމްކޯ އިން ބުނީ، ގައު ކުނޑި އުކާލުމުގެ ޚިދުމަތް ދެމުން އަންނަ ކަމަށެވެ. އެހެން ނަމަވެސް، އެ ކުންފުނީގައި ވެހިކަލްގެ ކެޕޭސިޓީ ހުރި މިންވަރަށް ބަލައި، ކޮންމެ ދުވަހަކު ވެސް އެ ޚިދުމަތް ދެމުންް އަންނަނީ ލިމިޓުކޮށްގެން ކަމަށެވެ.
ވެމްކޯ އިން ބުނީ ލިމިޓުކޮށްގެން ކޮންމެ ދުވަހަކު އެ ޚިދުމަތް ދެމުން ގެންދިޔަ ނަމަވެސް، ދުވާލެއްގެ މައްޗަށް ގައު ކުނޑި އުކާާލެވޭ ލިމިޓު ބުނެދެވެން ނެތް ކަމަށެވެ.
މީގެ އިތުރުން ވެމްކޯގެ އެޕްލިކޭޝަން އިން ވަކި ވެހިކަލެއް އިހުތިޔާރު ކުރެވެން ނެތް ކަމަށް ބުނާ މައްސަލައިގައި ސުވާލު ކުރުމުން ވެމްކޯ އިން ބުނީ ވެހިކަލް އިހުތިޔާރު ކުރެވޭނެ ކަމަށެވެ. އެހެން ނަމަވެސް، އެކަން ނުކުރެވޭ ކަމަށް ފާހަގަކޮށް، އެޕްލިކޭޝަން އިން އެކަން ނުކުރެވޭ ކަމަށް ދެންނެވުމުން ވެމްކޯ އިން ބުނީ، ޚިދުމަތް ހޯދުމުގެ ވަގުތު ރީސެޓް ވާނީ ކޮންމެ ރެޔެއްގެ ވެސް ދަންވަރު 12 ޖަހާއިރު ކަމަށެވެ. އަދި ވެހިކަލް އިހުތިޔާރު ކުރެވެންް ނެތީ، އެއީ އެ ދުވަހަކަށް ޚިދުމަތް ދެވޭ މިންވަރު ހަމަވުމުން ކަމަށް އެ ކުންފުނިން ބުނެފައިވެ އެވެ.
ވެމްކޯ އިން ދެމުން އަންނަ ބައެއް ޚިދުމަތްތައް ހޯދުމުގައި އިންތިހާ އަށް ދަތިވެފައިވާތީ، އާންމު ރައްޔިތުން އަންނަނީ ކަންބޮޑުވުން ފާޅުކުރަމުންނެވެ.
