ހުޅުމާލެ ފަޅުތެރެ ކުނިން ތަޣައްޔަރުވާ މައްސަލަ: ވެމްކޯގެ އެމްޑީ އިނގިލި ދިއްކުރެއްވީ ހުޅުމާލޭ ފަޅުގައި އަޅާފައި އޮންނަ ސަފާރީތަކަށް
4 އޯގަސްޓު 2026 | އަންގާރަ 10:11ހުޅުމާލޭ ފަޅުތެރެއަށް ކުނި އެޅި ތަޣައްޔަރުވާ މައްސަލައިގައި ރައްޔިތުންގެ މަޖިލީހުގެ މެންބަރަކު ކުރެއްވި ސުވާލުތަކަށް ރައްދުދެއްވަމުން، އެއީ ވެމްކޯގެ އިހުމާލެއް ނޫން ކަމަށާއި އެކަމުގެ ތުހުމަތު ބޮޑީ ފަޅުގައި އަޅާފައިވާ ސަފާރީތަކަށް ކަމަށް އެ ކޯޕަރޭޝަންގެ އެމްޑީ ވިދާޅުވެއްޖެ. ފަޅުތެރެ ސާފުކުރުމަކީ ވެމްކޯގެ ޒިންމާއަކަށް ނުވި ނަމަވެސް، އެޗްޑީސީއާ ގުޅިގެން ހަފްތާއަކު ތިން ދުވަހު ފަޅުތެރެ ސާފުކުރުމުގެ މަސައްކަތް ކުރަމުންދާކަން އޭނާ ފާހަގަކުރެއްވި
ހުޅުމާލެ ފަޅުތެރެއަށް އެޅިފައިވާ ކުނި: އެއީ ވެމްކޯގެ އިހުމާލެއް ނޫން ކަމަށާއި އެކަމުގައި ސަފާރީތަކުގެ ޒިންމާ ބޮޑުކަމަށް އެ ކުންފުނީގެ އެމްޑީ ވިދާޅުވި | ޓްވިޓަރ
ހުޅުމާލެ އިން ކުނި އުކާލުމަށް ކުރެވޭ މަސައްކަތުގައި ހުޅުމާލޭ ފަޅުތެރެއަށް ކުނި އެޅި، ފަޅު ތަޣައްޔަރުވަމުންދާ މައްސަލައިގައި، ފަޅުގައި އަޅާފައިވާ ސަފާރީތަކުން އުކާލާ ކުނި ދަނީ ކޮންތާކަށް ތޯ ބަލަން ޖެހޭ ކަމަށް ވިދާޅުވެ، ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) ގެ މެނޭޖިންގ ޑިރެކްޓަރު މުޖުތަބާ ޖަލީލު ސަފާރީތަކަށް ތުހުމަތުގެ އިނގިލި ދިއްކުރައްވައިފި އެވެ.
ހުޅުމާލެ އިން ކުނި އުކާލުމަށް ކުރެވޭ މަސައްކަތުގައި ހުޅުމާލޭ ފަޅުތެރެއަށް ކުނި އެޅި، ފަޅު ތަޣައްޔަރުވަމުންދާ މައްސަލައިގައި ވެމްކޯގެ މެނޭޖިންގ ޑިރެކްޓަރު މުޖުތަބާއާ ސުވާލުތަކެއް ކުރުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ވަނީ ހުށަހަޅުއްވާފަ އެވެ.
މެންބަރުގެ މި ސުވާލުތައް ހުށަހަޅުއްވާ، ވެމްކޯގެ އެމްޑީ އަށް ސިޓީ އެއް ވަނީ ފޮނުއްވާފަ އެވެ.
އެ ސިޓީގައި މެންބަރު ވިދާޅުވީ ހުޅުމާލެ އިން ކުނި އުކާލުމުގެ މަސައްކަތް ކުރިއަށްދާއިރު އޭގެ ތެރެއިން ބައެއް ކުނި ފަޅުތެރެ އަށް އެޅި ތިމާވެށި ތަޣައްޔަރުވަމުންދާ ކަމުގެ ޝަކުވާތައް ސަމާލުކަމަށް އައިސްފައިވާ ކަމަށެވެ. މެންބަރު ވިދާޅުވީ މިކަމުގެ ސަބަބުން ހުޅުމާލޭގެ ރައްޔިތުންނަށް ކުރިމަތިވެދާނެ ސިއްހީ އަދި އިޖުތިމާއީ ނޭދެވޭ އަސަރުތަކުން ރައްކާތެރި ކުރުމަކީ ވެމްކޯގެ މައްޗަށް އޮތް ޒިންމާއެއް ކަމުގައި ދެކެވަޑައިގަންނަވާ ކަމަށެވެ.
އެހެންކަމުން މި މައްސަލައާ ގުޅޭ އިތުރު ތަފްސީލު ހޯދުމަށްޓަކައި މެންބަރު ވަނީ 7 ސުވާލެއް ހުށަހަޅުއްވާފަ އެވެ.
އެކަމަށް ރައްދުދެއްވައި ކުރެއްވި ޕޯސްޓެއްގައި މުޖުތަބާ ވިދާޅުވީ ހުޅުމާލެ ފަޅުތެރެއަށް ކުނި އެޅުމާއި ވެމްކޯއާ މާބޮޑު ގުޅުމެއް ނެތް ކަން ހުޅުމާލެ ފަޅުތެރޭގައި ސަފާރީ ބޯޓު އަޅައިގެން ތިބޭ މީހުންނަށް އެނގޭނެ ކަމަށެވެ. ފަޅުތެރޭގައި ގިނައިން ހުންނަނީ ޕްލާސްޓިކް ފުޅިކަން ފާހަގަ ކުރައްވާ އޭނާ ވިދާޅުވީ ޕްލާސްޓިކް ފުޅި އަކީ އެކަމަށް ޚާއްސަ ދެ ޖަމިއްޔާ ކަމަށްވާ ޕަރލޭ އަދި މޯޕާ އިން ވަރަށް ޒިންމާދާރު ކަމާއެކު ހުޅުމާލެ އިން ނަގަމުންދާ އެއްޗެއް ކަމަށެވެ.
އެ ދެ ޖަމިއްޔާ އިން ޕްލާސްޓިކް ފުޅި ނަގަނީ ފިއްތާފައި ކަމަށާއި ނަމަވެސް ހުޅުމާލެ ފަޅުތެރެއަށް އަޅާފައި ހުންނަ ފުޅިތައް ހުންނަނީ ހުރި ގޮތަށް އުކާލާފައި ކަން މުޖުތަބާ ވަނީ ފާހަގަ ކުރައްވާފަ އެވެ. އަދި ވިދާޅުވީ އެއްވެސް ސަފާރީއަކުން ސީދާ ވެމްކޯ ސައިޓަށް ކުނި ނުގެންނަ ކަމަށާއި އެހެންކަމުން، އެ ކުނިތައް ދަނީ ކޮންތާކަށް ތޯ ބަލަން ޖެހޭ ކަމަށެވެ.
ހުޅުމާލެ ފަޅުތެރެ ސާފުކޮށް ބެލެހެއްޓުމަކީ ވެމްކޯގެ ޒިންމާ އެއް ނޫން. ނަމަވެސް ހަފްތާއަކު 3 ދުވަހު ފަޅުތެރެއިން ކުނި ނަގާ ސާފު ކުރުމަށް ވަކި ޑިންގީ އެއް ބާއްވައިގެން ރައްޔިތުންނަށްޓަކައި އެކަން ކުރޭ. އެޗްޑީސީ އިން މިކަމުގައި ފުރިހަމަ އެއްބާރުލުން ވެމްކޯ އަށް ދޭ. އެޗްޑީސީ އާއި ވެމްކޯ ގުޅިގެން މިހާރު ވެސް ޖޮއިންޓް އެފޯޓެއް އެބަ ލާ ފަޅުތެރެ ސާފު ކުރުމަށް. ފަޅު ބޭނުން ކުރާ ފަރާތްތަކުގެ ޒިންމާ މިކަމުގައި ބޮޑު. ސުވާލު އުފައްދާ ފަރާތްތަކުން ވިސްނާލަން ރަނގަޅު ކަމެއް މިކަމަކީމުޖުތަބާ ޖަލީލު
ހުޅުމާލެއަށް ދިމާވެފައިވާ ކުނީގެ މައްސަލަ ހައްލުކުރަން އެހީވުމުގެ ގޮތުން އެޗްޑީސީ އިން މިފަހުން ވެމްކޯއަށް ވަގުތީ ބިމެއް ދީފައިވާ ކަމަށް ވެސް އޭނާ ވިދާޅުވި އެވެ.
މެންބަރު ކުޑޫ ހުށަހަޅުއްވާފައިވާ ސުވާލުގައި ވެމްކޯ އިން ހުޅުމާލޭގެ ފަޅުތެރެ އަށް ކުނި އެޅެން މެދުވެރިވާ މައިގަނޑު ސަބަބު ހޯދުމާއި، ކުނި އުފުލާ އުޅަނދުފަހަރުން ފަޅުތެރެއަށް ކުނި އެޅެނީ ކޮން އިހުމާލަކުން ނުވަތަ ކޮން ދައްޗަކާ ހުރެ ތޯ ސާފުކުރުމަށް ހުށަހަޅުއްވާފައިވެ އެވެ. އަދި ފަޅު ތަޣައްޔަރުވުމުގެ ސަބަބުން ހުޅުމާލޭގެ ތިމާވެއްޓާއި ކަނޑުގެ ދިރުންތަކަށް ކުރަމުންދާ ނޭދެވޭ އަސަރުތައް ކުޑަ ކުރުމަށް އެއްވެސް މަސައްކަތެއް ކުރަމުންދޭތޯ އާއި، އެކަން ކުރާނަމަ ކުރާ މަސައްކަތްތަކަކީ ކޮބައިތޯ ވެސް ސުވާލު ކުރައްވާފައިވެ އެވެ.
