ޑެންގީ ހުން ޖެހިގެން ވެންޓިލޭޓަރުގައި ފަރުވާ ދެމުންދިޔަ 23 އަހަރުގެ ޒުވާނާ ނިޔާވެއްޖެ

ޑެންގީ ހުން ޖެހިގެން ހާލު ސީރިއަސްވެ ވެންޓިލޭޓަރުގައި ފަރުވާ ދެމުންދިޔަ 23 އަހަރުގެ ޒުވާނާ ނިޔާވެއްޖެ އެވެ.

ހޯމަ ދުވަހު ނިޔާވީ، ށ. މިލަންދޫއަށް އުފަން 23 އަހަރުގެ އަހުމަދު ނަބުހާން އެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެޒުވާނާއަށް ފުރަތަމަ ފަރުވާ ދީފައި ވަނީ މިލަންދޫ ސިއްހީ މަރުކަޒުގަ އެވެ. އޭގެފަހުން އިތުރު ފަރުވާއަށް ކުޅުދުއްފުށީ ހޮސްޕިޓަލަށް ބަދަލު ކުރި ކަމަށާއި، އިތުރަށް ހާލު ސިރިއަސް ވުމުން އާދިއްތަ ދުވަހު މާލެއަށް ގެނައީ ކަމަށެވެ.

ނަބުހާން އައިޖީއެމްއެޗްއަށް ގެނައި ގޮތަށް ހާލު ސިރިއަސްވުމުން ފުރަތަމަ ވެސް ފަރުވާދޭން ފަށާފައި ވަނީ އައިސީޔޫގެ ވެންޓިލޭޓަރުގައި ކަމަށެވެ. އަދި ނިޔާވީ ފަރުވާ ދެމުންދަނިކޮށް ހޯމަ ދުވަހުގެ ހެނދުނުގެ ވަގުތެއްގަ އެވެ.

މި ދުވަސްވަރު މުޅި ރާއްޖޭގައި ޑެންގީ ޖެހިގެން ރިޕޯޓު ކުރާ މިންވަރު ވަނީ އިތުރުވެފަ އެވެ. މައުލޫމާތު ލިބިފައިވާ ގޮތުގައި މިލަންދޫ ގައި ވެސް މިދިޔަ ނޮވެމްބަރު މަހުން ފެށިގެން ޖެނުއަރީ މަހުގެ ނިޔަލަށް ޑެންގީ ހުން ޖެހިގެން 30 މީހަކަށް ފަރުވާ ދީފައިވެ އެވެ. 

ރޯގާގެ ގޮތުގައި ފެތުރެމުންދާ ބަލިތަކުގެ ހާލަތާ ގުޅޭގޮތުން އާދިއްތަ ދުވަހު ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ، މިއަހަރުގެ ފެބްރުއަރީ މަހާ އަޅާބަލާއިރު، މިއަހަރު މާރިޗް މަހު ޑެންގީ ހުން ޖެހިގެން ރިޕޯޓު ކުރެވުނު އަދަދު އިތުރުވެފައިވާ ކަމަށެވެ. 

އެގޮތުން ފެބްރުއަރީ މަހު 428 ކޭސް ރިޕޯޓު ކޮށްފައިވާއިރު، މާރިޗް މަހު 535 ކޭސް ރިޕޯޓު ކޮށްފައިވެ އެވެ.

އެޗްޕީއޭއިން ބުނީ، ޑެންގީ ހުން ޖެހިގެން ރިޕޯޓު ކުރާ މިންވަރު އިތުރުވި ނަމަވެސް އެހެނިހެން ރޯގާ ޖެހޭ މިންވަރު މަދުވެފައިވާ ކަމަށެވެ. 

އެގޮތުން ފެބްރުއަރީ މަހު އަރިދަފުސް ރޯގާގެ 25010 ކޭސް ރިޕޯޓު ކުރި ނަމަވެސް މާރިޗް މަހު ރިޕޯޓު ކޮށްފައިވަނީ 20761 ކޭސް އެވެ.  އަދި ފެބްރުއަރީ މަހު ބޭރަށް ހިންގުމުގެ 8629 ކޭސް ރިޕޯޓު ކޮށްފައިވާ ކަމަށާއި، މާރިޗް މަހު 4441 ކޭސް ރިޕޯޓު ކޮށްފައިވާ ކަމަށެވެ. މީގެ އިތުރުން އިންފްލުއެންޒާ އަށް މިއަހަރުގެ މިހާތަނަށް ޓެސްޓު ކުރެވުނު 1030 މީހުންގެ ތެރެއިން 112  މީހުން ޕޮޒިޓިވްފައިވާ ކަމަށް އެޗްޕީއޭއިން ބުނެ އެވެ.