ބޮޑު ނާކާމިޔާބެއް ކުރިމަތިވެ، އޯބަންގެ ވެރިކަން ނިމުމަކަށް

ހަންގޭރީގައި ގިނަ ދުވަސް ތަކެއް ވަންދެން ވެރިކަން ކުރައްވަމުން އައި ނޭޝަނަލިސްޓް ލީޑަރު ވިކްޓާ އޯބަން، އެ ޤައުމުގައި ބޭއްވި އާންމު އިންތިޚާބުގައި ބޮޑު ނާކާމިޔާބަކާ ކުރިމަތިލާާން ޖެހިއްޖެ އެވެ.

ހަންގޭރީގެ އިންތިޚާބުގައި ބޮޑު ކާމިޔާބެއް ހޯދާފައި ވަނީ ޕީޓާ މަގްޔާރް އިސްކޮށް ހުންނަވައި، އަލަށް އުފެއްދެވި، ސެންޓަރ ރައިޓް ޔޫރަޕުގެ އިއްތިހާދަށް ތާއީދު ކުރާ ޓިސްޒާ ޕާޓީ އިންނެވެ. މިއީ ރަޝިޔާ އާއި އެމެރިކާގެ ރައީސް ޑޮނަލްޑް ޓްރަމްޕް ގާތް ގުޅުމެއް ބާއްވަވާ އޯބަން އަށް ލިބުނު ވަަރަށް ބޮޑު ނާކާމިޔާބީ އެކެވެ. 

ވޯޓުގެ 46 އިންސައްތަ ގުނައި ނިމިފައިވާއިރު، ނަތީޖާ ދައްކާ ގޮތުން 199 މެމްބަރުން ހިމެނޭ ހަންގޭރީގެ ޤާނޫނު ހަދާ މަޖިލީހުގެ 135 ގޮނޑި ޓިސްޒާ ޕާޓީ އިން ވަނީ ކާާމިޔާބު ކޮށްފަ އެވެ. މިއީ ޤާނޫނު އަސާސީ އަށް ބަދަލު ގެނައުމަށް ބޭނުންވާ ތިންބައިކުޅަ ދެބައި މެޖޯރިޓީ އެވެ. އޯބަންގެ ފިޑޭޒް ޕާޓީ އަށް ވަނީ މި އިންތިޚާބުގައި ބޮަޑު ނާކާމިޔާބެއް ކުރިމަތިވެފަ އެވެ.

އޯބަންގެ ކެމްޕެއިން އޮފީހުގަައި ވާހަކަ ދައްކަވަމުން އޭނާ ވިދާޅުވީ، އިންތިޚާބުގެ ފައިނަލް ނަތީޖާ އަދި ނުލިބޭ ކަމަށާއި، ނަމަވެސް މަސްރަހު އޮތް ގޮތް ވަރަށް ސާފު ކަމަށެވެ. މި ނަތީޖާ އަކީ ވަރަށް ހިތްދަތި ނަތީޖާއެއް ކަމަށާއި، ނަމަވެސް އެއީ ރައްޔިތުންގެ ސާފު ނިންމުމެއް ކަމަށް އޭނާ ވަނީ ވިދާޅުވެފަ އެވެ. 

މި އިންތިޚާބުގައި ވޯޓުލީ މީހުންގެ އަދަދު ރެކޯޑު މިންވަރަކަށް މަތިވެފައިވާއިރު، ބުޑަޕެސްޓުގައި ވޯޓުލާ މަރުކަޒު ތަކުގައި ދިގު ކިއޫ ތަކެއް އޮތް ކަމަށް ހަންގޭރީގެ މީޑިއާ ތަކުގައި ވަނީ ރިޕޯޓު ކޮށްފަ އެވެ. ވޯޓުލުން ބަންދު ކުރުމުގެ ބައި ގަޑިއިރު ކުރިން ލިބުުނު ތަފާސް ހިސާބު ތަކަށް ބަލާއިރު، ވޯޓު ލުމުގެ ހައްގު ލިބިގެންވާ މީހުންގެ 77.8 އިންސައްތަ މީހުން ވަނީ ވޯޓު ލައިފަ އެވެ. މިއީ މީގެ ހަތަރު އަހަރު ކުރިން ވޭއްވި އިންތިޚާބުގައި ވޯޓުލީ 67.8 އިންސައްތައާ އަޅާ ބަލާއިރު ބޮޑު ކުރިއެރުމެކެވެ. 

ފާއިތުވި 16 އަހަރު ހަންގޭރީގައި އޯބަން ކުރެއްވި ވެރިކަން ނިމުމަކަށް އައުމަކީ ހަމައެކަނި އެ ޤައުމަށް އޮތް ކަމެއް ނޫނެވެ. މިއީ މުޅި ޔޫރަޕުގެ އިންތިހާދަށާއި، ޔޫކްރެއިން ހަނގުރާމަ އަށް ވެސް ބޮޑެތި ބަދަލު ތަކެއް އަންނާނެ ކަމެކެވެ. އޯބަންގެ ވެރިކަން ނިމުމުން، ޔޫރަޕުގެ އިއްތިހާދުގެ ތެރޭގައި ހަންގޭރީ އިން ގެންގުޅުނު ދެކޮޅުވެރި ސިޔާސަތުތައް ނިމުމަކަށް އަންނާނެ ކަމަށް ވެސް ބެލެވެ އެވެ. 

މީގެ އިތުރުން އޯބަން ހުރަސް އަޅަމުން ގެންދިޔަ، ޔޫކްރެއިން އަށް ދޭން ނިންމާފައިވާ 90 ބިލިއަން ޔޫރޯ ނުވަތަ 105 ބިލިއަން އެމެރިކާ ޑޮލަރުގެ ލޯނު ދޫކުރުމަށް ވެސް މަގު ފަހި ވެގެން ދާނެ ކަމަށް ބެލެވެ އެވެ.