އެމްޓީސީސީ ބަސް ތަކުގެ ބަސް ކާޑު މެޝިންތައް ހަލާކުވެ، ރައްޔިތުން ބޮޑު ތަކުލީފެއްގައި!
މާލެ ސަރަހައްދުގެ ބަސްތަކުގައި ހުރި ކާޑު މެޝިންތައް ހަލާކުވެފައި ހުރުމުގެ ސަބަބުން، ބަސް ކާޑު ބޭނުންކުރާ ފަރާތްތަކަށް ދަތުރުކުރުމުގައި ބޮޑެތި ދަތިތަކަކާ ކުރިމަތިވެ އާންމުންގެ ޝަކުވާ ވަނީ އިތުރުވެފަ. ޓިކެޓް ލިބޭނެ ފަސޭހަ އިންތިޒާމެއް ނެތުމާއި ކޭޝް ކާޑު ނެތް ނަމަ ދަތުރު ނުކުރެވޭ މައްސަލައިގައި އެމްޓީސީސީގެ މެނޭޖްމަންޓަށް ބޮޑެތި ފާޑުކިޔުންތަކެއް އަމާޒުވަމުންދާއިރު، މިކަމާ ގުޅޭގޮތުން އެ ކުންފުނިން އަދި ރަސްމީ ބަހެއް ބުނެފައެއް ނުވޭ.
މާލެ ސަރަހައްދުގައި ދުއްވާ އެމްޓީސީސީ ގެ ބަސް | އެޑިޝަން.އެމްވީ
މާލެ އާއި ހުޅުމާލެ ހިމެނޭހެން ގްރޭޓާ މާލެ ސަރަހައްދުގައި އެމްޓީސީސީން ދެމުންގެންދާ ބަހުގެ ހިދުމަތުގައި ބޭނުންކުރާ ކާޑު މެޝިންތަކަށް ދިމާވެފައިވާ މައްސަލަތަކާ ގުޅިގެން ގިނަ ބަޔަކު ކަންބޮޑުވުން ފާޅުކުރަން ފަށައިފި އެވެ.
މާލެ ސަރަހައްދުގައި ދަތުރުކުރާ ގިނަ ބަސްތަކުގައިވާ ބަސް ކާޑު މެޝިންތައް ވަނީ ހަލާކުވެފަ އެވެ. މީގެ ސަބަބުން، ބަހުގެ ހިދުމަތް ހޯދާ މީހުން އަތުގައި ކޭޝް ކާޑު ނުވަތަ ކާޑުން ފައިސާ ދެއްކޭނެ ގޮތެއް ނެތް ނަމަ، ބަހުގައި ދަތުރު ނުކުރެވޭ ކަމުގެ ޝަކުވާތައް ވަނީ އިތުރުވެފަ އެވެ.
އެގޮތުން ބަސް ކާޑުން ފައިސާ ނުކެނޑޭ ކަމަށާ ކާޑު މެޝިން ހަލާކުވެފައި ވުމާއެކު ކޭޝް ކާޑު ނެތް ނަމަ ދެން އަންނަ ބަހަށް މަޑުކުރަން ބުނުން ނުވަތަ ޓިކެޓް ނަގައިގެން ދަތުރުކުރަން ބަސްތަކުން ބުނާ ކަމަށް ވެސް ރާއްޖެއެމްވީ އާ ކަންބޮޑުވުން ހިއްސާ ކުރި ބައެއް މީހުން ވަނީ ބުނެފަ އެވެ.
ނަމަވެސް އެކަމުގައި ހުރި އެންމެ ބޮޑު ކަންބޮޑުވުމަކީ ފަސޭހައިން ޓިކެޓް ނުލިބުން ކަމަށާ ޓިކެޓް ލިބެނީ މާލޭ ގެ މެއިން ބަސް ސްޓޮޕާއި ހުޅުމާލެ ފޭސް 2 ގެ މެއިން ސްޓޮޕުން އެކަނި ކަމަށް ވުމާއެކު އެކަމުގައި ވެސް ހުރީ ހުސް އުނދަގޫ ކަމަަށް ވެސް ކަންބޮޑުވުން ހިއްސާކުރި ފަރާތްތަކުން ވަނީ ބުނެފަ އެވެ.
ގިނަ ބަޔަކު ބުނާ ގޮތުގައި، ޓެކްނޮލޮޖީގެ އެހީގައި ހިދުމަތް ފަސޭހަކުރަން އުޅުނު ނަމަވެސް، މެޝިންތައް މަރާމާތު ނުކުރެވި ގިނަ ދުވަސްވުމަކީ ބަލައިގަނެވޭނެ ކަމެއް ނޫނެވެ. އަދި ޓިކެޓް ލިބޭނެ އިތުރު ގޮތްތަކެއް ނުވަތަ ބަސް ތެރެއިން ފައިސާ ދެއްކޭނެ ފަސޭހަ އިންތިޒާމެއް ނެތުމުން، އެމްޓީސީސީގެ މެނޭޖްމަންޓަށް އާންމުން ދަނީ ވަރަށް ބޮޑަށް ފާޑުކިޔަމުންނެވެ.
މި މައްސަލައާ ގުޅިގެން އެމްޓީސީސީގެ ރަސްމީ ބަހެއް އަދި ލިބިފައެއް ނުވެއެވެ.
