5 މޭޔަރުންނަށް އިތުރު ފުރުސަތެއް ރައްޔިތުން ދިނީ އެމްޑީޕީގެ މޭޔަރުކަމުގައި ރަނގަޅު ލީޑަރޝިޕެއް ދައްކާފައިވާތީ: އާޒިމް
5 އެޕްރީލު 2026 | އާދީއްތަ 14:25އެމްޑީޕީގެ މޭޔަރުންނަށް ރައްޔިތުން އިތުބާރު ކުރަނީ އެ ޕާޓީގެ ލީޑަރޝިޕްގައި ވައްކަމާއި ކޮރަޕްޝަނަށް ފުރުސަތު ނޯންނާނެކަމުގެ ޔަގީންކަން އޮތުމުން ކަމަށް މާލޭގެ މޭޔަރު އާދަމް އާޒިމް ވިދާޅުވި.
ހުޅުމާލޭގައި ބޭއްވި "ހޭވައްލާ ތައްޔާރު ހުޅުމާލެ ޖަލްސާ" މާލެ ސިޓީގެ މޭޔަރު އާދަމް އާޒިމް ވާހަކަ ދައްކަވަނީ. | ރާއްޖެ އެމްވީ
މިހާރު ތިބި އެމްޑީޕީގެ 5 މޭޔަރުންނަށް އިތުރު ފުރުސަތެއް ރައްޔިތުން ދިނީ އެމްޑީޕީގެ މޭޔަރުކަމުގައި ރަނގަޅު ލީޑަރޝިޕެއް ދައްކާފައިވާތީ ކަމަށް މާލޭގެ މޭޔަރ އާދަމް އާޒިމް ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީ އަށް ދެއްވި ބަސްތީގަތުމެއްގަ އެވެ. އާޒިމް ވަނީ ރައްޔިތުންނަށް ޚިދުމަތް ކުރުމުގެ ރޫހު ހުރީ އެމްޑީޕީގައި ކަމަށް ފާހަގަކުރައްވާފަ އެވެ. ސިޓީތަކުގައި ކައުންސިލްތަކުން ކުރި ކަމެއް ނޫނީ ފެންނަން ނެތް ކަމަށް އޭނާ ވިދާޅުވި އެވެ. ސިޓީ ކައުންސިލްތަކުން ކަންކަން ކޮށްފައި ވަނީ އެތައް ފިއްތުންތަކާއި އެކުގައި ކަމަށް ވެސް އޭނާ ވަނީ ވިދާޅުވެފަ އެވެ. ރައްޔިތުން ބޭނުން ވަނީ ކައުންސިލްތަކަށް ބާރުތައް ދޫކޮށްލާ، ރައްޔިތުންގެ ތަރައްޤީ އަށް މަސައްކަތް ކުރުމުގެ ބާރު ކައުންސިލްތަކަށް އެއްކޮށް ދޫކޮށްލަން ކަމަށް އޭނާ ވިދާޅުވި އެވެ.
"އެމްޑީޕީގެ މެމްބަރެއް ހުންނަ ނަމަ ރައްޔިތުންގެ މުދަލުގައި ނުޖެހޭނެ ކަމުގެ އިތުބާރު އެބަ އޮތް. ވައްކަމާ ކޮރަޕްޝަނާއި ދެކޮޅުވާނެކަން އެނގޭނެ. މި ފެނުނީ އެމްޑީޕީގެ މޭޔަރުންނަށް ކުރާ އިތުބާރު." އާޒިމް ވިދާޅުވި އެވެ.
އިންތިޚާބަކަށް އަލުން ކުރިމަތިލާން ވާނީ ރައްޔިތުންނަށް ޚިދުމަތްތަކެއް ކޮށްދިނުމަށް ފަހުގައި ކަމަށާއި މާލޭގެ މޭޔަރ ކަމަށް ދެ ވަނަ ފަހަރަށް ވާދަކުރެއްވީ އޭނާ އަށް ޚިދުމަތްތަކެއް ކުރެވިފައިވާ ކަމަށް ގަބޫލުކުރެވޭތީ ކަމަށް އޭނާ ވިދާޅުވި އެވެ. އަދި އެމްޑީޕީ އަށް ރައްޔިތުން ދިން ފުރިހަމަ އަޣުލަބިއްތަށް ބަލާލުމުން ރައްޔިތުން އޭނާގެ މަސައްކަތް ބަލައިގަތްކަން ހާމަވާ ކަމަށް އާޒިމް ވިދާޅުވި އެވެ.
އާޒިމް ވަނީ މި ސަރުކާރަށް އާއްމުން ބޮޑުތަނުން ނޫނެކޭ ބުނެފައިވާ ކަމަށް ވިދާޅުވެފަ އެވެ. އަދި ކޮންމެ ގޮތެއް ރައްޔިތުންނަށް ވަރިހަމަ ނުވާނެކަން ސާބިތުކޮށްދީފައިވާ ކަމަށް ވެސް އޭނާ ވިދާޅުވި އެވެ.
