20 އަހަރުން ދަށުގެ ސާފް ޗެމްޕިއަންޝިޕް: އިންޑިއާ ބަލިކޮށް، ބަންގްލަދޭޝް އިން ތަށި އުފުލާލައިފި

ރާއްޖޭގައި ކުރިއަށް ދިޔަ 20 އަހަރުން ދަށުގެ ސާފް ޗެމްޕިއަންޝިޕްގެ ފައިނަލްގައި އިންޑިއާ ބަލިކޮށް، ބަންގްލަދޭޝް އިން މުބާރާތުގެ ތަށި އުފުލާލައިފި އެވެ.

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު ފައިނަލް މެޗުގައި ބަންގްލަދޭޝް އިން ވަނީ ޕެނަލްޓީ ޖަހައިގެން އިންޑިއާ ބަލިކޮށްފަ އެވެ. ފައިނަލްގެ ކުރިން މުބާރާތުގެ ގުރޫޕު ސްޓޭޖުގައި ވެސް މި ދެ ޓީމު ވަނީ ބައްދަލު ކޮށްފަ އެވެ. އެ މެޗު ނިމުނީ ދެ ޓީމު އެއްވަރު ވެގެންނެވެ. 

މެޗު ފަށައިގެން ބަންގްލަދޭޝް އިން ރަނގަޅަށް ކުޅެ، އިންޑިއާގެ ގޯލަށް ނުރައްކާ ކުރުމަަށް މަސައްކަތް ކުރަމުން ދިޔައިރު، އިންޑިއާ އިން ވެސް ވަނީ ލިބުނު ފުރުސަތުގައި ލަނޑު ޖަހަން މަސައްކަތް ކޮށްފަ އެވެ. ނަމަވެސް، މެޗުގެ ދެ ވަނަ ހާފުގައި އިންޑިއާ އިން ވަނީ ކުޅުން ރަނގަޅުކޮށް ލަނޑު ޖަހަން ވަރަށް ބޮޑަށް މަސައްކަތް ކޮށްފަ އެވެ.

މެޗު އެއްވަރުވުމުން ނަތީޖާ ނެރުމަށް ޖެހި ޕެނަލްޓީގައި، ބަންގްލަދޭޝް އިން ވަނީ ހަތަރު ޕެނަލްޓީ ކާމިޔާބު ކޮށްފަ އެވެ. އެ ޓީމުގެ އެއް ޕެނަލްޓީ ވަނީ ނާކާމިޔާބުވެފަ އެވެ. ފަސް ޕެނަލްޓީގެ ތެރެއިން އިންޑިއާ އަށް ތިން ޕެނަލްޓީ ކާމިޔާބު ކުރެވުނުއިރު، ދެ ޕެނަލްޓީ ވަނީ ނާކާމިޔާބުވެފަ އެވެ.

މީގެ ކުރިން ބަންގްލަދޭޝް އިން ވަނީ 2024 ވަނަ އަހަރު އޮތް 20 އަހަރުން ދަށުގެ ސާފް ޗެމްޕިއަންޝިޕް ކާމިޔާބު ކޮށްފަ އެވެ. 2025 ވަނަ އަހަރު އޮތީ 19 އަހަރުން ދަށުގެ ސާފް ޗެމްޕިއަންޝިޕް ކަމަށްވާއިރު، އެފަހަރުގެ މުބާާރާތް ކާމިޔާބު ކުރީ އިންޑިއާ އިންނެވެ. އެ ފަހަރު އިންޑިއާ އިން މުބާރާތް ކާމިޔާބު ކުރީ ޕެނަލްޓީގައި ބަންގްލަދޭޝް ބަލިކޮށްގެންނެވެ.