20 އަހަރުން ދަށުގެ ސާފް ޗެމްޕިއަންޝިޕް: ފައިނަލްގައި ބަންގްލަދޭޝް އާއި އިންޑިއާ
މިއަހަރުގެ މުބާރާތުގެ ފައިނަލް މެޗު އޮންނާނީ ހުކުރު ދުވަހުގެ ރޭ. މުބާރާތުގެ ގުރޫޕް ސްޓޭޖުގައި ވެސް މި ދެ ޓީމު ވަނީ ބައްދަލު ކޮށްފައި. އެ މެޗު ނިމުނީ އެއްވަރު ވެގެން.
ބޫޓާންއާ ދެކޮޅަށް ކުޅުނު ސެމީ ފައިނަލް މެޗުގައި ލަނޑު ޖެހުމަށް ފަހު އިންޑިއާގެ ކުޅުންތެރިން އުފާ ފާޅު ކުރަނީ | ސާފް
ރާއްޖޭގައި މިހާރު ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕް ފުޓުބޯޅަ މުބާރާތުގެ ފައިނަލްގައި ބަންގްލަދޭޝް އާއި އިންޑިއާ ބައްދަލު ކުރަން ޖެހިއްޖެ އެވެ.
ބަންގްލަދޭޝް އިން މުބާރާތުގެ ފައިނަލްގެ ޖާގަ ހޯދީ ބުދަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު ސެމީ ފައިނަލް މެޗުގައި ނޭޕާލްގެ މައްޗަށް ކުރި ހޯދައިގެންނެވެ. މެޗުގައި ބަންގްލަދޭޝް އިން ލަނޑު ޖެހީ ވެސް ފުރަތަމަ ހާފުގަ އެވެ.
މެޗު ފަށައިގެން 11 ވަނަ މިނެޓުގައި ބަންގްލަދޭޝް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަަހައިދިނީ އެމްޑީ މަނިކް އެވެ. އެއީ އެ ޓީމަށް ލިބުނު ކޯނަރެއްގައި ހުރަސްވި ބޯޅަ، ބޮލުން ޖަހައި ގޯލަށް ވައްދާލައިގެން އޭނާ ޖެހި ލަނޑެކެވެ. އޭގެ ފަހުން މެޗުގައި ބަންގްލަދޭޝް އިން އިތުރު ލަނޑެއް ޖެހި ނަމަވެސް، އޮފްސައިޑު ކަމަށް ވަނީ ނިންމައިފަ އެވެ.
މި މެޗުގައި ބަންގްލަދޭޝް އަށް ސަޕޯޓު ކުރުމަށްޓަކައި އެ ޤައުމުގެ ގިނަ އަދަދެއްގެ ރައްޔިތުން ވަނީ ދަނޑަށް ވަދެފަ އެވެ. ރާއްޖޭގައި މަސައްކަތް ކުރާ ބަންގްލަދޭޝް ރައްޔިތުންގެ އަދަދު އިންތިހާ އަށް ގިނައިރު، ދަނޑުގައި ގިނައިން ތިބީ ވެސް ބަންގްލަދޭޝްގެ ސަޕޯޓަރުންނެވެ.
ބުދަ ދުވަހުގެ ރޭ ކުޅުނު ދެ ވަނަ ސެމީ ފައިނަލްގައިި އިންޑިއާ އިން ވަނީ 5-0 އިން ބޫޓާން ބަލިކޮށްފަ އެވެ. މެޗުގެ ފުރަތަމަ ހާފުގައި އިންޑިއާ އިން ދެ ލަނޑު ޖެހިއިރު، އަނެއް ތިން ލަނޑު އެ ޓީމުން ޖެހީ ދެ ވަނަ ހާފުގަ އެވެ.
މެޗު ފަށައިގެން ހަަތަރު ވަނަ މިނެޓުގައި އިންޑިއާ އަށް ލީޑު ނަގައިދިނީ އޮމަން ދުދޯން އެވެ. އޭގެ ފަހުން މެޗުގެ ފުރަތަމަ ހާފު ނިމެން މިނެޓަކަށް ވެފައި ވަނިކޮށް އިންޑިއާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އެމްޑީ އަރްބާޝް އެވެ.
މެޗުގެ ދެ ވަނަ ހާފު ފަށައިގެން އެގާރަ ވަނަ މިނެޓުގައި އިންޑިއާގެ ރޯހަން ސިންގް ވަނީ އެ ޓީމުގެ ތިން ވަނަ ލަނޑު ޖަހައިފަ އެވެ. އޭގެ މިނެޓެއް ފަހުން އޭނާ ވަނީ އިތުރު ލަނޑެއް ޖަހައި، އިންޑިއާ އަށް ހަތަރު ލަނޑުގެ ލީޑެއް ހޯދައިދީފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އިންޑިއާގެ ފަސް ވަނަ ލަނޑު ޖެހީ ތޮކްޗޯމް އެވެ.
މިއަހަރުގެ މުބާރާތުގެ ފައިނަލް މެޗު އޮންނާނީ ހުކުރު ދުވަހުގެ ރޭ އެވެ. މުބާރާތުގެ ގުރޫޕް ސްޓޭޖުގައި ވެސް މި ދެ ޓީމު ވަނީ ބައްދަލު ކޮށްފަ އެވެ. އެ މެޗު ނިމުނީ އެއްވަރު ވެގެންނެވެ.
