ބަންގްލަދޭޝް އިން އިންޑިއާއާ އެއްވަރުކޮށްފި، ގުރޫޕުގެ އެއް ވަނަ އިންޑިއާ އަށް

ރާއްޖޭގައި މިހާރު ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕްގެ ގުރޫޕް ބީގައި އިންޑިއާ އާއި ބަންގްލަދޭޝް ބައްދަލު ކުރި މެޗު އެއްވަރުވެ، އިންޑިއާ އަށް ގުރޫޕުގެ އެއް ވަނަ ލިބިއްޖެ އެވެ.

ހޮނިހިރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި އިންޑިއާ އިން

ލަނޑު ޖަހައި ކުރި ހޯދާފައި ވަނިކޮށް، ބަންގްލަދޭޝް އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ. މި މެޗަށް ނިކުތްއިރު ވެސް ދެ ޓީމަށް ސެމީ ފައިނަލްގެ ޖާގަ ކަށަވަރުވެފައި އޮތްއިރު، އެއް ވަނަ އާއި ދެ ވަނަ ޔަގީންވާން އޮތީ މި މެޗުންނެވެ.

މެޗު ފަށައިގެން 17 ވަނަ މިނެޓުގައި އިންޑިއާ އިން ވަނީ ބަންގްލަދޭޝް ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އިންޑިއާ އަށް ޖަހައިދިނީ ވިޝާލް ޔާދަވް އެވެ. ނަމަވެސް، މެޗުގެ ފުރަތަމަ ހާފުގެ އިތުރު ވަގުތުގައި ބަންގްލަދޭޝް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު ބަންގްލަދޭޝް އަށް ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް އަބްދުލް ރިޔާދު ފަހީމް އެވެ.

މެޗު އެއްވަރުވެގެން ނިމުނުއިރު، ގުރޫޕް ސްޓޭޖުގައި ދެ ޓީމަށް ވެސް ލިބުނީ ހަތަރު ޕޮއިންޓެވެ. ހަތަރު ޕޮއިންޓާ އެކު އިންޑިއާ އިން އެއް ވަަަނަ ޔަގީން ކުރީ ފައިދާ ތިން ލަނޑުންނެވެ. ހަތަރު ޕޮއިންޓާ އެކު ބަންގްލަދޭޝް އަށް ދެ ވަނަ ލިބުނީ ފައިދާ ލަނޑުންނެވެ. 

މުބާރާތުގެ ސެމީ ފައިނަލްގައި ބަންގްލަދޭޝް ނިކުންނާނީ ނޭޕާލްއާ ދެކޮޅަށެވެ. އަނެއް ސެމީ ފައިނަލްގައި އިންޑިއާ ނިކުންނާނީ ބޫޓާންއާ ދެކޮޅަށެވެ.