2 އިންތިހާބު އެއްކުރަނީ 2028 ގައި މުއިއްޒުއަށް އިންތިހާބު ނެގެން އޮތީ އެގޮތަށް ހަދައިގެން ކަމަށްވާތީ: ސޯލިހު
ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމަށް ސަރުކާރުން ކުރާ މަސައްކަތަކީ ރައްޔިތުންގެ ބާރުތައް ދަމައިގަތުމަށް ހިންގާ ނުރައްކާތެރި އަމަލެއް ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ. މި ބަދަލުގެ ފަހަތުގައި އެއްވެސް ހެޔޮ ނިޔަތެއް ނެތް ކަމަށާއި، މިއީ ހަރަދު ކުޑަކުރުމުގެ ނަމުގައި ސިޔާސީ މަންފާއެއް ހޯދުމަށް ކުރާ ކަމެއް ކަމަށް އެމަނިކުފާނު ތުހުމަތު ކުރެއްވި. އެހެންކަމުން، އިންތިހާބުތައް އެއްކޮށްލުމާ ގުޅޭގޮތުން ނަގާ ރެފަރަންޑަމްގައި ސަރުކާރުގެ ނިންމުމާ ދެކޮޅަށް "ނޫނެކޭ" ބުނުމަށް ރައީސް ސޯލިހު ވަނީ ރައްޔިތުންނަށް އިލްތިމާސް ކުރައްވާފަ.
ހުޅުމާލޭގައި ބޭއްވި "ހޭވައްލާ ތައްޔާރު ހުޅުމާލެ ޖަލްސާ" ގައި ކުރީގެ ރައީސް އިބްރާހިމް މުހައްމަދު ސޯލިހު ވާހަކަފުޅު ދައްކަވަނީ. | އެމްޑީޕީ
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށް ބޭއްވުމަށް ގާނޫނުއަސާސީއަށް ބަދަލު ގެނައުމަށް ސަރުކާރުން މަސައްކަތް ކުރަނީ، 2028 ވަނަ އަހަރުގެ ރިޔާސީ އިންތިހާބު ރައީސް ޑރ. މުހައްމަދު މުއިއްޒަށް ކާމިޔާބު ކުރެވެން އޮތީ އެގޮތަށް ކަންކަން ބައްޓަން ކޮށްގެން ކަމަށް ފެންނާތީ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އެމްޑީޕީން ހުޅުމާލޭގައި ބޭއްވި "ހޭވައްލާ ތައްޔާރު" ބޮޑު ޖަލްސާގައި ވާހަކަފުޅު ދައްކަވަމުންނެވެ. ރައީސް ސޯލިހު ވިދާޅުވީ ކުރިއަށް އޮތް ލޯކަލް ކައުންސިލް އިންތިހާބާ ދިމާކޮށް، ދެ އިންތިހާބު އެއްކުރުމާ ގުޅޭގޮތުން ރައްޔިތުންގެ ހިޔާލު ހޯދުމުގެ ރިފަރަންޑަމް ވޯޓެއް ނަގަން ސަރުކާރުން ތައްޔާރުވަމުންދާ ކަމަށެވެ. މިއީ ރައްޔިތުންގެ އަތުގައި އޮތް ބާރުތައް ދަމައިގަތުމަށް ހިންގާ ވަރަށް ނުރައްކާތެރި އަމަލެއްގެ ގޮތުގައި އެމަނިކުފާނު ސިފަކުރެއްވި އެވެ.
މި ސަރުކާރުން މިހާތަނަށް ޖުޑިޝަރީގެ މިނިވަންކަމާއި މިނިވަން މުއައްސަސާތަކުގެ ބާރުތައް ކަނޑުވާލާފައިވާ ކަމަށާއި، ރައްޔިތުންގެ މަޖިލީހުގައި ބަސްބުނުމުގެ ފުރުސަތު ވެސް ގެއްލުވާލާފައިވާ ކަމަށް ރައީސް ސޯލިހު ވިދާޅުވި އެވެ. އެމަނިކުފާނު ފާހަގަކުރެއްވި ގޮތުގައި މިހާރު ރައްޔިތުންގެ އަތުގައި އޮތް ހަމައެކަނި ބާރަކީ ވޯޓުލުމުގެ ބާރާއި ސަރުކާރު ޖަވާބުދާރީ ކުރުވުމުގެ ބާރެވެ. ނަމަވެސް، މި ރެފަރަންޑަމް މެދުވެރިކޮށް އެ ބާރު ވެސް ނައްތާލުމަށް ސަރުކާރުން މަސައްކަތް ކުރަމުންދާ ކަމަށް އެމަނިކުފާނު ވިދާޅުވި އެވެ.
ހަމަ ކުއްލިއަކަށް ނުކުމެވަޑައިގެން ތިމަންނާއަށް އެންމެ ރަނގަޅީ އަނެއްކާ މި އިންތިޚާބާ އެއްކޮށްލައިގެން 2028 ނެގެން އޮތީ މިހެން ކަމަށް ފެންނާތީ އެކަން ކުރައްވަން އެވަޑައިގަންނަވަނީ. އެ ނޫން އެއްވެސް ކަމެއް އެއަކު ނެތް. ޚަރަދުކުރުމެއް ނޫން އޭގެ ފަހަތުގައި އޮތީކީ. އަނެއްކާ ރާއްޖޭގެ ރައްޔިތުން މިހާތަނަށް މި ޑިމޮކްރަސީގައި މި ކުރި ދަތުރުގައި އަދި އޭގެ ކުރިންވެސް މި ކުރި ދަތުރުގައި އިންތިޚާބުތައް މިއައީ ތަފާތު ދުވަސްތަކުން. ނަވާރަސަތޭކަ ބައްތިރީސް އިން ފެށިގެން އަޅުގަނޑުމެން ޤާނޫނުއަސާސީއަށް ޢަމަލުކުރަން ފަށައިފިން. ނަވާރަސަތޭކަ ފަންސާސް ތިނެއް ގައި ޖުމްހޫރިއްޔަތަކަށް ބަދަލުވެ، އޭގެ ކުރިންވެސް މަޖިލިސް އޮތް. އެއިން ކޮންމެ ދުވަސްވަރެއްގައިވެސް މި އިންތިޚާބުތައް ބާއްވަމުން އައީ މުޅިން ވަކިން.ކުރީގެ ރައީސް އިބްރާހިމް މުހައްމަދު ސޯލިހު
ރައީސް ސޯލިހު ވިދާޅުވީ މި ބަދަލުގެ ފަހަތުގައި އެއްވެސް ހެޔޮ ނިޔަތެއް ނެތް ކަމަށެވެ. އެހެންކަމުން، އަންނަ އޭޕްރީލް މަހުގެ 4 ވަނަ ދުވަހު ބާއްވާ އިންތިހާބުގައި، ދެ އިންތިހާބު އެއްކޮށްލުމާ މެދު ރައްޔިތުންގެ ހިޔާލު ހޯދާ ކަރުދާސްކޮޅުގައި "ނޫނެކޭ" ބުނާ ތަނުގައި ފާހަގަ ޖެހުމަށް އެމަނިކުފާނު އިލްތިމާސް ކުރެއްވި އެވެ. އެ ދުވަހަކީ ހެޔޮވެރިކަމެއް ގާއިމުކުރުމަށް ކުރާ މަސައްކަތުގައި ރައްޔިތުން މި ސަރުކާރަށް "ނޫނެކޭ" ބުނާނެ ދުވަހެއްގެ ގޮތުގައި އެމަނިކުފާނު ސިފަކުރެއްވި އެވެ.
މީގެ އިތުރުން، ވޯޓުލާ ދުވަހު ހެނދުނު ހެނދުނާ ނުކުމެ ވޯޓުލުމަށް ރައީސް ސޯލިހު އެދިވަޑައިގަތެވެ. އެ ދުވަހުގެ ހަވީރު 4 ޖެހުމާ ހަމައަށް ވޯޓުލުން ކުރިއަށްދާއިރު، އެއްވެސް ސަބަބަކާ ހުރެ ވަގުތު އިތުރު ނުކުރާނެ ކަމަށް މައުލޫމާތު ލިބިފައިވާ ކަމަށް އެމަނިކުފާނު ވިދާޅުވިއެވެ. ނަމަވެސް، ސަރުކާރަށް ތާއީދުކުރާ ވޯޓު މަދުވާނަމަ ވަގުތު އިތުރުކުރުމުގެ ފުރުސަތު އޮތް ކަމަށް ބެލެވޭތީ، އެކަމަށް ބެލުމެއް ނެތި ވީހާވެސް އަވަހަކަށް ނުކުމެ އެމްޑީޕީގެ "ތިލަފަތަށް" ވޯޓު ދެއްވުމަށް އެމަނިކުފާނު ގޮވާލެއްވި އެވެ.
