ފެންނަ ނުފެންނަ ވޯޓުގައި ނޫނެކޭ ބުނަންޖެހެނީ އެ އިސްލާހަކީ ޤާނޫނުއަސާސީގެ ދުސްތޫރީ ލެޖިޓެމަސީ ގެއްލިފައިވާ އިޞްލާޙަކަށްވާތީ: ކުރީގެ އުއްތަމަފަނޑިޔާރު ޑރ އަހުމަދު އަބްދުﷲ ދީދީ
ޤާނޫނުއަސާސީއަށް ގެނައި އިޞްލާޙަކީ ދުސްތޫރީ ހަމަތަކާ ޚިލާފު ބަދަލަކަށްވާތީ، ފެންނަ ނުފެންނަ ވޯޓުގައި "ނޫނެކޭ" ބުނަންޖެހޭ ކަމަށް ކުރީގެ އުއްތަމަފަނޑިޔާރު ޑރ. އަޙުމަދު ޢަބްދުﷲ ދީދީ ވިދާޅުވެއްޖެ. މި ބަދަލުގެ ސަބަބުން ރާއްޖޭގެ ވެރިކަމުގެ ނިޒާމު ޚުދުމުޚުތާރުވެ، ޑިމޮކްރެޓިކް އުޞޫލުތައް ގެއްލިގެންދާނެ ކަމުގެ ކަންބޮޑުވުން އެމަނިކުފާނު ފާޅުކުރެއްވި. އެހެންކަމުން، ގިނަ ޕާޓީތައް އެކުލެވޭ ސިޔާސީ ނިޒާމު ރައްކާތެރިކުރުމަށްޓަކައި މި އިޞްލާޙާ ދެކޮޅަށް ވޯޓު ދިނުމަށް އާންމު ރައްޔިތުންނަށް އެމަނިކުފާނު އިލްތިމާސްކުރެއްވި.
ކުރީގެ އުއްތަމަފަނޑިޔާރު ޑރ އަހުމަދު އަބްދުﷲ ދީދީ. | ރާއްޖެ އެމްވީ
ޤާނޫނުއަސާސީއަށް ގެނެސްފައިވާ އިޞްލާޙުތަކާ ގުޅޭގޮތުން ނަގާ ފެންނަ ނުފެންނަ ވޯޓުގައި "ނޫނެކޭ" ބުނަންޖެހޭ ޙަޤީޤީ ސަބަބަކީ، އެ އިޞްލާޙަކީ ޤާނޫނުއަސާސީއާ ޚިލާފަށް އަދި ޤާނޫނުއަސާސީގެ ދުސްތޫރީ ލެޖިޓެމަސީ ގެއްލިފައިވާ އިޞްލާޙަކަށްވާތީ ކަމަށް ކުރީގެ އުއްތަމަފަނޑިޔާރު ޑރ. އަޙުމަދު ޢަބްދުﷲ ދީދީ ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ރާއްޖެޓީވީން ކުރިއަށްގެންދާ "ނޫނެކޭ" ކެމްޕޭން ޕްރޮގްރާމުގައި ވާހަކަދައްކަވަމުންނެވެ.
ޑރ. އަޙުމަދު ޢަބްދުﷲ ދީދީ ވިދާޅުވީ، މި ރެފްރެންޑަމްގައި ރައްޔިތުންނަށް ދަންނަވަން އޮތް އެންމެ މުހިންމު ވާހަކައަކީ، މިހާރު ހުށަހަޅާފައިވާ ސުވާލު އޮތް ގޮތަށް ބަލައިގެން އެކަނި ނިންމުމެއް ނިންމުން ނޫން ކަމަށެވެ. އޭގެ ބަދަލުގައި، މި އިޞްލާޙާ ދެކޮޅަށް "ނޫނެކޭ" ބުނަންޖެހޭ އަސާސީ ސަބަބަކީ އެއީ ދުސްތޫރީ ހަމަތަކުން ބޭރުން ގެނެސްފައިވާ ބަދަލަކަށް ވުން ކަމަށް އެމަނިކުފާނު ފާހަގަކުރެއްވި އެވެ.
މި އިޞްލާޙުގެ ނަތީޖާއާ މެދު ކަންބޮޑުވުން ފާޅުކުރައްވަމުން ކުރީގެ އުއްތަމަފަނޑިޔާރު ވިދާޅުވީ، މީގެ ސަބަބުން ރާއްޖޭގެ ވެރިކަމުގެ ނިޒާމު ޚުދުމުޚުތާރު ވެރިކަމަކަށް ބަދަލުވެގެންދާނެ ކަމަށެވެ. އަދި ބައެއް ފަރާތްތަކުން މިކަމުގައި ދައްކަމުންދާ ވާހަކަތަކަކީ ރައްޔިތުންނަށް އޮޅުވާލުމަށް ދައްކާ ވާހަކަތަކެއްގެ ގޮތުގައި އެމަނިކުފާނު ސިފަކުރެއްވި އެވެ. ވަކިން ޚާއްޞަކޮށް، ރައީސުލްޖުމްހޫރިއްޔާއަށް އެނގިވަޑައިނުގަންނަވާނެ ކަމަށް ބުނެ ދައްކާ ވާހަކަތަކަކީ ޙަޤީޤަތާ ޚިލާފު ވާހަކަތަކެއް ކަމަށް ވިދާޅުވި އެވެ.
ވީމާ، މި އިޞްލާޙުގެ ނަތީޖާއަކަށް ވެގެންދާނީ އަޅުގަނޑުމެން ޚުދުމުޚުތާރު ވެރިކަމަކަށް ބަދަލުވެގެންދިޔުން. މީގައި އެއްގޮތަކަށްވެސް، ބައެއް ފަރާތްތަކުން ވަކާލާތުކުރާ ގޮތަކަށެއް ރައީސުލްޖުމްހޫރިއްޔާ އަށް އެނގިވަޑައިނުގަންނަވާނެއޭ އަންނާނީ ކޮން ބަޔަކަށްތޯ ކޮން ޕާޓީއެއްތޯ، އެއީ ހަމަ އޮޅުވާލުމެއް ދެކެވޭ ވާހަކައެއް.ކުރީގެ އުއްތަމަފަނޑިޔާރު ޑރ. އަޙުމަދު ޢަބްދުﷲ ދީދީ
ޑރ. އަޙުމަދު ޢަބްދުﷲ ދީދީ އިތުރަށް ވިދާޅުވީ، ރައީސުލްޖުމްހޫރިއްޔާ އާއި ސަރުކާރުން ހުރިހާ ގޮތަކަށް ކެމްޕޭން ކުރާނީވެސް އެމަނިކުފާނު ނިސްބަތްވާ ޕާޓީގެ މެންބަރުން މަޖިލީހަށް ގެނައުމަށްޓަކައި ކަމަށެވެ. އެހެންކަމުން، ދިވެހި ޤައުމު ޚުދުމުޚުތާރު ވެރިކަމަކަށް ވެއްޓިޔަނުދީ ހިފެހެއްޓުމަކީ ކޮންމެހެން ކުރަންޖެހޭ ކަމެއް ކަމަށް އެމަނިކުފާނު ވިދާޅުވި އެވެ.
ރާއްޖޭގައި މިހާރު އޮތް މަލްޓި ޕާޓީ ސިސްޓަމް ނުވަތަ ގިނަ ޕާޓީތައް އެކުލެވޭ ސިޔާސީ ނިޒާމު ހަރުދަނާކޮށް ހިންގުމުގެ މުހިންމުކަން ފާހަގަކުރައްވަމުން، އެމަނިކުފާނު ވިދާޅުވީ އިދިކޮޅު ޕާޓީތަކާއެކު ހެޔޮވެރިކަމެއް ކުރާ ޑިމޮކްރެޓިކް ސިސްޓަމެއް ބީވެގެން ދިޔަދީގެން ނުވާނެ ކަމަށެވެ. އެ ނިޒާމު ރައްކާތެރިކުރުމަށްޓަކައި މި ވޯޓުގައި "ނޫނެކޭ" ބުނުން ނޫން ގޮތެއް ނެތް ކަމަށް ވިދާޅުވެ އެމަނިކުފާނު ވަނީ ރައްޔިތުންނަށް އިލްތިމާސްކުރައްވާފަ އެވެ.
