ބޮސްނިއާ އަތުން މޮޅުވެ ޖަރުމަނު އެއް ވަނައިގައި

ޔުއެފާ ނޭޝަންސް ލީގު އޭގެ ގްރޫޕް ތިނެއްގައި ބޮސްނިއާއާ ދެކޮޅަށް ކުޅުނު މެޗުން މޮޅުވެ، ޖަރުމަނުން ގުރޫޕްގެ އެއް ވަނަ އަށް ޖެހިލައިފި އެވެ.

ބޮސްނިއާއާ ދެކޮޅަށް ކުޅުނު މެޗު ޖަރުމަނުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ޖަރުމަނުން ވަނީ ދެ ލަނޑު ޖަހައިފަ އެވެ. މެޗުގައި ބޮސްނިއާ އިން އެ ޓީމުގެ ލަނޑު ޖެހީ ފަހު ހާފުގަ އެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި ޖަރުމަނަށް ލީޑު ނަގައިިދިނީ ޑެނިޒް އުންޑާވް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ފްލޯރިއަން ވާޓްޒް އެވެ. އޭގެ ހަ މިނެޓު ފަހުން އުންޑާވް ވަނީ ޖަރުމަނުގެ ދެ ވަނަ ލަނޑު ޖަހައިފަ އެވެ. މެޗުގެ ދެ ވަނަ ހާފުގައި އުންޑާވް ތިން ވަނަ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަަލައި ނުގަންނަން ނިންމައިފަ އެވެ. މެޗުގައި ބޮސްނިއާގެ ހަމައެކަނި ލަނޑު 70 ވަނަ މިނެޓުގައި ޖެހީ އެޑިން ޖެކޯ އެވެ.

މޮޅާއެކު ޖަރުމަނު އެއް ވަނައިގައި އޮތީ މިހާތަނަށް ކުޅުނު ތިން މެޗުން ހަތް ޕޮއިންޓު ހޯދައިގެންނެވެ. ދެ މެޗުން ޖަރުމަނު މޮޅުވެފައިވާއިރު، އެއް މެޗުން ވަނީ އެއްވަރުވެފަ އެވެ. ލީގުގައި ދެން ޖަރުމަނު ނިކުންނާނީ ނެދަލެންޑްސްއާ ދެކޮޅަށެވެ.