ގާނާގެ ކުރީގެ ފިނޭންސް މިނިސްޓަރު އެމެރިކާގައި ހައްޔަރު ކޮށްފި
10 ޖެނުއަރީ 2026 | ހޮނިހިރު 02:57މިދިޔަ އަހަރުގެ ޖަނަވަރީ މަހުން ފެށިގެން އޮފޮރީ އައްޓާ އަންނަނީ އެމެރިކާގައި އުޅެމުން. އެއީ ޞިއްޙީ ގޮތުން ބޭސްފަރުވާގެ ކަންކަން ކުރިއަށް ގެންދިޔުމަށް. އެމެރިކާގައި އޭނާ އަންނަނީ ޕްރޮސްޓޭޓް ކެންސަރުގެ އޮޕަރޭޝަންއަކާ ގުޅިގެން ފަރުވާ ހޯދަމުން.
ގާނާގެ ކުރީގެ ފިނޭންސް މިނިސްޓަރު ކެން އޮޕޮރީ އައްޓާ | ރޮއިޓާސް
ގާނާގެ ކުރީގެ ފިނޭންސް މިނިސްޓަރު ކެން އޮޕޮރީ އައްޓާ، އެމެރިކާގައި ހައްޔަރު ކޮށްފި އެވެ.
އުމުރުން މިހާރު 66 އަހަރުވެފައިވާ އޮފޮރީ އައްޓާ އަންނަނީ އޭނާ ގެ އަމިއްލަ ޤައުމުގައި ކޮރަޕްޝަންގެ ތުހުމަތާ ކުރިމަތިލާން ޖެހިފަ އެވެ. ބުރާސްފަތި ދުވަހު އޭނާ ގެ ޤާނޫނީ ވަކީލުން ބުނެފައި ވަނީ، އެމެރިކާގެ އިމިގްރޭޝަން އޮފިޝަލުން އޭނާ ހައްޔަރު ކޮށްފައިވާ ކަމަށެވެ.
މިދިޔަ އަހަރުގެ ޖަނަވަރީ މަހުން ފެށިގެން އޮފޮރީ އައްޓާ އަންނަނީ އެމެރިކާގައި އުޅެމުންނެވެ. އެއީ ޞިއްޙީ ގޮތުން ބޭސްފަރުވާގެ ކަންކަން ކުރިއަށް ގެންދިޔުމަށެވެ. އެމެރިކާގައި އޭނާ އަންނަނީ ޕްރޮސްޓޭޓް ކެންސަރުގެ އޮޕަރޭޝަންއަކާ ގުޅިގެން ފަރުވާ ހޯދަމުންނެވެ.
މިދިޔަ އަހަރުގެ ފެބްރުވަރީ މަހުގެ ތެރޭގައި ގާނާ އިން ވަނީ، އޮފޮރާ އައްޓާ އަކީ ޤައުމު ދޫކޮށް ފުރައިގެން ގޮސްފައިވާ މީހެއް ކަމަށް އިއުލާން ކޮށްފަ އެވެ. އަދި ހަމަ އެ އަހަރުގެ ނޮވެމްބަރު މަހުގެ ތެރޭގައި ވަނީ، އޭނާ ގެ މައްޗަށް ރަސްމީކޮށް ކޮރަޕްޝަންގެ ދައުވާ އުފުލައިފަ އެވެ. ބުދަ ދުވަހުގެ ރޭ އޮފޮރީ އައްޓާގެ ޤާނޫނީ ވަކީލުން ވަނީ، އެމެރިކާގައި އޭނާ ހުންނަ މުއްދަތު އިތުރު ކުރުމަށް ވެސް އެދިފައިވާ ކަމަށެވެ.
އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް (އައިސީއީ) އިން އޮފޮރީ އައްޓާ ހައްޔަރު ކޮށްފައި ވަނީ އަންގާރަ ދުވަހު އެވެ. ވަކީލުން ބުނެފައި ވަނީ އޭނާ ހައްޔަރު ކޮށްފައި ވަނީ، އެމެރިކާގައި ހުންނަ ޙާލަތާ ގުޅިގެން ކަމަށެވެ.
ވަކީލުންގެ ފަރާތުން ނެރުނު ބަޔާނުގައި ބުނެފައި ވަނީ، އެމެރިކާގައި މަސައްކަތް ކުރާ އޮފޮރީ އައްޓާގެ ޤާނޫނީ ވަކީލުންގެ ޓީމާއި، އައިސީއީއާ ވާހަކަ ދައްކައި، މަޝްވަރާ ކުރަމުން އަންނަ ކަމަށެވެ. އަދި އެ މައްސަލަ އަށް އަވަސް ޙައްލެއް ލިބިގެން ދާނެ ކަމަށް އުންމީދު ކުރެވޭ ކަމަށް ވަނީ ފާހަގަ ކޮށްފަ އެވެ. ބަޔާނުގައި އިތުރަށް ބުނެފައި ވަނީ، އޮފޮރީ އައްޓާ އަންނަނީ އިމިގްރޭޝަންގެ އޮފިޝަލުންނަށް ފުރިހަމަ އަށް އެއްބާރުލުން ދެމުން އަންނަ ކަމަށެވެ.
އައިސީއީގެ އޮންލައިން ޑޭޓާ ބޭސް އިން ދައްކާ ގޮތުގައި، ގާނާގެ ކުރީގެ ފިނޭންސް މިނިސްޓަރު އޮފޮރީ އައްޓާ ބަންދު ކޮށްފައި ހުންނަނީ އެމެރިކާގެ ވާޖީނިއާ ސްޓޭޓުގެ ފެސިލިޓީއެއްގަ އެވެ.
ގާނާގެ ފިނޭންސް މިނިސްޓަރު ގެ ގޮތުގައި އޮފޮރީ އައްޓާ މަސައްކަތް ކޮށްފައި ވަނީ 2017 ވަނަ އަހަރުން ފެށިގެން، 2024 ވަނަ އަހަރާ ހަމައަށެވެ. އެއީ ގާނާގެ ކުރީގެ ރައީސް ނާނާ އަކުފޯ އައްޑޯގެ ސަރުކާރުގަ އެވެ. އަކުފޯ އައްޑޯގެ ވެރިކަމުގައި ހުށަހެޅުނު ޓެކްސްގެ އިސްލާޙު ތަކާއި، އިންޓަނޭޝަނަލް މަނިޓަރީ ފަންޑާ ކުރި މަޝްވަރާ ތަކުގައި އިސްކޮށް ޙަރަކާތްތެރި ވެފައި ވަނީ އޮފޮރީ އައްޓާ އެވެ.
އެމެރިކާގައި އޮފޮރީ އައްޓާ ހައްޔަރު ކޮށްފައިވާއިރު، އެ މައްސަލައާ ގުޅިގެން ގާނާގެ ސަރުކާރުން ރަސްމީ އެއްޗެއް ބުނެފައި ނުވެ އެވެ. އެހެން ނަމަވެސް، އޭނާ އަލުން އަނބުރާ ޤައުމަށް އައުމަށް ގާނާގެ ސަރުކާރުން ވަނީ ގޮވާލައިފަ އެވެ. އޮފޮރީ އައްޓާ އެމެރިކާގައި ހުންނަ މުއްދަތު އިތުރު ކުރުމަށް އެދިފައި ވީ ނަމަވެސް، އެކަމަށް ދޭނެ ޖަވާބެއް ސާފުވެފައި ނުވެ އެވެ.
