ނޭވީ ކޮމާންޑަރު ތަންގްސިރީ، އިޒްރޭލް އިން އަވަހާރަ ކޮށްލާފައިވާ ކަމަށް އީރާން އިން ބުނެފި
30 މާރިޗު 2026 | ހޯމަ 11:07ހޯމަ ދުވަހު އީރާންގެ މީޑިއާތައް މެދުވެރިކޮށް އައިއާރުޖީސީ އިން ނެރުނު ބަޔާނެއްގައި ބުނެފައި ވަނީ، ތަންގްސިރީ އަވަހާރަވެފައި ވަނީ ވަރަށް ބޮޑެތި ޒަޚަމުތަކަކާ އެކު.
އަލީ ރެޒާ ތަންގްސިރީ | އޭއެފްޕީ
އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ނޭވީ ކޮމާންޑަރު އަލީ ރެޒާ ތަންގްސިރީ އަވަރާވެފައިވާކަން އީރާން އިން ކަށަވަރު ކޮށްދީފި އެވެ.
ތަންގްސިރީ އަވަހާރަ ކޮށްލާފައިވާ ކަމަށް އިޒްރޭލް އިން ބުނެފައި ވަނީ މާޗު މަހުގެ 26 ވަނަ ދުވަހު އެވެ. ހޯމަ ދުވަހު އީރާންގެ މީޑިއާތައް މެދުވެރިކޮށް އައިއާރުޖީސީ އިން ނެރުނު ބަޔާނެއްގައި ބުނެފައި ވަނީ، ތަންގްސިރީ އަވަހާރަވެފައި ވަނީ ވަރަށް ބޮޑެތި ޒަޚަމުތަކަކާ އެކު އެވެ.
ހޮރްމޫޒް ކަނޑު އޮޅީގެ ޒިންމާ އޮތް އީރާންގެ ނޭވީ ކޮމާންޑަރު އަވަހާރަ ކޮށްލާފައިވާ ކަމަށް އިޒްރޭލް އިން ބުނެފި
އިޒްރޭލްގެ ޑިފެންސް މިނިސްޓަރު އިޒްރޭލް ކާޓްޒް މިދިޔަ ބުރާސްފަތި ދުވަހު ވިދާޅުވެފައި ވަނީ، އިޒްރޭލް އިން ހިންގި އޮޕަރޭޝަނެއްގައި ތަންގްސިރީ އަވަހާރަ ކޮށްލާފައިވާ ކަމަށެވެ. ތަންގްސިރީ އަވަހާރަ ކޮށްލާފައި ވަނީ، ބަނދަރު އައްބާސްގައި ދިން ހަމަލާއެއްގައި ކަމަށް ބުނެފައިވާއިރު، އޭނާ އަކީ ހޮރްމޫޒް ކަނޑު އޮޅި ބަންދު ކުރުމުގެ ޒިންމާ އުފުލާފައިވާ ބޭފުޅާ އެވެ.
މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާން އަށް ދޭން ފެށި ހަމަލާ ތަކުގައި އީރާންގެ ގިނަ އިސްވެރިން ތަކެއް ވަނީ އަވަހާރަ ކޮށްލައިފަ އެވެ. އޭގެ ތެރޭގައި އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ އާއި، އެ ޤައުމުގެ ސެކިއުރިޓީ ޗީފް އަދި ނުފޫޒު ގަދަ ބޭފުޅެއް ކަމަށްވާ އަލީ ލަރިޖާނީ ވެސް ހިމެނެ އެވެ. މީގެ އިތުރުން އީރާންގެ އަސްކަރިއްޔާގެ ކޮމާންޑަރުން ތަކެއް ވެސް އިޒްރޭލް އިން ވަނީ އަވަހާރަ ކޮށްލައިފަ އެވެ.
އިޒްރޭލް އިން އީރާންގެ ނޭވީ ކޮމާންޑަރު އަވަހާރަ ކޮށްލާފައިވާއިރު، އީރާން އިން އެކަމުގެ ބަދަލު ހިފާނެ ކަމަށް ރިޕޯޓު ތަކުގައި ބުނެފައިވެ އެވެ. ތަންގްސިރީ އަކީ އީރާންގެ ނޭވީގެ އޮޕަރޭޝަންތައް ހިންގުމުގައި މުހިންމު ދައުރެއް އަދާ ކުރި ބޭފުޅެކެވެ.
މަސްދަރު: އެޖެންސީސް
