ހަނގުރާމައިގެ މަގުސަދުތައް ސާފުކޮށްދިނުމަށް، އޮސްޓްރޭލިއާގެ ބޮޑު ވަޒީރު އަލްބަނީސް ޓްރަމްޕް އަށް ގޮވާލައްވައިފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ މަޤުސަދުތަކާ ގުޅޭ ގޮތުން އެމެރިކާގެ ރައީސް ޑޮނަލްޑް ޓްރަމްޕްގެ ފަރާތްޕުޅުން އިތުރަށް ތަފްޞީލު ބޭނުންވާ ކަމަށް، އޮސްޓްރޭލިއާގެ ބޮޑު ވަޒީރު އެންތަނީ އަލްބަނީސް ވިދާޅުވެއްޖެ އެވެ. 

ހޯމަ ދުވަހު ނޫސްވެރިންނާ ވާހަކަ ދައްކަވަމުން އަލްބަނީސް ވިދާޅުވީ، އެމެރިކާގެ ރައީސް ޓްރަމްޕް ހަނގުރާމަ ކުރިއަށް ގެންދަވާ ގޮތާ މެދު ސުވާލު އުފެދޭ ކަަމަށެވެ. އަދި މި ހަނގުރާމައިގެ އަސްލު މަގުސަދަކީ ކޮބައިކަން މިހާރަށް ވުރެ ބޮޑަށް ސާފު ވާން ބޭނުންވާ ކަމަށް ވެސް އަލްބަނީސް ވިދާޅުވި އެވެ. އަދި މެދު އިރުމަތީގެ މަސްރަހު ފިނިކޮށް، ހަމަ ނުޖެހުންތައް މަދު ކުރުމަށް ބޭނުންފުޅުވާ ކަމަށް ވެސް ބޮޑު ވަޒީރު ފާހަގަ ކުރެއްވި އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފަށާފައި ވަނީ މިދިޔަ ފެބްރުވަރީ މަހުގެ 28 ވަނަ ދުވަހު އެވެ. އެ ހަމަލާ ތަކުގައި އީރާންގެ އޭރުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލާފައިވެ އެވެ. އޭގެ ފަހުން އީރާން އިން އައު ރޫހީ ލީޑަރުގެ މަގާމަށް އައްޔަން ކޮށްފައި ވަނީ އާޔަތުﷲ ޢަލީ ޚާމަނާއީގެ ދަރިކަލުން، މުޖުތަބާ ޚާމަނާއީ އެވެ. 

މި ހަނގުރާމައިގެ ސަބަބުން މިހާތަނަށް އެތައް ބަޔަކު މަރުވެފައިވާއިރު، މިއީ ދުނިޔޭގެ އިޤްތިޞާދަށް ވެސް އެކަމުގެ އަސަރު ކުރަން ފަށާފައިވާ ހަނގުރާމަ އެކެވެ. ޚާއްސަކޮށް ދުނިޔޭގެ ތެލުގެ ބާޒާރަށް ބޮޑެތި ހުރަަސް ތަކެއް ކުރިމަތިވެފައިވާއިރު، ބައިނަލްއަޤުވާމީ މުޖުތަމައުން އަންނަނީ މި ހަނގުރާމަ ނިންމުމަށް ގޮވާލަމުންނެވެ. 

އޮސްޓްރޭލިއާ އިން ވަނީ، ޔުނައިޓެޑު އަރަބް އެމިރޭޓްސް (ޔޫއޭއީ) އިން އެދިގެން އެ ޤައުމުގެ ދިފާއީ ކަންކަމަށް އެހީތެރި ވުމަށް އަސްކަރީ މަތިންދާ ބޯޓު ތަކެއްް ފޮނުވައިފަ އެވެ. ނަމަވެސް، ހޮރްމޫޒް ކަނޑު އޮޅި އަލުން ހުޅުވުމަށް ކުރާ މަސައްކަތުގައި އެހީތެރިވުމަށް އެ ޤައުމުގެ މަނަވަރުތައް ފޮނުވުމަށް އޮސްޓްރޭލިއާގެ ސަރުކާރުން ވަނީ އިންކާރު ކޮށްފަ އެވެ.