ކޮމަންވެލްތު ގޭމްސްގައި ރާއްޖޭގެ ޗެފް ޑި މިޝަން އަކަށް ފަޒްނާ ހަމަޖައްސައިފި
ކޮމަންވެލްތު ގޭމްސްގެ ޗެފް ޑި މިޝަން އަކަށް ފަޒްނާ ހަމަޖައްސަން އެމްއޯސީ އިން ނިންމާފައިވާއިރު، އޭނާ އަންނަނީ 2019 ވަނަ އަހަރުން ފެށިގެން ނެޓުބޯޅަ އެސޯސިއޭޝަންގެ ރައީސްގެ މަގާމު ފުރުއްވަމުން. އޭނާ އަކީ މީގެ ކުރިން ނެޓުބޯޅަ ކޯޗެއްގެ ގޮތުގައި ވެސް މަސައްކަތް ކޮށްފައިވާ ފަރާތެއް.
އެމްއޯސީގެ އޭޖީއެމްގައި ނެޓުބޯޅަ އެސޯސިއޭޝަންގެ ރައީސާ ފަޒްނާ ޖަލީލް ބައިވެރި ވަނީ. | އެމްއޯސީ
މިއަހަރު އޮންނަ ކޮމަންވެލްތު ގޭމްސްގައި ރާއްޖޭގެ ޗެފް ޑި މިޝަން އަކަށް، ނެޓުބޯޅަ އެސޯސިއޭޝަންގެ ރައީސާ ފަޒްނާ ޖަލީލް ހަމަޖައްސަން، މޯލްޑިވްސް އޮލިމްޕިކް ކޮމެޓީ (އެމްއޯސީ) އިން ނިންމައިފި އެވެ.
ކޮންމެ ހަތަރު އަހަރަކުން އެއް ފަހަރު ބާއްވާ ކޮމަންވެލްތު ގޭމްސް މިއަހަރު އޮންނާނީ ޖުލައި މަހުގެ 23 ވަނަ ދުވަހުން ފެށިގެން، އޯގަސްޓު މަހުގެ ދެ ވަނަ ދުވަހުގެ ނިޔަލަށެވެ. މިއަހަރު ބާއްވާ ކޮމަންވެލްތު ގޭމްސް އޮންނާނީ ސްކޮޓްލެންޑުގެ ގްލާސްގޯގަ އެވެ.
ކޮމަންވެލްތު ގޭމްސްގެ ޗެފް ޑި މިޝަން އަކަށް ފަޒްނާ ހަމަޖައްސަން އެމްއޯސީ އިން ނިންމާފައިވާއިރު، އޭނާ އަންނަނީ 2019 ވަނަ އަހަރުން ފެށިގެން ނެޓުބޯޅަ އެސޯސިއޭޝަންގެ ރައީސްގެ މަގާމު ފުރުއްވަމުންނެވެ. އޭނާ އަކީ މީގެ ކުރިން ނެޓުބޯޅަ ކޯޗެއްގެ ގޮތުގައި ވެސް މަސައްކަތް ކޮށްފައިވާ ފަރާތެކެވެ. މީގެ އިތުރުން ފަޒްނާ އަކީ އެމްއޯސީގެ ހިންގާ ކޮމެޓީގެ ވެސް މެމްބަރެކެވެ.
މެދު ކެނޑުމަކަށް ފަހު ރާއްޖެ އިން އެންމެ ފުރަތަމަ ކޮމަންވެލްތު ގޭމްސްގައި ބައިވެރި ވެފައި ވަނީ 2022 ވަނަ އަހަރު އެވެ. އޭގެ ކުރިން 2016 ވަނަ އަހަރުގެ ތެރޭގައި ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމްގެ ސަރުކާާރުން، ކޮމަންވެލްތުން ވަކިވާން ރާއްޖެ އިން ނިންމުމާ އެކު، ގޭމްސްގައި ވާދަ ކުރުމުގެ ފުރުސަތު ރާއްޖެ އަށް ގެއްލިފައި ވެއެވެ.
ނަމަވެސް، އޭގެ ފަހުން ކުރީގެ ރައީސް އިބްރާހީމް މުޙައްމަދު ޞޯލިޙުގެ ސަރުކާރުގައި ވަނީ، ރާއްޖެ އަލުން ކޮމަންވެލްތުގައި ބައިވެރިވެފަ އެވެ. އެއާ އެކު، 2022 ވަނަ އަހަރު އިނގިރޭސިވިލާތުގައި ކުރިއަށް ދިޔަ ކޮމަންވެލްތު ގޭމްސްގައި ރާއްޖެ އިން ވަނީ ބައިވެރިވެފަ އެވެ.
