ސައުތު އެފްރިކާ އަތުން ބީޗް ވޮލީ ޓީމަށް ނާކާމިޔާބު
4 އޯގަސްޓު 2022 | ބުރާސްފަތި 02:57ސައުތު އެފްރިކާގެ ގޯލްޑްޝްމިޑްޓް އާއި ވިލިއަމްސްގެ ޕެއާ އަތުން ރާއްޖެ ބަލިވީ ތިން ސެޓު ކުޅެގެން
ގޭމްސްގައި ކުޑަކާއްޓޭ އާއި އެޑަމް ކުޅުނު މެޗެއްގެ ތެރެއިން
ކޮމަންވެލްތު ގޭމްސްގެ ބީޗް ވޮލީގެ ގްރޫޕް ސެޓޭޖުގައި ފަހު މެޗުގައި ސައުތު އެފްރިކާއާ ވާދަކޮށް، ރާއްޖޭގެ އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް) ބަލިވެއްޖެއެވެ.
ސައުތު އެފްރިކާގެ ގޯލްޑްޝްމިޑްޓް އާއި ވިލިއަމްސްގެ ޕެއާ އަތުން ރާއްޖެ ބަލިވީ ތިން ސެޓު ކުޅެގެންނެވެ. ފުރަތަމަ ސެޓު ސައުތު އެފްރިކާގެ ޕެއާ އިން ހޯދީ 21-16 އިންނެވެ. ނަމަވެސް ކުޑަކާއްޓެ އާއި އެޑަމް ވަނީ ޖެހިގެން އައި ދެވަނަ ސެޓު 21-14 ން ހޯދާފައެވެ. ނަތީޖާ ނެރުމަށް ކުޅުނު ތިންވަނަ ސެޓުގައި ސައުތު އެފްރިކާގެ ޕެއާ އިން ރާއްޖެ މައްޗަަށް ކުރި ހޯދިއެވެ. އެއީ 15-11 ންނެވެ.
ގޭމްސްގެ ގްރޫޕް ސްޓޭޖުގައި ކުޅުނު ތިން މެޗުން ރާއްޖެ ބަލިވި ނަމަވެސް، ޓީމުގެ ކުޅުމަށް ގިނަ ބަޔަކު އަންނަނީ ތައުރީފު ކުރަމުންނެވެ. ފުރަތަމަ މެޗުގައި ރާއްޖެއިން ވަނީ އެންމެ ފަހުގެ ޗެމްޕިއަން އޮސްޓްރޭލިއާއާ ދެކޮޅަށް ތަފާތު މޮޅު ކުޅުމެއް ދައްކާފައެވެ. ދެވަނަ މެޗުގައި ރުވާންޑާ އަތުން ބަލިވީ ތިން ސެޓު ކުޅެގެންނެވެ.
މިއަހަރުގެ މާޗު މަހުގެ ތެރޭގައި ސްރީލަންކާގައި އޮތް ކޮމަންވެލްތު ކޮލިފައިންގައި ރާއްޖެއަށް ލިބުނީ ދެވަނައެވެ. ނަމަވެސް އެފްއައިވީބީ އާއި ރައްޖޭގެ ވޮލީބޯޅަ އެސޯސިއޭޝަން (ވީއޭއެމް) އިން ކުރި މަސައްކަތުން ރާއްޖޭގެ އެއްވަނަ ޕެއާ ކުޑަކާއްޓެ އާއި އެޑަމްއަށް ގޭމްސް އިން ފުރުސަތު ލިބުނެވެ. މިއަހަރުގެ ކޮމަންވެލްތު ގޭމްސްއަކީ ރާއްޖެއިން ބީޗުވޮލީގައި ބައިވެރިވި ފުރަތަމަ ފަހަރެވެ.
