ކޮމަންވެލްތު ގޭމްސްގެ ބެޑްމިންޓަންގެ ފިިރިހެން ސިންގަލްސްއާއި ޑަބަލްސްގެ ގަދަ 16ގައި ވާދަކޮށް، ރާއްޖޭގެ މުހައްމަދު އަޖުފާން ރަޝީދާއި ނިބާލް އަހުމަދުއަށް ނާކާމިޔާބާ ކުރިމަތިލާން ޖެހިއްްޖެއެވެ.

ގޭމްސްގެ ފިރިހެން ސިންގަލްސްގެ ފުރަތަމަ ބުރާއި ދެވަނަ ބުރުގައި ވާދަކޮށް ނިބާލް ވަނީ މޮޅުވެފައެވެ. އެއީ ފުރަތަމަ ބުރުގައި ފޯކްލެންޑް އައިލެންޑުގެ ޑަގްލަސް ކްލާކްއާއި، ދެވަނަ ބުރުގައި ސިއެރަލިއޯންގެ އިބްރާހިމް އިޒާގޯ ކޮންޓޭއާ ވާދަކޮށެވެ. ނަމަވެސް ގަދަ 16ގައި ވާދަކޮށް ނިބާލް ވަނީ ބަލިވެފައެވެ. އެއީ ޖުމެއިކާގެ ސެމިއުލް ރިކެޓްސް އަތުންނެވެ. ނިބާލްގެ މައްޗަށް ސެމިއުލް ކުރިހޯދީ 21-09 އަދި 21-06ންނެވެ

ރާއްޖޭގެ އަޖުފާންވެސް ވަނީ ދެވަނަ ބުރުގައި މޮޅުވެފައެވެ. ދެވަނަ ބުރުގައި އަޖުފާން ވަނީ ގާނާގެ އަހުމަދު އަބްދުއްސަމަދުގެ މައްޗަށް ކުރިހޯދައި، ގަދަ 16ން ޖާގަހޯދާފައެވެ. ގަދަ 16ގައި އަޖުފާން ވާދަކުރީ މެލޭޝިއާގެ ޒީ ޔޮން އެންޖީއާއެވެ. އަޖުފާންގެ މައްޗަށް ޒީ ޔޮން ކުރިހޯދީ ސީދާ ދެ ސެޓުންނެވެ. އެއީ 21-07 އަދި 21-09ންނެވެ.

ގޭމްސްގެ ބެޑްމިންޓަން ފިރިހެން ޑަބަލްސްގެ ގަދަ 16ގައި ރާއްޖޭގެ އަޖުފާނާއި ނިބާލް ވަނީ ވާދަކޮށްފައެވެ. ރާއްޖޭގެ މި ޕެއަރ ނުކުތީ ސްރީލަންކާގެ ޑިއާޒް ސަޗިން އަދި ގޫނެތިލޭކާ ބުވަނޭކާގެ ޕެއަރއާ ދެކޮޅަށެވެ. ލަންކާގެ ޕެއަރއިން ރާއްޖޭގެ މައްޗަށް ކުރިހޯދީ 21-12 އަދި 21-08ންނެވެ.