ފަހު ވަގުތު އުރުގުއޭ އިން، އިންގްލެންޑާ އެއްވަރު ކޮށްފި

ބައިނަލްއަޤުވާމީ ރަޙުމަތްތެރި ކަމުގެ މެޗެއްގައި އިންގެލެންޑާ ދެކޮޅަށް ކުޅެ މެޗުގެ، ފަހު ވަގުތު އުރުގުއޭ އިން ލަނޑު ޖަހައި އެއްވަރު ކޮށްފި އެވެ.

ހުކުރު ދުވަހުގެ ރޭ ދަންވަރު ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި އިންގްލެންޑުން ލަނޑު ޖަހައި ކުރި ހޯދާފައި ވަނިކޮށް، އުރުގުއޭ އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގައި އިންގްލެންޑުން ވަނީ ލަނޑު ޖަހަން ފުރުސަތު ތަކެއް ހޯދައިފަ އެވެ. ނަމަވެސް، ފުރަތަމަ ހާފުގައި އެ ޓީމަށް އެއްވެސް ފުރުސަތެއް ބޭނުމެއް ނުކުރެވުނެވެ. މެޗުގެ ފަހު ދިހަ މިނެޓުގެ ތެރޭގައި އިންގްލެންޑުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ބެން ވައިޓް އެވެ. ނަމަވެސް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އުރުގުއޭ އަށް ލިބުނު ޕެނަލްޓީ ކާމިޔާބުކޮށް ފެޑެރިކޯ ވަލްވާޑޭ ވަނީ އެ ޓީމަށް ނަތީޖާ ހަމަހަމަ ކޮށްދީފަ އެވެ.

މިއީ މިއަހަރު އެމެރިކާ އާއި މެކްސިކޯ އަދި ކެނެޑާގައި އޮންނަ ފީފާ ވޯލްޑް ކަޕަށް ތައްޔާރުވުމުގެ ގޮތުން ކުޅުނު ރަޙުމަތްތެރި ކަމުގެ މެޗެކެވެ. މިއީ އިންގްލެންޑުގެ ކޯޗުކަމާ ތޯމަސް ޓުޗެލް ހަވާލުވި ފަހުން، މޮޅު ނުވެ އިންގްލެންޑުން ނިންމާލަން ޖެހުނު ދެ ވަނަ މެޗެވެ. ޓުޗެލްގެ އިރުޝާދުގެ ދަށުން އިންގްލެންޑުން މިހާތަނަށް 11 މެޗު ކުޅެފައިވާއިރު، ނުވަ މެޗުން ވަނީ މޮޅުވެފަ އެވެ. އެއް މެޗުން ބަލިވެ، އަނެއް މެޗުން ވަނީ އެއްވަރުވެފަ އެވެ.

އިންގްލެންޑުން މިއަހަރުގެ ވޯލްޑް ކަޕްގެ ޖާގަ ހޯދީ ކޮލިފިކޭޝަންގައި ކުޅުނު އަށް މެޗުން ވެސް މޮޅުވެގެންނެވެ.