ފީފާ ވޯލްޑް ކަޕް ކޮލިފިކޭޝަންގެ ދެކުނު އެމެރިކާ ސަރަހައްދުގައި ބްރެޒިލް އާއި އުރުގުއޭ ބައްދަލު ކުރި މެޗު އެއްވަރުވެއްޖެ އެވެ.

ބުދަ ދުވަހުގެ ހެނދުނު ބްރެޒިލް އާއި އުރުގުއޭ ބައްދަލު ކުރި މެޗު އެއްވަރުވީ 1-1ންނެވެ. މެޗުގައި އެންމެ ފުރަތަމަ ލަނޑު ޖަހައި ކުރި ހޯދީ އުރުގުއޭ އިންނެވެ. ނަމަވެސް ބްރެޒިލް އިން ވަނީ ފަހަތުން އަރައި ލަނޑު ޖަހައި ނަތީޖާ ހަމަހަމަ ކޮށްފަ އެވެ. ކޮލިފިކޭޝަންގައި އެންމެ ފަހުން ވެނަޒުއެލާއާ ދެކޮޅަށް ކުޅުނު މެޗުން ވެސް ބްރެޒިލް ވަނީ އެއްވަރުވެފަ އެވެ.

މެޗުގައި ދެ ޓީމުން ވެސް ލަނޑު ޖެހީ ދެ ވަނަ ހާފުގަ އެވެ. ފުރަތަމަ ހާފުގައި ދެ ޓީމުގެ ފަރާތުން ވެސް ދާދި ހަމަހަމަ ކުޅުމެއް ފެނުނުއިރު، ދެ ޓީމަށް ވެސް ލަނޑު ޖަހާނެ ފުރުސަތު ލިބިގެން ދިޔަ އެވެ. މެޗުގައި ފުރަތަމަ ހާފުގައި ބްރެޒިލަށް ލަނޑު ޖަހަން އެންމެ އެކަށީގެންވާ ފުރުސަތެއް ލިބުނީ ވިނީޝިއުސް ޖޫނިއާ އަށެވެ. އަނެއްކޮޅުން އުރުގުއޭގެ ޑާވިން ނޫޏޭޒް އަށް ވެސް ވަނީ ލަނޑު ޖަހާނެ ފުރުސަތު ލިބިފަ އެވެ.

މެޗުގެ ދެ ވަނަ ހާފު ފަށައިގެން ދިހަ ވަނަ މިނެޓުގައި އުރުގުއޭ އިން ވަނީ ލަނޑު ޖަހައި ލީޑު ނަގައިފަ އެވެ. މެކްސިމިލިއާނޯ އަރައުހޯ ތަނަވަސްކޮށްދިން ފުރުސަތެއްގައި އުރުގުއޭ އަށް ލީޑު ނަގައިދިނީ ފެޑެރިކޯ ވަލްވާޑޭ އެވެ. ނަމަވެސް އޭގެ ހަތް މިނެޓު ފަހުން ބްރެޒިލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ގާސަން އެވެ.

މި ނަތީޖާ އާއެކު ބްރެޒިލް އޮތީ ކޮލިފިކޭޝަންގެ ފަސް ވަނައިގަ އެވެ. މިހާތަނަށް ކުޅުނު 12 މެޗުން އެ ޓީމަށް ލިބެނީ 18 ޕޮއިންޓެވެ. ބްރެޒިލް އަތުން ހޯދި ޕޮއިންޓާ އެކު އުރުގުއޭ އޮތީ ދެ ވަނައިގަ އެވެ. އެއީ މިހާތަނަށް އެ ޓީމު ކުޅުނު 12 މެޗުން 20 ޕޮއިންޓު ހޯދައިގެންނެވެ.