ޤާސިމްގެ ހިތުގެ އޮޕަރޭޝަނެއް މާދަމާ ކުރަނީ

ރައްޔިތުންގެ މަޖިލީހުގެ މާމިނގިލީ ދާއިރާގެ މެންބަރު އަދި ޖުމްހޫރީ ޕާޓީގެ ލީޑަރ ޤާސިމް އިބްރާހީގެ ހިތުގެ އޮޕަރޭޝަނެއް ބުދަދުވަހު ކުރުމަށް ނިންމައިފިއެވެ.

ރާއްޖެ އެމްވީއަށް މައުލޫމާތު ދެއްވަމުން ޖުމްހޫރީ ޕާޓީގެ ސެކްރެޓަރީ ޖެނެރަލް އަހުމަދު ސަމީރު ވިދާޅުވީ ޤާސިމް އިބްރާހީމްގެ ހިތުގެ އޮޕަރޭޝަނެއް ބުދަދުވަހު ސިންގަޕޫރުގެ ނޮވެނާ އެމްޓީ އެލިޒަބަތު ހޮސްޕިޓަލްގައި ކުރުމަށް ހަމަޖެހިފައިވާ ކަމަށެވެ.

Advertisement

ސަމީރު ވިދާޅުވީ އެއޮޕަރޭޝަނަށްޓަކައި ސިންގަޕޫރު ގަޑިން ބުދަދުވަހުގެ ހެނދުނު 9 ޖަހާއިރު ޤާސިމް އެޑްމިޓް ކުރެއްވުމަށް ހަމަޖެހިފައިވާ ކަމަށާއި އޮޕަރޭޝަން ކުރުމަށް ހަމަޖެހިފައިވަނީ ހެނދުނު 11:30 ގައި ކަމަށެވެ.

ސަމީރު ވިދާޅުވީ ޑޮކްޓަރުން ލަފާކުރައްވާ ގޮތުގައި މިއޮޕަރޭޝަނަށް ގާތްގަނޑަކަށް ދޮޅުގަޑިއިރާއި ދެގަޑިއިރުގެ ވަގުތެއް ހޭދަވާނެ ކަމަށެވެ.

ޤާސިމްގެ އޮޕަރޭޝަން ބުދަދުވަހު ކުރެވޭއިރު ސަމީރު ވިދާޅުވީ އޮނަރަބްލް ޤާސިމް އިބްރާހީމްގެ އެ އޮޕަރޭޝަން ކާމިޔާބު ވުމަށާއި ސިއްޙީ ހާލުކޮޅު ވީހާވެސް އަވަހަށް ރަނގަޅުވުމަށް އެދި އެންމެހާ ދިވެހިރައްޔިތުންގެ ހެޔޮދުޢާއަށް ޖުމްހޫރީ ޕާޓީގެ ފަރާތުން އެދޭ ކަމަށެވެ.

ރާއްޖެ އިސްލާހް ކުރުމަށް ހިންގޭ ހަރަކާތާއި ގުޅިގެން ގުޅިފައިވާ ޕާޓީތަކުން މ ކުނޫޒްގައި ބޭއްވި ޖަލްސާއެއްގައި ދެއްކެވި ވާހަކަފުޅަކާ ގުޅިގެން ރިޝްވަތު ދޭން އުޅުއްވި ކަމަށް ކަނޑައަޅައި ޤާސިމް ވަނީ 3 އަހަރާއި 2 މަހާއި 12 ދުވަހަށް ޖަލަށް ލުމަށް ހުކުމް ކޮށްފައެވެ. ކްރިމިނަލް ކޯޓުން އެހުކުމް ކޮށްފައިވަނީ 24 ވަނަ ދުވަހު ކޯޓު ތެރެއަށް ޤާސިމް ވެއްޓިވަޑައިގަތުމާއި ގުޅިގެން ހޮސްޕިޓަލްގައި ފަރުވާދެމުން ގެންދަނިކޮށް އެރޭ ދަންވަރުއެވެ. ނަމަވެސް އެހުކުމުގައި ރާއްޖެއިން ބޭރަށް ފޮނުވައިގެން ފަރުވާދޭން ޖެހޭނެ ކަމަށް ބުނެފައިވެއެވެ.

ހުކުމުގައި އެހެން ބުނި ނަމަވެސް އެންމެ 10 ދުވަހަށް ޤާސިމް ސިންގަޕޫރަށް ފޮނުވާފައިވަނީ ހުކުމް ކުރިތާ އެތައް ދުވަހެއް ފަހުންނެވެ.

ޤާސިމް ބެއްލެވި ސިންގަޕޫރުގެ ހާޓް، ސްޓްރޯކް އެންޑް ކެންސާ ސެންޓަރުގެ ޑޮކްޓަރު އޭނާއަށް ދެއްވި ލިޔުމުގައި ވިދާޅުވެފައިވާ ގޮތުން ޤާސިމަށް ވަނީ ސީރިއަސް ސިއްހީ މައްސަލަތަކެއް ކުރިމަތިވެވަޑައިގެންފައެވެ. އެގޮތުން ޤާސިމްގެ ހިތަށް ލޭ ފޮނުވާ މައި ނާރުތައް މައްސަލަ ޖެހިފައިވާ ކަމަށާއި، ގާސިމަށް ކުރިމަތިވެފައި ވަނީ "ވެސަލް ކޮރޮނަރީ އާޓެރީ ޑިޒީސް" ކަމަށް ޑޮކްޓަރު ވިދާޅުވެފައިވެއެވެ. އަދި ޑޮކްޓަރުން ލަފާދެއްވާފައި ވަނީ ޓެސްޓުތަކަށް ފަހު ކުރިއަށް އޮތް ތިން މަހު އެ ޤައުމުގައި މަޑު ކުރެއްވުމަށެވެ.

އެކަމާ ގުޅިގެން އެލިޔުންތަކާއެކު މުއްދަތު އިތުރުކުރުމަށް ކަރެކްޝަނަށް އާއިލާއިން ހުށަހެޅުމުން މުއްދަތު އިތުރުކުރެވެން ނެތްކަމަށް ބުނެ ފަހުން ވަނީ އިތުރު 10 ދުވަސް ޤާސިމަށް ދީފައެވެ.