ފުރަތަމަ ފަހަރަށް މޮޓޯރޭސިންގެ ރޭހެއް އަންހެން ޑްރައިވަރަކު ކާމިޔާބުކޮށްފި

ފުރަތަމަ ފަހަރަށް އިންޑިވިޖުއަލް މޯޓޯރޭސިންގެ ރޭހެއް އަންހެން ޑްރައިވަރުކު ކާމިޔާބުކޮށްފިއެވެ.

މި ޝަރަފު ހޯދާފައިވަނީ ސްޕެއިންގެ ޒުވާން ޑްރައިވަރު އަނާ ކަރާސްކޯއެވެ. އުމުރުން 20 އަހަރުގެ ކަރާސްކޯވަނީ "އެފްއައިއެމް ސުޕާސްޕޯޓް 300" ވޯލްޑް ޗެމްޕިއަންޝިޕުގައި، ޕޯޗުގަލްގެ ގްރޭންޑް ޕްރީ ކާމިޔާބުކޮށްފައެވެ. އޭނާ މި ރޭސް ކާމިޔާބުކުރިއިރު މި ރޭހުގައި ދެން ވާދަކޮށްފައިވަނީ ހުސް ފިރިހެން ޑްރައިވަރުން ކަން ފާހަގަކޮށްލެވެއެވެ.

11 ލެޕުގެ މި ރޭސް ކަރާސްކޯ ކާމިޔާބުކުރުމާއެކު އޭނާ ވަނީ ޑްރައިވަރުންގެ ރޭންކިންގައި 11 ވަނައިން ހަތް ވަނައަށް ޖެހިލާފައެވެ. ރޭސް ކާމިޔަބުކުރުމަށް ފަހު ނޫސްވެރިންނާ ވާހަކަ ދައްކަމުން ކަރާސްކޯ ބުނެފައިވަނީ މި ނަތީޖާއާ މެދު ވަރަށް ހިތްހަމަޖެހޭ ކަމަށާއި މި ކާމިޔާބު އޭނާގެ ޓީމާއެކު ހިއްސާ ކުރަން ބޭނުންވާ ކަމަށެވެ. އަދި މި ކާމިޔާބުން ދައްކުވައިދެނީ އޭނާގެ ކެރިއަރު ފެށިގެން މިހާތަނަށް ކުރެވުނު ބުރަ މަސައްކަތުގެ ނަތީޖާ ކަމަށެވެ. އަދި މި ނަތީޖާއަކީ ކޮންމެ ރޭހަކަށް ފަހު ވެސް އޭނާގެ ފަރާތުން ކުރިއެރުން ފެންނަމުންދާ ކަމުގެ ހެއްކެއް ކަމަށް އޭނާ ބުންޏެވެ.

އުމުރުން އެންމެ 3 އަހަރުގައި ރޭސް ޖަހަން ފެށި ކަރާސްކޯ ދުނިޔޭގެ ފެންވަރުގެ މުބާރާތެއްގައި އެންމެ ފުރަތަމަ ބައިވެރިވެފައިވަނީ އުމުރުން 16 އަހަރުގައެވެ. އެގޮތުން 2013 ވަނަ އަހަރު އޭނާވަނީ "މޮޓޯ 3" ގައި 2001 ވަނަ އަހަރުގެ ފަހުން ޑްރައިވަރުންގެ ޗެމްޕިއަންޝިޕްގައި ޕޮއިންޓް ހޯދި ހަމައެކަނި އަންހެން ޑްރައިވަރުގެ މަގާމު ހޯދާފައެވެ.