މާލޭ ލީގު: ޓީސީ ބަލިކޮށް ހަ ޕޮއިންޓްގެ ލީޑަކާއެކު މާޒިޔާ ފުރަތަމަ ބުރު ނިންމާލައިފި

މާލޭ ލީގުގައި ޓީސީ ސްޕޯޓްސް ކްލަބް ބަލިކޮށް، ހަ ޕޮއިންޓްގެ ލީޑަކާއެކު މާޒިޔާ ސްޕޯޓްސް އެންޑް ރިކްރިއޭޝަނުން ލީގުގެ ފުރަތަމަ ބުރު ނިންމާލައިފި އެވެ.

ހުކުރު ދުވަހުގެ ރޭ ކުޅުނު މެޗު މާޒިޔާއާ ވާދަކޮށް ޓީސީން މެޗު ކާމިޔާބުކުރީ 0-3 ގެ ތަފާތުބޮޑު ނަތީޖާއަކުންނެވެ.

ގަލޮޅު ރަސްމީ ދަނޑުގައި ކުޅުނު މި މެޗު ފެށިގެން ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންގޮސްފައިވާއިރު، ލަނޑު ޖަހަން ދެޓީމުންވެސް ދިޔައީ ފުރުސަތުތައް ތަނަވަސްކުރަމުންނެވެ.

އެގޮތުން 15 ވަނަ މިނެޓުގައި ޓީސީގެ ސްޓެވާޓް ނަގައިދިން ހުރަހަކުން އިބްރާހިމް މަހުދީ (އިއްބެ) ފޮނުވާލި ބާރު ހަމަލާ މާޒިޔާގެ ކީޕަރު ދިފާއުކޮށްފައިވާއިރު، 17 ވަނަ މިނެޓުގައި މާޒިޔާގެ ކުޑޯސް ޕެނަލްޓީ އޭރިޔާ ބޭރުން ފޮނުވާލި ބާރު ހަމަލާ ޓީސީގެ ކީޕަރު ކިރަން ވަނީ މަތަކޮށްފައެވެ.

މާޒިޔާ އިން މެޗުގެ ލީޑު ނެގީ 21 ވަނަ މިނެޓުގައި މުހައްމަދު އުމެއިރުގެ ލަނޑުންނެވެ. މި ލަނޑު އޭނާ ކާމިޔާބުކުރީ ރަކިޗް ދިން ޕާހަކުންނެވެ. މީގެއިތުރުންވެސް މާޒިޔާ އަށް ވަނީ ލީޑު ފުޅާކުރަން ފުރުސަތުތަކެއް ލިބި ބޭކާރުވެފައެވެ.

އެގޮތުން 23 ވަނަ މިނެޓުގައި ރަކިޗް ފޮނުވާލި ހަމަލާ އަދި 39 ވަނަ މިނެޓުގައި އަސްހަދު އަލީ (އަޑުބަރޭ) ފޮނުވާލި ހަމަލާ ހިމެނެއެވެ.

ފުރަތަމަ ހާފް ނިމުނީ މާޒިޔާގެ މޮޅު ކުޅުމާއެކު 0-1 ގެ ނަތީޖާއިން ޓީސީގެ މައްޗަށް އެޓީމު ކުރީގައި އޮވެގެންނެވެ.

ދެވަނަ ހާފް ފެށިގެން ޓީސީން އެޓީމުގެ ކުޅުން ރަނގަޅުކުރިއިރު، ލަނޑު ޖަހަންވެސް އެޓީމުން ފުރުސަތުތައް ތަނަވަސްކުރި އެވެ. އެހެންނަމަވެސް 64 ވަނަ މިނެޓުގައި އަސަދުﷲ އަބްދުﷲ ވަނީ އެޓީމަށް ލީޑު ފުޅާކޮށްދީފައެވެ.

މި ލަނޑާއެކު ޓީސީން ކުޅެމުންދިޔައީ ވަރަށް ބޮޑަށް ކުރިޔަށް ޖެހިގެންނެވެ. އެގޮތުން މާޒިޔާ އިން ކުރަމުންދިޔަ އެޓޭކްތައް ގިނަވެސް ޓީސީގެ ހާފަށް ބާރުބޮޑުވިއެވެ. މާޒިޔާއިން މެޗުގައި ކާމިޔާބުކުރި ތިންވަނަ ލަނޑު 88 ވަނަ މިނެޓުގައި ޖެހީވެސް އަސަދުﷲ އެވެ. މެޗުގެ މޮޅު ކުޅުންތެރިޔަކަށް އަސަދުﷲ ހޮވުނުއިރު، އޭނާ ވަނީ މި ސީޒަނުގައި މިހާތަނަށް 11 ލަނޑު ކާމިޔާބޮށްފައެވެ.

މި ނަތީޖާއާއެކު މާޒިޔާ ވަނީ ކުޅުނު ހަތް މެޗުން 21 ޕޮއިންޓް ހަމަކޮށް، ޕޮއިންޓް ތާވަލުގެ އެއްވަނައިގައި ހަ ޕޮއިންޓްގެ ލީޑެއް ނަގާފައެވެ. މެޗުން ބަލިވި ޓީސީ އޮތީ ކުޅުނު ހަތް މެޗުން ލިބުނު 10 ޕޮއިންޓާއެކު ޕޮއިންޓް ތާވަލުގެ ފަސްވަނައިގަ އެވެ.