ތުރުކީވިލާތަށް އީދު ވަނީ ހުކުރު ދުވަސް ސިންގަޕޫރުން އީދު ދުވަހަކީ ހޮނިހިރު ދުވަސް ކަމަށް ބުނެފި
ފަލަކީ ހިސާބުތަކަށް ބަލައި ތުރުކީވިލާތުން މިއަހަރުގެ ފިޠުރުޢީދު ދުވަހަކީ މާރިޗު 20 ވާ ހުކުރު ދުވަސް ކަމަށް ކަނޑައަޅާފައިވާއިރު، ސިންގަޕޫރުން ވަނީ އެ ދުވަހަކީ މާރިޗު 21 ވާ ހޮނިހިރު ދުވަސް ކަމަށް އިޢުލާނުކޮށްފައި. ތުރުކީން މިގޮތަށް ނިންމީ ބުރާސްފަތި ދުވަހު ހަނދު ފެންނާނެ ކަމަށް ލަފާކުރެވޭތީ ކަމަށްވިޔަސް، ސިންގަޕޫރުން ބުނެފައިވަނީ އެ ދުވަހު އެ ޤައުމަށް ހަނދު ފެނުމަކީ ފަލަކީ ގޮތުން މުސްތަޙީލު ކަމެއް ކަމަށް.
މިއަހަރުގެ ފިޠުރުޢީދު ދުވަހަކީ މާރިޗު މަހުގެ 20 ވާ ހުކުރު ދުވަސް ކަމަށް ތުރުކީވިލާތުން ވަނީ ކަނޑައަޅާފައި. | ސައުދީ ގެޒެޓް
ފަލަކީ ހިސާބުތަކަށް ބަލައި، ތުރުކީވިލާތާއި ސިންގަޕޫރުން މިއަހަރުގެ ފިޠުރުޢީދު ދުވަސް ރަސްމީކޮށް އިޢުލާނުކޮށްފިއެވެ. މި ދެ ޤައުމަކީވެސް ހަނދު ބެލުމުގެ ސުންނަތުގެ ބަދަލުގައި، ކަލަންޑަރު ކަނޑައެޅުމުގައި ސައިންޓިފިކް ފަލަކީ ހިސާބުތަކަށް ބަރޯސާވާ ދެ ޤައުމެވެ.
ތުރުކީވިލާތުން ކަނޑައަޅާފައިވާ ގޮތުގައި މިއަހަރުގެ ފިޠުރުޢީދު ދުވަހަކީ މާރިޗު މަހުގެ 20 ވާ ހުކުރު ދުވަހެވެ. އެ ޤައުމުން މިގޮތަށް ނިންމީ، ބުރާސްފަތި ދުވަހު ތުރުކީވިލާތުގެ ސަރަޙައްދުތަކަށާއި ދުނިޔޭގެ އެހެން ބައެއް ސަރަޙައްދުތަކަށް ޝައްވާލު މަހުގެ ހަނދު ފެންނާނެ ކަމަށް ފަލަކީ ހިސާބުތަކުން ދައްކާތީއެވެ.
ނަމަވެސް، ސިންގަޕޫރުން ނިންމާފައިވަނީ މިއަހަރުގެ ފިޠުރުޢީދު ދުވަހަކީ މާރިޗު މަހުގެ 21 ވާ ހޮނިހިރު ދުވަސް ކަމަށެވެ. ސިންގަޕޫރުން މިގޮތަށް އިޢުލާނުކުރީ، ބުރާސްފަތި ދުވަހުގެ އިރުއޮއްސޭ ވަގުތު އެ ޤައުމަށް ހަނދު ފެނުމަކީ ފަލަކީ ގޮތުން މުސްތަޙީލު ކަމަކަށް ވާތީއެވެ.
