"ރައީސް އޮފީސް، ޕޭ ކޮމިޝަން، މި ހުރިހާ ތަނަކަށް ދެވިއްޖެ، ދެން ނުދެވި އޮތީ އަޅުގަނޑުމެން ގަބުރުތައް މި ގެންދާ ތަން"
އިހުތިޖާޖުގެ ބައިވެރިން ކިޔައިދިން ގޮތުގައި ޕޭ ފްރޭމްވޯކަށް ގެނައި ބަދަލާއެކު އަސާސީ މުސާރަ ބޮޑުކުރި ނަމަވެސް މީގެ ކުރިން ލިބެމުން އައި އެލަވަންސްތައް ވަނީ ކަނޑާލާފައި، އެގޮތުން ކުރިން ލިބެމުން އައި 10 ވަރަކަށް އެލަވަންސް ވަނީ ކަނޑާލާފައި.
ޖަމާއަތްތެރިންގެ މުސާރަ އެތައް ގުނައެއް ކުޑަވެފައިވާތީ ކުރިއަށް ގެންދިޔަ އިހުތިޖާޖު | ރާއްޖެ އެމްވީ
"ރައީސް އޮފީސް، ޕޭ ކޮމިޝަން، މި ހުރިހާ ތަނަކަށް ދެވިއްޖެ، ދެން ނުދެވި އޮތީ އަޅުގަނޑުމެން ގަބުރުތައް މި ގެންދާ ތަން" މިއީ ބުދަ ދުވަހު މާލޭގެ އާ އާސަހަރާ ކުރިމަތީގައި ހިމޭން އިހުތިޖާޖެއް ކުރަން ތިބި ޖަމާއަތްތެރިންގެ ތެރެއިން މީހަކު ރާއްޖެޓީވީއާ ވާހަކަ ދައްކަމުން ބުނި ބަހެކެވެ. ރޯދަ މަހު މެންދުރުގެ ގަދަ އަވީގައި ނުކުމެ އެ ތިބީ ޙައްޤު ހޯދަން ދައުލަތުގެ އެކިއެކި މުއައްސަސާތަކަށް ގޮސްގެން ކުރި މަސައްކަތުން ވެސް އެއްވެސް ނަތީޖާއެއް ނުނިކުންނާތީ ގޮތް ހުސްވެގެންނެވެ. އާދޭހާއެކު އެދެމުން ދިޔައީ ޖަމާއަތްތެރިންގެ ޙައްޤުތައް ހޯދައިދިނުމަށެވެ. އެންމެ ކުޑަމިނުން އެމީހުންނަށް ޙައްޤުވާ މުސާރަ ދިނުމަށެވެ.
ދައުލަތުގެ ޕޭ ފްރޭމްވޯކަށް ގެނައި ބަދަލާއެކު އެކި އިދާރާތަކުގެ މުސާރަ ބޮޑުކޮށްފައިވާއިރު، އެ ބަދަލާއެކު ޖަމާއަތްތެރިންގެ މުސާރަ އެތައް ގުނައެއް ކުޑަވެފައިވާތީ ކުރިއަށް ގެންދިޔަ މި އިހުތިޖާޖާއެކު ހާމަވެގެން ދިޔައީ މުސާރަ ބޮޑުކުރުމުގެ ފަހަތުގައިވާ އޮޅުވާލުންތަކެވެ.
މި އިހުތިޖާޖު ކުރިއަށް ގެންގޮސްފައިވަނީ ބުދަ ދުވަހު މައްޗަންގޯޅީ އާސަހަރާ ކުރިމަތީގައެވެ. އެގޮތުން އިހުތިޖާޖުގެ ބައިވެރިން ވަނީ ތަފާތު އެކި ޝުއޫރުތައް ލިޔެފައި ހުރި ބޯޑުތައް ހިފައިގެން އިހުތިޖާޖުކޮށްފައެވެ.
ރާއްޖެއެމްވީއާ ވާހަކަ ދައްކަމުން އިޖުތިޖާޖުގެ ބައިވެރިން ކިޔާދިން ގޮތުގައި ޕޭ ފްރޭމްވޯކަށް ގެނައި ބަދަލާއެކު އަސާސީ މުސާރަ ބޮޑުކުރިނަމަ ވެސް މީގެ ކުރިން ލިބެމުން އައި އެލަވަންސްތައް ވަނީ ކަނޑާލާފައެވެ. އެގޮތުން އިތުރު ގަޑީގެ އެލަވަންސް، ދީނީ އެލަވަންސް، ރިސްކް އެލަވަންސް ހިމެނޭގޮތަށް ގާތްގަނޑަކަށް ކުރިން ލިބެމުން އައި 10 ވަރަކަށް އެލަވަންސް ވަނީ ކަނޑާލާފައެވެ. މިއީ މުސާރަ ބޮޑުކުރުންކަމަށް ބުނެ ނިންމާލެވޭނަމަ، ކުރިން ލިބެމުން ދައި މުސާރަ އެގޮތުގައި ބޭއްވުން ވެސް މާ ރަނގަޅުކަމަށް އިހުތިޖާޖުގެ ބައިވެރިން ފާހަގަ ކުރެ އެވެ.
މީގެ އިތުރުން، ބަންދު ދުވަސްތަކުގައިވެސް މަސައްކަތަށް ނުކުންނަންޖެހޭއިރު، އެ ދުވަސްތަކަށްވެސް އެއްވެސް އިތުރު ފައިސާއެއް ނުލިބޭކަން އެ ފަރާތްތަކުން އަސަރާއެކު ކިޔާދިނެވެ.
ކަންމިހެން ހުރިނަމަވެސް، ސަރުކާރުން ނަގާފައިވާ ކޮންޓްރެކްޓު މުވައްޒަފުންނަށް ބަރާބަރަށް މުސާރަ ލިބޭ ކަމަށާއި، އެއް މަސައްކަތެއް ކޮށް، އެއް ގިންތިއެއްގައި އަދާކުރާ ވަޒީފާއެއްގައި އެ ފަރާތްތަކުގެ މުސާރަ އެތައް ގުނަ ބޮޑުކަމަށްވެސް އިހުތިޖާޖުގެ ބައިވެރިން ކިޔާދިނެވެ. އަދި މިއީ ކޮން ކަހަލަ އިންސާފެއްތޯ ސުވާލު ކޮށްފައިވެއެވެ.
ޖަމާއަތްތެރިން ކިޔައިދިން ގޮތުގައި ރައީސުލްޖުމްހޫރިއްޔާއާ ވެސް އެ ކަންބޮޑުވުންތައް ހިއްސާކޮށްފައިވެއެވެ. އަދި ރައީސް އޮފީހާއި، ޕޭކޮމިޝަނުގެ އިތުރުން، ފަސްޓްލޭޑީ ސާޖިދާ މުޙައްމަދާވެސް އެ ކަންބޮޑުވުން ހިއްސާ ކޮށްފައިވާނެކަމަށް ކިޔައިދިނެވެ. މުޅިންވެސް ލިބެމުންދިޔައީ އެކަންކަން "ވަރަށް ގާތުން" ބަލަމުންދާ ކަމަށެވެ. އެހެންނަމަވެސް މިއަދާ ހަމައަށްވެސް އެކަންކަމަށް ޙައްލު ނުލިބޭތީ އެކަމުގެ ކަންބޮޑުވުން މި އިހުތިޖާޖުގައި ފާޅުކޮށްފައިވެއެވެ.
ހިނަވަން ގެނެވޭ މީހުންގެ ތެރޭގައި ތަފާތު އެކިކަހަލަ ބަލިތައް ތަހައްމަލުކޮށްފައިވާ މީހުންނާއި، ގޮތްނޭނގޭ އެކި ބަލިތަކުގައި މަރުވެފައިވާ މީހުންގެ ހަށިގަނޑުތައްވެސް ހިމެނެއެވެ. މީގެ ކުރިން އެ މަސައްކަތަށް ރިސްކް އެލަވަންސް ދެމުން ގެންދިޔައީވެސް އެ ސަބަބާހުރެއެވެ. ނަމަވެސް ބޮޑުކުރި މުސާރައާއެކު ރިސްކް އެލަވަންސަށްވެސް ވީނުވީއެއް ނޭނގެއެވެ. މިއީ މުސާރަ ބޮޑު ކުރުމުގެ ނަމުގައި އޮޅުވާލުމާއި މަކަރު ހެދުން ނޫން ކޮން ކަމެއްތޯއެވެ؟
