ސަރުކާރުގެ ތިން ސިޔާސަތެއް ތަންފީޒު ވެގެންދާއިރު، އެކަމުގެ ފައިދާ ހުރިހާ ދިވެހިންނަށް ކުރާނެ: ރައީސް މުއިއްޒު
ދުންފަތުގެ ޖެނެރޭޝަނަލް ބޭން، ކަށި މިޔަރު ބޭނުމުގެ ހުއްދަ އަދި ސިވިލް މުވައްޒަފުންގެ މުސާރަ ވަނީ ބޮޑު ކޮށްފައި
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
މި ސަރުކާރުގެ ތިން ސިޔާސަތެއް ތަންފީޒު ވެގެންދާއިރު، އެކަމުގެ ފައިދާ ހުރިހާ ދިވެހި ރައްޔިތުންނަށް ކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ހޮނިހިރު ދުވަހު އެކްސްގައި ރައީސް މުއިއްޒު ކުރެއްވި ޕޯސްޓެއްގައި ވިދާޅުވީ 01 ނޮވެމްބަރު 2025 ގައި 3 ކަމެއް ތަންފީޒު ކުރަން ފެށިފައިވާ ކަމަށެވެ.
އެއީ 01 ޖެނުއަރީ 2007 އަކުން ފެށިގެން އުފަންވެފައިވާ އަދި އުފަންވާނޭ ހުރިހާ ދިވެހި ރައްޔިތުންނަށް ދުންފަތުގެ ޖެނެރޭޝަނަލް ބޭން ތަންފީޒު ކުރުމާއި، ކަށި މިޔަރު ބޭނުމުގެ ހުއްދަ މެނޭޖްމަންޓް ޕްލޭނެއްގެ ދަށުން ހުއްދަ ކުރުމާއި، އަދި ކައުންސިލްތަކުގެ މުވައްޒަފުން ހިމެނޭހެން ސިވިލް ސާރވިސް ގެ ހުރިހާ މުވައްޒަފުންނާއި ޖުޑިޝަރީގެ މުވައްޒަފުންގެ ޕޭ ހާމަނައިޒް ކުރެވި މުސާރަ ބޮޑު ކޮށްފައިވާ ކަމަށް ރައީސް މުއިއްޒު ވިދާޅުވި އެވެ.
މީގެ އިތުރުން ރައީސް މުއިއްޒު ޕޯސްޓުގައި ވަނީ ސަރުކާރުގެ މި ތިން ކަންތައް ހަގީގަތަކަށް ހެދުމުގައި މަސައްކަތް ކޮށްދެއްވާ، އެއްބާރުލުން ދެއްވި ހުރިހާ ފަރާތްތަކަށް ޝުކުރު އަދާ ކުރައްވާފަ އެވެ.
މިއީ ހުރިހާ ދިވެހި ރައްޔިތުންނަށް ފައިދާ ކުރާނެ ކަމެއްކަން ފާހަގަ ކުރައްވައި ހުރިހާ ދިވެހީންނަށް ރައީސް މުއިއްޒު ވަނީ މަރުހަބާ ދަންނަވާފަ އެވެ.
ރައީސް މުއިއްޒު މިމޭރުމުން ވާހަކަފުޅު ދެއްކެވި ނަމަވެސް މި ސަރުކާރުން ގެނެސްފައިވާ ދުންފަތުގެ ސިޔާސަތާ ގުޅިގެން ދުންފަތުގެ ވަގު ވިޔަފާރި އެއް އުފެދިފައިވާ ރައްޔިތުން މަޖިލީހުގެ މެންބަރުންގެ އިތުރުން ގިނަ އާއްމުން ދަނީ ބުނަމުންނެވެ. އަދި ދުންފަތުގެ ޖެނެރޭޝަނަލް ބޭން ކުރުމުގެ ސިޔާސަތު ރަނގަޅު ނަމަވެސް މިކަން ތަންފީޒު ކުރެވޭނެ ކަމާމެދު ވެސް ގިނަ ބަޔަކު ދަނީ ސުވާލު އުފައްދަމުންނެވެ. އެއީ ރާއްޖޭ ގައި ގިނަ ގަވާއިދުތަކާއި، ގާނޫނުތައް ހެދިފައި އޮތް ނަމަވެސް އެ ގާނޫނު ތައް ތަންފީޒެއް ނުކުރެވެ އެވެ. އަދި އާއްމުން އެއްވެ އުޅޭ ތަންތަނުގައި ދުންފަތުގެ އިސްތިއުމާލު ކުރުން މަނާ ނަމަވެސް މިހާރު ވެސް ވަރަށް ފާޅުގައި އެކަން ކުރަމުންދާކަން ފާހަގަކުރެވެ އެވެ.
ކައުންސިލްތަކުގެ މުވައްޒަފުން ހިމެނޭހެން ސިވިލް ސާރވިސް ގެ ހުރިހާ މުވައްޒަފުންނާއި ޖުޑިޝަރީގެ މުވައްޒަފުންގެ ޕޭ ހާމަނައިޒް ކުރެވި މުސާރަ ބޮޑު ކޮށްފައިވާ ކަމަށް ރައީސް މުއިއްޒު ވިދާޅުވެފައިވާއިރު، ތަކެތީގެ އަގުބޮޑުވުމާއި، ޑޮލަރުގެ ރޭޓް މަތިވުމާ ގުޅިގެން ލިބޭ މުސާރަ އިން ދެކޮޅު ނުޖެހޭ ކަމަށް ގިނަ މުވައްޒަފުން ދަނީ ބުނަމުންނެވެ. އަދި މުސާރަ އަށް މި ގެނައި ބަދަލާ ގުޅިގެން ތަކެތީގެ އަގު ބޮޑުވާނެ ކަމަށް ވެސް ތަޖުރިބާކާރުން ދަނީ ބުނަމުންނެވެ.
މި ސަރުކާރުން ދައުލަތުގެ ޕޭ ފްރޭމްވޯކުގެ މިންގަނޑުތައް އިސްލާހު ކޮށްފައިވަނީ ރަސްމީ ބަންދު ނޫން ދުވަސްތަކުގެ މަސައްކަތު ވަގުތުގައި މުވައްޒަފުންގެ އަމިއްލަ ކަންކަމުގައި އޮފީހުން ބޭރުގައި އުޅޭ ވަގުތު އުނިކުރުމަށްފަހު އަށް ގަޑިއިރު ހަމަވުމުން ނޫނީ އިތުރުގަޑީގެ އިނާޔަތް ނުލިބޭ ގޮތަށެވެ.
މީގެ އިތުރުން ކަށި މިޔަރު ބޭނުމުގެ ހުއްދަ މެނޭޖްމަންޓް ޕްލޭނެއް ހުއްދަ ކޮށްފައިވަނީ ކަށި މިޔަރުގެ މަސްވެރިކަމާ ރައްޔިތުން ދެކޮޅު ކަން ގައުމީ ސަރވޭއަކުން ދައްކާފައި ވަނިކޮށެވެ. ރާއްޖޭގައި 2010 ވަނަ އަހަރު ހުރިހާ ބާވަތެއްގެ މިޔަރު މަސްވެރިކަމެއް މުޅިން މަނާކުރި އެވެ. އަދި މިޔަރު މަސްވެރިކަން އަލުން ފަށައިފިނަމަ، މިޔަރު ސެންކްޗުއަރީ އެއްގެ ލަގަބު ރާއްޖެ އަށް ގެއްލިގެންދާނެ އެވެ. މި މައްސަލައިގައި ތިމާވެށި ރައްކާތެރި ކުރުމަށް މަސައްކަތްކުރާ ޖަމްއިއްޔާތަކުން ފާޅުކުރާ ކަންބޮޑުވުންތަކުގެ އިތުރުން، ރާއްޖޭގެ ފަތުރުވެރިކަމުގެ ސިނާއަތަށް މިކަމުން ކޮށްފާނެ އަސަރާ ދޭތެރޭގައި ވެސް ވިސްނާލަން ޖެހޭ ކަމަށް ތަޖުރިބާކާރުން ބުނެ އެވެ.
