ރައީސް މުއިއްޒަށް 11 މަސް، ރައްޔިތުންނަށް އެންމެ މަހެއް؟
29 ސެޕްޓެމްބަރު 2025 | ހޯމަ 06:29ގައުމުގެ ހުރިހާ ކަމެއް ގޯހުން ގޯހަށް ހިނގަމުންދާކަން އެންމެނަށް ވެސް އެނގޭއިރު، އެމްޑީޕީ އިސްވެ އޮވެ އަންނަ މަހު 3ގައި ބާއްވާ މި އެއްވުމަށް އެއްވެސް ޕާޓީއެއްގައި މަސައްކަތް ނުކުރާ އެތައް ބަޔަކު ގައުމާއި، އަމިއްލަ ހައްގުގައި ވެސް ސަރުކާރާ ދެކޮޅަށް އެއްވާނެ ކަމަށް ބެލެވެއެވެ. އަދި އެކަން ސަރުކާރަށް ވެސް ގަބޫލުކުރެވޭތީއާއެކު، މުސާރަކޮށް ބޮޑު ކޮށްދޭނެ ތާރީޚު އިއުލާން ކުރުމަށްފަހު، އަހަރަކަށްވުރެ ގިނަ ދުވަހު ހިފަހައްޓައިގެން އުޅުނު ގެދޮރުވެރިޔާގެ ފްލެޓުތަކުގެ ތަޅުދަނޑި މިމަހުގެ 28 ވަނަ ދުވަހު ހަވާލުކުރަން ވަނީ ފަށާފައެވެ. އަދި ޒުވާނުން ބާރުވެރިކުރުވައި، ކްރިއޭޓަރުންނާއި ފިލްމު ޕްރޮޑިއުސަރުންނަށް އަމާޒުކޮށްގެން ލޯނަށް އެދުމުގެ ފުރުސަތު ވެސް މިމަހުގެ 28 ގައި އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން ވަނީ ހުޅުވާލާފައެވެ.
ރައީސް ޑރ މުހައްމަދު މުއިއްޒު: މީޑިއާ އަޅުވެތިކޮށް، ރައްޔިތުންގެ ހައްގުތައް ދަނީ ނިގުޅައި ގަންނަމުން
ޕޭ ހާމަނައިޒޭޝަން ގެ ތެރެއިން މިހާތަނަށް މުސާރަ ބޮޑުވެފައިނުވާ ސިވިލް ސާރވިސް ހުރިހާ މުވައްޒަފުންނާއި، ޖުޑިޝަރީގެ ހުރިހާ މުވައްޒަފުން އަދި ކައުންސިލްތަކުގެ ހުރިހާ މުވައްޒަފުންގެ މުސާރަ މިއަހަރު ނޮވެމްބަރު 1 ގައި ހާމަނައިޒް ކުރެވި، މުސާރަ ބޮޑުވެގެންދާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރެއްވި އިއުލާނާއެކު ގިނަ ބަޔަކު އުފާވާނެ ކަމާމެދު ޝައްކަތްނެތެވެ.
ދިރިއުޅުމުގެ ހާލަތަށް އައިސްފައިވާ ބަދަލާއެކު، ތަކެތީ އަގު އިންތިހާއަށް މަތިވުމުގެ ނަތީޖާއެއް ގޮތުން މިއަދު ސިވިލް ސަރވިސް ވަޒީފާއެއްގައި އުޅޭ މުވައްޒަފަކަށް ލިބޭ މުސާރައިން ދެކޮޅެއް ނުޖެއްސެއެވެ. މިޝަކުވާ ކުރަމުންދާތާ އެތައް ދުވަހެއްފަހުން އަންނަ ނޮވެންބަރު މަހު މިކަމަށް ހައްލެއް އަންނާނެކަން އެނގުމާއެކު އެކަމުގެ ހިތްހަމަޖެހުން ލިބޭނެއެވެ.
ނަމަވެސް ޕޭ ހާމަނައިޒޭޝަން ގެ ތެރެއިން މިހާތަނަށް މުސާރަ ބޮޑުވެފައިނުވާ ސިވިލް ސާރވިސް ހުރިހާ މުވައްޒަފުންނާއި، ޖުޑިޝަރީގެ ހުރިހާ މުވައްޒަފުން އަދި ކައުންސިލްތަކުގެ ހުރިހާ މުވައްޒަފުންގެ މުސާރަ ނޮވެންބަރު މަހުގެ ތެރޭގައި ބޮޑުކުރާނެކަން ރައީސް މުއިއްޒު އިއުލާން މިކުރެއްވީ މިކަމުގައި ސަރުކާރުގެ ހެޔޮ ނިޔަތެއް އޮވެގެންތޯ ސުވާލު އުފެދެއެވެ.
އުސޫލެއް ގޮތުން މި އެންމެންގެ މުސާރަ މިއަހަރުގެ ޖެނުއަރީ މަހުން ފެށިގެން ބޮޑުވާން ޖެހެއެވެ.
ހުދު، ރައީސް މުއިއްޒު ވެސް ވިދާޅުވެފައިވެއެވެ. މި އަހަރުގެ ރިޔާސީ ބަޔާނުގައި މި ފަރާތްތަކުގެ މުސާރަ މިއަހަރު ބޮޑުވެގެންދާނެ ކަމަށް ދަންނަވާފައިވާ ކަމާއި، އަދި ކުރިންވެސް ދަންނަވާފައިވާ ފަދައިން، މިއަހަރު މުސާރަ ބޮޑު ނުވާ ހުރިހާ މުއައްސަސާތަކެއްގެ ހުރިހާ މުވައްޒަފުންގެ މުސާރަ 2026 ގައި ބޮޑުވެގެންދާނެ ކަމަށެވެ.
2025 ވަނަ އަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން މުސާރަ ބޮޑުވާން ޖެހޭއިރު، މުސާރަ ބޮޑުވެގެން މިދަނީ 11 މަސް ފަހުންނެވެ. އެހެންކަމުން މިދިޔަ މަސްތަކުގެ އެ މުވައްޒަފުންގެ ހައްގު މިއަދު ކޮބައިތޯއެވެ. އަހަރު ނިމެން އެންމެ މަހަކަށް ކުރުވުމުން މުސާރަ ބޮޑު ކޮށްދިނުމަށްފަހު، 2025 ވަނަ އަހަރު މުސާރަ ބޮޑު ކޮށްދިނޭ ބުނެވިދާނެތޯއެވެ. ރައީސް މުއިއްޒާއި، ސަރުކާރަށް 11 މަސް އަދި ރައްޔިތުންނަށް 1 މަސްނުންތޯއެވެ.
ކަންމިހެން އޮތްއިރު، އޮކްޓޫބަރުގެ މަހުގެ 3 ވަނަ ދުވަހަށް އިދިކޮޅު ޕާޓީ އެމްޑީޕީ އިން ދަނީ ސަރުކާރު ޖަވާބުދާރީ ކުރުމަށް ބޮޑު މުޒާހަރާއެއް ބޭއްވުމަށް ތައްޔާރުވަމުންނެވެ. މި މުޒާހަރާއަކީ ހަމައެކަނި ސިޔާސީ އެއްވުމެއް ނޫން ކަމާއި، މިސަރުކާރުގައި ރައްޔިތުންނަށް ޖައްސަމުންދާ ދަތިހާލަތާއި، އަދި ރައްޔިތުންގެ ހައްގުތައް ގާނޫނުން ނިގުޅައިގަންނަމުންދާތީ ބާއްވާ އެއްވުމެއް ކަމަށް ގިނަ ބަޔަކު ބުނެއެވެ.
ގައުމުގެ ހުރިހާ ކަމެއް ގޯހުން ގޯހަށް ހިނގަމުންދާކަން އެންމެނަށް ވެސް އެނގޭއިރު، އެމްޑީޕީ އިސްވެ އޮވެ އަންނަ މަހު 3ގައި ބާއްވާ މި އެއްވުމަށް އެއްވެސް ޕާޓީއެއްގައި މަސައްކަތް ނުކުރާ އެތައް ބަޔަކު ގައުމާއި، އަމިއްލަ ހައްގުގައި ވެސް ސަރުކާރާ ދެކޮޅަށް އެއްވާނެ ކަމަށް ބެލެވެއެވެ. އަދި އެކަން ސަރުކާރަށް ވެސް ގަބޫލުކުރެވޭތީއާއެކު، މުސާރަކޮށް ބޮޑު ކޮށްދޭނެ ތާރީޚު އިއުލާން ކުރުމަށްފަހު، އަހަރަކަށްވުރެ ގިނަ ދުވަހު ހިފަހައްޓައިގެން އުޅުނު ގެދޮރުވެރިޔާގެ ފްލެޓުތަކުގެ ތަޅުދަނޑި މިމަހުގެ 28 ވަނަ ދުވަހު ހަވާލުކުރަން ވަނީ ފަށާފައެވެ. އަދި ޒުވާނުން ބާރުވެރިކުރުވައި، ކްރިއޭޓަރުންނާއި ފިލްމު ޕްރޮޑިއުސަރުންނަށް އަމާޒުކޮށްގެން ލޯނަށް އެދުމުގެ ފުރުސަތު ވެސް މިމަހުގެ 28 ގައި އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން ވަނީ ހުޅުވާލާފައެވެ.
އޮކްޓޫބަރު މަހުގެ 3 ވަނަ ދުވަހާއި ގުޅުވައި، ރައްޔިތުން އެދޭގޮތަށް ގިނަކަންކަން ސަރުކާރުން ކޮށްދިނުމަކީ ނުވަތަ ފަހިވުމަކީ އިއްތިފާގަކަށް ވެސް ވެދާނެއެވެ. ނަމަވެސް ސަރުކާރުން މިކަންކަން ކުރަނީ ހެޔޮ ނިޔަތުގައިތޯ ބަލައި، ގޮތް ނިންމާނީ ރައްޔިތުންނެވެ. ހެޔޮ ނިޔަތެއް ނެތް ކަމަށްވާނަމަ ކުރިއަށް އޮތްތަނުގައި ވެސް ރައީސް މުއިއްޒުގެ ސަރުކާރުން އަމަލުކުރާނީ މިގޮތަަށް ކަމާމެދު ޝައްކަތްނެތެވެ. މުސާރަ ބޮޑުކޮށްދިން ގޮތަށް ރައީސް މުއިއްޒާއި، ސަރުކާރަށް 11 މަސް ކެއުމަށްފަހު ރައްޔިތުން މީހާއަށް ކާން ލިބޭނީ އެންމެ މަހެއްނުންތޯއެވެ.
