އެމްޑީޕީ ޕިކަޕް ޖަލްސާ: ދެ އިންތިހާބު އެއްކޮށްލަނީ ހީލަތްތެރިކަމާއެކު ވެރިކަމުގެ ދައުރު ދަންމާލަން

ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމަށް މި ސަރުކާރުން މަސައްކަތް ކުރަމުންދަނީ، ހީލަތްތެރި ރޭވުމެއްގެ ދަށުން ވެރިކަމުގެ ދައުރު ދަންމާލުމަށް ކަމަށް އިދިކޮޅު އެމްޑީޕީން ބާއްވަމުންދާ ޕިކަޕް ޖަލްސާތަކުގައި ވާހަކަދެއްކެވި ބޭފުޅުން ވިދާޅުވެއްޖެ އެވެ. އިންތިޚާބުތައް އެއްކޮށްލުމާ ދެކޮޅަށް އެމްޑީޕީން ކުރިއަށްގެންދާ ސިލްސިލާ ހަރަކާތްތަކުގެ ތެރެއިން ބުރާސްފަތި ދުވަހުގެ ހަވީރު ވަނީ ހުޅުމާލޭގެ ދެ ސަރަހައްދެއްގައި ޕިކަޕް ޖަލްސާ ބާއްވާފަ އެވެ.

މި ހަރަކާތްތައް ކުރިއަށް ގެންގޮސްފައިވަނީ ހުޅުމާލޭ ފޭސް 1 ގެ ރަށު މާރުކޭޓް ސަރަހައްދާއި، ފޭސް 2 ގެ ވިނަރެސް ޓަވަރުތައް ހުންނަ ސަރަހައްދުގަ އެވެ. މި ޖަލްސާ ގައި ވާހަކަދެއްކެވި ބޭފުޅުން ވަނީ، އަންނަ އޭޕްރިލް މަހުގެ 4 ވަނަ ދުވަހު ނެގުމަށް ހަމަޖެހިފައިވާ ފެންނަ ނުފެންނަ ވޯޓުގައި، ދެ އިންތިޚާބު އެއްކޮށްލުމާ ދެކޮޅަށް ރައްޔިތުން ވޯޓު ދޭންޖެހޭ ސަބަބުތައް ތަފްސީލީ ގޮތެއްގައި ހާމަކޮށްދެއްވާފަ އެވެ.

ޖަލްސާގެ ބައިވެރިން ފާހަގަކުރެއްވި ގޮތުގައި، ދިވެހި ރައްޔިތުންނަށް މިހާތަނަށް ލިބިފައިވާ ހުރިހާ ކުރިއެރުމަކާއި އަސާސީ ޚިދުމަތްތަކަކީ ރާއްޖޭގައި ބާއްވަމުން އައި ވާދަވެރި އިންތިޚާބުތަކުގެ ނަތީޖާ އެވެ. އެގޮތުން ސާފު ބޯފެނާއި، ބޯހިޔާވަހިކަމާއި، ދަތުރުފަތުރުގެ ނިޒާމުން ރާއްޖެ ގުޅާލުމުގެ އިތުރުން، އިޖުތިމާއީ ރައްކާތެރިކަން ދިވެހިންނަށް ކަށަވަރުވާން ފެށީ މިނިވަން އަދި ވާދަވެރި އިންތިޚާބުތަކެއްގެ ސަބަބުންކަން އެ ބޭފުޅުން ފާހަގަކުރެއްވި އެވެ.

އިންތިޚާބުތައް އެއްކޮށްލުމަށް ސަރުކާރުން ދައްކާ އެންމެ ބޮޑު ބަހަނާއަކީ ޚަރަދު ކުޑަކުރުން ކަމަށްވީ ނަމަވެސް، އެއީ ހަގީގަތެއް ނޫން ކަމަށް އެމްޑީޕީގެ މެންބަރުން ވިދާޅުވި އެވެ. ސަރުކާރުގެ ޚަރަދުތައް އިންތިހާ އަށް ބޮޑުވަނީ އިންތިޚާބުތަކުގެ ސަބަބުން ނޫން ކަމަށާއި، އޭގެ ބަދަލުގައި ޚަރަދު ބޮޑުވަނީ ރައީސް ޑރ. މުހައްމަދު މުއިއްޒުގެ ސަރުކާރުން އުފައްދާފައިވާ ބޭކާރު ސިޔާސީ ވަޒީފާތަކާއި، ސަރުކާރުގެ ތެރޭގައި އަށަގަނެފައިވާ ކޮރަޕްޝަނުގެ ސަބަބުން ކަމަށް އެ ބޭފުޅުން ތުހުމަތު ކުރެއްވި އެވެ.

މީގެ އިތުރުން، ދެ އިންތިޚާބު އެއްކޮށްލަން ފެންނަ ކަމަށް ރައްޔިތުން ނިންމައިފި ނަމަ، ސަރުކާރު ޖަވާބުދާރީ ކުރުވުމަށް އޮތް ހުރިހާ ދޮރުތަކެއް ބަންދުވެގެންދާނެ ކަމުގެ އިންޒާރު ޖަލްސާގެ ބައިވެރިން ވަނީ ދީފަ އެވެ. އަދި މި ބަދަލުގެ ސަބަބުން ރައްޔިތުންގެ ވޯޓުލުމުގެ ހައްގަށް އުނިކަން އައިސް، ޑިމޮކްރެޓިކް ނިޒާމު ބަލިކަށިވެގެންދާނެ ކަމަށް ވެސް އެމްޑީޕީން ބޭއްވި މި ޕިކަޕް ޖަލްސާގައި ވާހަކަ ދެއްކި ފާރަތްތަކުން ވަނީ ބުނެފަ އެވެ.