އެމްޑީޕީ ޕިކަޕް ޖަލްސާ: އެމްޑީޕީ އިން މަސައްކަތްކުރަނީ ރައްޔިތުންގެ ވެރިކަމެއް ގާއިމްކުރަށް

އެމްޑީޕީން މިހާރު ކުރަމުންދާ މަސައްކަތަކީ ދިވެހިރާއްޖޭގައި އަނެއްކާ ވެސް ރައްޔިތުންގެ ބައިވެރިވުން އޮންނަ، ރައްޔިތުންގެ ވެރިކަމެއް ގާއިމްކުރުން ކަމަށް އެ ޕާޓީގެ ގައުމީ މަޖިލީހުގެ މެންބަރު މުހައްމަދު އިހުސާން ވިދާޅުވެއްޖެ އެވެ.

އިހުސާން މިފަދައިން ވިދާޅުވީ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމަށް ސަރުކާރުން ކުރަމުންދާ މަސައްކަތާ ދެކޮޅަށް އެމްޑީޕީން ބާއްވަމުންދާ ސިލްސިލާ ޕިކަޕް ޖަލްސާތަކުގެ ތެރެއިން، ބުދަ ދުވަހުގެ ހަވީރު މާލޭ ބާޒާރުމަތީ ސަރަހައްދުގައި ބޭއްވި ޖަލްސާގައި ވާހަކަ ދައްކަވަމުންނެވެ.

އިހުސާން ވިދާޅުވީ، ރާއްޖޭގެ ވެރިކަން ކުރުމުގެ ނިޒާމަކީ އެތައް ބައެއްގެ ބުރަ މަސައްކަތުންނާއި ގުރުބާނީން އިސްލާހުކޮށް ހަރުދަނާކޮށްފައިވާ ނިޒާމެއް ކަމަށެވެ. ނަމަވެސް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން މިހާރު މަސައްކަތް ކުރަމުންދަނީ މި ނިޒާމުގެ ތެރޭގައި ހިމެނޭ މުހިންމު ސިފަތައް އުނިކޮށް، ނިޒާމު ބަލިކަށި ކުރުމަށް ކަމަށް އޭނާ ތުހުމަތު ކުރެއްވި އެވެ. މިކަމުގެ ސަބަބުން މިއަދު ރައްޔިތުންނަށް އެތައް ގެއްލުންތަކަކާ ކުރިމަތިލާން ޖެހިފައިވާ ކަމަށްވެސް އިހުސާން ފާހަގަކުރެއްވި އެވެ.

ވެރިކަމުގެ ނިޒާމެއް ހަރުދަނާ ވުމުގެ އެންމެ މުހިންމު އެއް އަސާސަކީ ޑިމޮކްރަޓިކް އުސޫލުތައް ހަމަޖެހިފަ އެގޮތުގާ ހުރުން. އެއީ ވެރިކަމުގެ ތެރޭގަ ހުރި ނިޒާމުތައް ނުވަތަ އުސޫލުތައް ނުވަތަ އިންސްޓިޓިއުޝަން ތައް. އެއް އިންސްޓިޓިއުޝަން އަނެއް އިންސްޓިޓިއުޝަންގެ މައްޗަށް ފާރަވެރިވެގެން ނޫން ގޮތަކަށް ވެރިކަމުގެ ނިޒާމެއް ހަރުދަނާ ވެެގެން ކުރިޔަކަަށް ނުދާނެ. އެ ފާރަވެރިވުމުގު އެންމެ މުހިންމެ އެއް އަސާސަކީ ކަންފަސޭހަކޮށް ކަންކަން ދޫކޮށްނުލުން

އެމްޑީޕީ ގައުމީ މަޖްލިސް މެމެބަރު މުހައްމަދު އިހުސާން

ދެ އިންތިޚާބު އެއްކޮށްލުމަށް ސަރުކާރުން ދައްކާ ބަހަނާއަށް ރައްދު ދެއްވަމުން އިހުސާން ވިދާޅުވީ، އެއް ދުވަހެއްގައި ވޯޓުލުމުން ސަރުކާރަށާއި ރައްޔިތުންނަށް ފަސޭހަވާނެ ކަމަށް ސަރުކާރުން ބުނި ނަމަވެސް، ޑިމޮކްރެޓިކް ވެއްޓެއްގައި ކަންކަން ހަރުދަނާ ކުރުމަށްޓަކައި އަބަދު "ފަސޭހަ ގޮތް" އިހުތިޔާރު ކުރެވެން ނޯންނާނެ ކަމަށެވެ. ކަންކަން ފަސޭހަކޮށްލުމުގެ ނަތީޖާއަކީ އޭގެ ދަތި އުނދަގޫ މިހާރުގެ ޖީލަށާއި އަންނަން އޮތް ޖީލުތަކަށް ފޯރުން ކަމަށާއި، ރާއްޖޭގެ މިހާރުގެ ހާލަތުން ވެސް އެކަން ސާފުވާ ކަމަށް އޭނާ ވިދާޅުވި އެވެ.

މީގެ އިތުރުން އިހުސާން ވިދާޅުވީ، ތާރީޚަށް ބަލާއިރު ވެސް ޑިމޮކްރެޓިކް އުސޫލުތައް ހަރުދަނާވެފައިވަނީ ފަސޭހަ ގޮތް ބަލައިގެން ނޫން ކަމަށެވެ. ސަރުކާރުން ދެ އިންތިޚާބު އެއްކޮށްލުމުގެ ވާހަކަ ދައްކާއިރު، ވޯޓުލާ މީހުންނަށާއި އިންތިޒާމު ކުރާ ފަރާތްތަކަށް ފަސޭހަވާނެ ކަމަށް ބުނި ނަމަވެސް، އެއީ ޑިމޮކްރެޓިކް ނިޒާމެއްގައި ކަންކަން އިސްލާހު ކުރުމަށް ބަލަންޖެހޭ މިންގަނޑެއް ނޫން ކަމަށް އޭނާ ވިދާޅުވި އެވެ. ކަންކަން ފަސޭހަ ކޮށްލައިގެން ލިބޭނެ ކުރިއެރުމެއް ނޯންނާނެ ކަމަށެވެ.

އެމްޑީޕީން އަބަދުވެސް މަސައްކަތް ކުރާނީ ބުރަ މަސައްކަތުން ނަމަވެސް ރައްޔިތުންގެ ބާރުވެރިކަން އޮންނަ ވެރިކަމެއް ގާއިމްކުރުމަށް ކަމަށް އިހުސާން ވިދާޅުވި އެވެ. އެހެންކަމުން، ކުރިއަށް އޮތް އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ އިންތިޚާބުގައި، ދެ އިންތިޚާބު އެއްކޮށްލުމަށް ސަރުކާރުން ކުރާ މަސައްކަތަށް "ނޫނެކޭ" ބުނުމަށާއި، އެމްޑީޕީގެ ކެންޑިޑޭޓުންނަށް ވޯޓު ދިނުމަށް އޭނާ ވަނީ ރައްޔިތުންނަށް ގޮވާލައްވާފަ އެވެ.