މިސަރުކާރުން ވަނީ ރާއްޖެ ފުޅިމަދުގަނޑެއްގެ އުސޫލުން ކަނޑުގައި އޮޔާއިވައިން ދާން ދޫކޮށްލާފައި، ރެފެރެންޑަމްގެ ސުވާލުން އެކަނި ވެސް އެކަން ހާމަވޭ: ނިޝާން
12 މާރިޗު 2026 | ބުރާސްފަތި 08:28ނިޝާން ވިދާޅުވީ ގާނޫނުއަސާސީއަށް ގެންނަ އިސްލާހުތަކާ ގުޅޭގޮތުން ރައްޔިތުންގެ ޚިޔާލު ހޯދުމަށް ކުރާ ސުވާލު ބައްޓަންކޮށްފައި ވަނީ ރައްޔިތުންނަށް އޮޅޭގޮތަށް. އޭނާ ފާހަގަކުރެއްވި ގޮތުގައި ރައީސުލްޖުމްހޫރިއްޔާ ބިލު ތަސްދީގުކުރަން ފެނޭތޯ އެހުމުގެ ބަދަލުގައި، ރެފެރެންޑަމްގައި އަހަން ޖެހޭނީ ގާނޫނުއަސާސީގެ އަސާސީ އުސޫލުތަކަށް ގެންނަ ބަދަލުތަކަށް ރައްޔިތުން ތާއީދުކުރޭތޯ. އެހެންކަމުން، ސަރުކާރުން ކަންކަން އޮޅުވާލަމުންދާ ކަމަށް ތުހުމަތުކޮށް، މި ރެފެރެންޑަމްގައި "ނޫނެކޭ" ބުނުމަށް އޭނާ ވަނީ ރައްޔިތުންނަށް ގޮވާލައްވާފައި.
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި މަޝްހޫރު ގާނޫނީ ވަކީލު މުހައްމަދު ނިޝާން އިބްރާހިމް ވާހަކަ ދައްކަވަނީ. | ރާއްޖެއެމްވީ
މިސަރުކާރުން ރާއްޖެ ފުޅިމަދުގަނޑެއްގެ އުސޫލުން ކަނޑުގައި އޮޔާއިވައިން ދާން ދޫކޮށްލާފައިވާ ކަމަށާއި، ރެފެރެންޑަމް ވޯޓުގައި ރައްޔިތުންނަށް ވާނުވާ ނޭނގޭ ގޮތަށް އަމާޒު ކުރުވާ ސުވާލުން އެކަނި ވެސް އެކަން ހާމަވާ ކަމަށް ގާނޫނީ ވަކީލު މުހައްމަދު ނިޝާން އިބްރާހިމް ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ނިޝާން ވިދާޅުވީ ރައީސުލްޖުމްހޫރިއްޔާގެ ޒިންމާއަކީ ގާނޫނު ރައްޔިތުންގެ މަޖިލީހުން ފާސް ކުރުމުން އެ ގާނޫނަކީ ރައީސް އަށް ކަމުދާ ގާނޫނަކަށް ވެއްޖެނަމަ ތަސްތީގު ކުރެއްވުން ކަމަށާއި، ކަމުނުދާނަމަ އެ ބަލަންޖެހޭ ބެލުންތައް ބެލުމަށްފަހު ބަންޑާރަ ނައިބުގެ ލަފައާއެކު އަނބުރާ ރައްޔިތުންގެ މަޖިލީހަށް ފޮނުވާލުން ކަމަށެވެ. އަދި ފޮނުވާލުމަށްފަހު ވެސް ރައްޔިތުން މަޖިލީހުގެ ޖުމްލަ އަގުލަބިއްޔަތުން ފާސްކޮށް ގެނައުމުން ވަކި މުއްދަތެއްގެ ތެރޭގައި ރައީސް ވަކި ގޮތަކަށް ނުނިންމެވި ނަމަވެސް އޮޓޮމެޓިކުން އެ ބަދަލު އަންނާނެ ކަމަށެވެ.
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުމަށާއި ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށްޓަކައި، ރައްޔިތުންގެ މަޖިލީހުން ފާސްކުރައްވާފައިވާ ގާނޫނުއަސާސީ އަށް 8 ވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ތަސްދީގު ކުރައްވަން ފެނޭތޯ މިސުވާލަށް އިޝާރާތް ކުރައްވައި ނިޝާން ވިދާޅުވީ، މިގޮތަށް މިސުވާލު ކުރަން ނުޖެހޭ ކަމަށާއި، މިއީ ސުވާލު އޮންނަން ޖެހޭ ގޮތް ނޫން ކަމަށެވެ.
ނިޝާން ވިދާޅުވީ، ރައްޔިތުންނަށް ވާނުވާ ނޭނގޭ ގޮތަށް ސުވާލު ކުރަމުންދަނީ އަނދިރި ދައުލަތެއް މި ރާއްޖޭއަށް ގެނައުމަށް ކަމަށެވެ. މި ސުވާލު އެކަނި ވެސް މިރާއްޖެ ފުޅިމަދުގަނޑެއްގެ އުސޫލުން ކަނޑުގައި ވަޔާއިއޮޔާ ދާން ދޫކޮށްލާފައިވާކަން ހާމަވާ ކަމަށް އޭނާ ވިދާޅުވި އެވެ.
އެހެންވީމަ މިހިސާބަށް ގޮސްފިއްޔާ ނޫނިއްޔާ ގާނޫނެއް އެއޮންނަ ހަރިއްމާގެ ތެރޭގައި ރައީސުލްޖުމްހޫރިއްޔާ ކުރަން ޖެހޭ ކަން ނިންމުމަށްފަހު ގާނޫނު އަސާސީގައި ބަޔާން ކުރަން ޖެހެނީ ބަޔާން ކޮށްފައި އޮތީ ރައްޔިތުން ގާތުގައި އަހަން އެ ބަދަލު ގެންނަން ފެނޭތޯ ނޫންތޯ. ރައީސުލްޖުމްހޫރިއްޔާ އެ ފާސް ކުރަން ފެނޭތޯ ނޫންތޯ އަހަން ނޫން މިޖެހެނީ. އެ ބަދަލު. ގާނޫނު އަސާސީއަށް ގެންނަ އަސާސީ އުސޫލުތަކާ ގުޅޭ ބަދަލު އަޅުގަނޑު މިދެންނެވިހެން ގާނޫނު އަސާސީގެ 16 އިން 69 އަކަށް އަސާސެއް ގައިދު ކުރުން. އަސާސީ ހައްގެއް ނައްތާލުން. ރައްޔިތުން މަޖިލީހުގެ ދައުރު ހަނިކުރުން. ރައީސުލްޖުމްހޫރިއްޔާގެ ދައުރު ކުޑަ ކުރުން. ރައީސުލްޖުމްހޫރިއްޔާ ހޮވާ ގޮތް ކުޑަ ކުރުން. މިއީ ރައްޔިތުން ގާތު އަހަން ޖެހޭނެ ކަމަށް ގާނޫނު އަސާސީގައި ބަޔާން ކޮށްފައި ހުރި ކަންކަން. އެހެންވީމަ މިއިން ކަމެއް ރައްޔިތުންނަށް ކުރަން ފެނޭތޯ ނޫންތޯ ރައްޔިތުން އެކަމަށް އޯކޭތޯ ނުވަތަ ނޫންތޯ އެހެން މިއޮންނަނީ. ރައީސުލްޖުމްހޫރިއްޔާ އެބިލު ތަސްތީގު ކުރަން ފެނޭތޯ ރައީސުލްޖުމްހޫރިއްޔާ ވަކި ތާކަށް ދާން ފެނޭތޯ ރައީސުލްޖުމްހޫރިއްޔާ ޕީއެންސީ ކެންޕޭނަށް ނުކުންނަން ފެނޭތޯ ނޫންތޯ ރައްޔިތުންގެ ކައިރީގައި. މިއެއް ނޫންގާނޫނީ ވަކީލު މުހައްމަދު ނިޝާން އިބްރާހިމް
ރައީސް މުއިއްޒު ބޭނުންފުޅުވާ ކަމެއް ކުރަން ގައުމަށް ކޮންމެ ގޮތެއްވެސް ހަދާފާނެކަން ފާހަގަކުރައްވައި ނިޝާން ވިދާޅުވީ މިސަރުކާރު ފެށުނީއްސުރެ އޮތީ ރައްޔިތުންނަށް އޮޅުވާލުމުގެ ސަގާފަތެއް ކަމަށެވެ. އަދި މިކަންކަން ބަދަލު ކުރުމުގެ ބާރު އޮތީ ރައްޔިތުންގެ އަތްމަތީގައި ކަމަށާއި، ރެފެރެންޑަމް އަށް ނޫނެކޭ ބުނަން ޖެހޭ ކަމަށް އޭނާ ވިދާޅުވި އެވެ.
