ފެންނަ ނުފެންނަ ވޯޓު ގުނަން ރާވާފައި އޮތީ އޮޅުވާލާ ސަރުކާރުން ނަތީޖާ ބޭނުން ގޮތަކަށް ނެރެވޭނެ ގޮތަކަށް: ނިޔާޒު
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާ ގުޅޭގޮތުން ނަގާ ފެންނަ ނުފެންނަ ވޯޓަކީ ނަތީޖާ އޮޅުވާލުމަށް ސަރުކާރުން ރާވާފައިވާ ކަމެއް ކަމަށް ކުރީގެ މެންބަރު އަލީ ނިޔާޒު ތުހުމަތު ކުރައްވައިފި. މި އިންތިޚާބާ ބެހޭ ސައްޙަ މަޢުލޫމާތު އާންމުންނަށް ނުލިބޭއިރު، ރާއްޖޭން ބޭރުގައި ވޯޓު ފޮށި ނުބަހައްޓަން ނިންމީ ގިނަ ބައެއްގެ ވޯޓުލުމުގެ ޙައްޤަށް އަރައިގަތުމަށް ކަމަށް އޭނާ ވިދާޅުވި. މީގެ އިތުރުން، އިންތިޚާބު އޮބްޒާވްކުރުމުގެ ކަންކަން ހުރި ގޮތުން މިއީ ސަރުކާރުން ބޭނުންވާ ގޮތަށް ނަތީޖާ އަނބުރާލުމަށް ކުރާ މަސައްކަތެއް ކަމަށްވެސް ނިޔާޒު ފާހަގަކުރެއްވި.
ހުޅުމާލެ ދެކުނު ދާއިރާގެ ކުރީގެ މެންބަރު އަލީ ނިޔާޒު | ރާއްޖެ އެމްވީ
ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާ ގުޅޭގޮތުން ނަގާ ފެންނަ ނުފެންނަ ވޯޓަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އިލެކްޝަންސް ކޮމިޝަންގެ ރައީސް އާއިއެކު ސިއްރު ބައްދަލުވުމެއް ބާއްވައިގެން، ނަތީޖާ އޮޅުވާލުމަށް ރާވާފައިވާ ކަމެއް ކަމަށް ހުޅުމާލެ ދެކުނު ދާއިރާގެ ކުރީގެ މެންބަރު އަލީ ނިޔާޒު ވިދާޅުވެއްޖެ އެވެ.
އެމްޑީޕީގެ ޕިކަޕް ޖަލްސާގައި ވާހަކަ ދައްކަވަމުން އަލީ ނިޔާޒު ވިދާޅުވީ ލޯކަލް ކައުންސިލް އިންތިޚާބަކީ މާ ކުރިން އިޢުލާނުކޮށް، އޭގެ އިންތިޒާމުތައް ދުރާލައި ރޭވިގެން ހިނގަމުން އައި ކަމެއް ކަމަށެވެ. ނަމަވެސް، އޭގެ މެދުތެރެއިން ރައީސުލްޖުމްހޫރިއްޔާ އިލެކްޝަންސް ކޮމިޝަނަށް މަޖުބޫރުކޮށްގެން ފެންނަ ނުފެންނަ ވޯޓެއް ކުރިއަށް ގެންދަން ނިންމީ ރައްޔިތުންގެ ވޯޓުލުމުގެ ޙައްޤަށް އަރައިގަތުމަށް ކަމަށް އޭނާ ތުހުމަތު ކުރެއްވި އެވެ. އަދި މި އިންތިޚާބާ ބެހޭ ސައްޙަ މަޢުލޫމާތު އާންމުންނަށް ނުލިބޭ ކަމަށާއި، ގިނަ ބަޔަކަށް އަދިވެސް އެނގެނީ ހަމައެކަނި ކައުންސިލް އިންތިޚާބު އޮންނަ ކަން އެކަނި ކަމަށްވެސް އޭނާ ފާހަގަކުރެއްވިއެވެ.
މި އިންތިޚާބު މިގޮތަށް ރާވައިގެން މިހާތަނަށް ރާވަމުން ދާއިރުގައި މިކަމާ ބެހޭ ސައްޙަ ރަނގަޅު މަޢުލޫމާތެއް އާއްމުންނަކަށް ނުލިބޭ. ގިނަ މީހުންނަށް އަޅުގަނޑުމެން ބައްދަލުވާ ގިނަ ފަރާތްތަކެއް ހަމައެކަނި އެނގެނީ އަދިވެސް ކައުންސިލު އިންތިޚާބުގައި ވޯޓުލާކަން އެކަނި. ކައުންސިލު އިންތިޚާބުގެ ވޯޓުލުމުގެ ކަންތައްތަކާއި އަދި ނަތީޖާ އިޢުލާނުކުރުމުގެ ކަންތައްތައް ރޭވިފައިވާ ގޮތަށް ބަލާއިރުގައި ވެސް އަޅުގަނޑުމެންގެ ވަރަށް ބޮޑު ކަންބޮޑުވުމެއް އެބައޮތް އެއަށްފަހު އަނެއްކާ އަނެއް އިންތިޚާބެއްގެ ނަތީޖާ އިޢުލާނުކުރުމަށް ހޭދަވާ ވަގުތާ މިކަން ކުރުމަށް، މޮނިޓަރކުރުމާއި އޮބްޒަރވްކުރުމަށް އިލެކްޝަންސް ކޮމިޝަނުން ރާވާފައިވާ ރޭވުން.ހުޅުމާލެ ދެކުނު ދާއިރާގެ ކުރީގެ މެންބަރު އަލީ ނިޔާޒު
މިއީ ނަތީޖާ އޮޅުވާލުމަށް ހިންގާ އަމަލެއްގެ ގޮތުގައި އޭނާ ސިފަކުރެއްވި އެވެ. މީގެ އިތުރުން، ގިނަ ބަޔަކު ވޯޓުގައި ބައިވެރިކުރުމަކީ ސަރުކާރުގެ އަމާޒު ކަމަށް ބުނި ނަމަވެސް، އަމަލީ ގޮތުން ފެންނަނީ އެއާ އިދިކޮޅު މަންޒަރެއް ކަމަށް ނިޔާޒު ވިދާޅުވި އެވެ. އެގޮތުން ރާއްޖޭން ބޭރުގެ އެއްވެސް ޤައުމެއްގައި ވޯޓު ފޮށްޓެއް ނުބަހައްޓަން ނިންމާފައިވާކަން އޭނާ ފާހަގަކުރެއްވި އެވެ. ސްރީލަންކާ، އިންޑިއާ، މެލޭޝިއާ އަދި އިނގިރޭސިވިލާތް ފަދަ ދިވެހިން ގިނަ އަދަދަކަށް އުޅޭ ޤައުމުތަކުގައި ވޯޓު ފޮށި ނުބަހައްޓަނީ ގަސްތުގައި ކަމަށާއި، އޭގެ ބަދަލުގައި އެމްބަސީތަކުގައި ތިބި ސަރުކާރުގެ ކޮންޓްރޯލް އޮތް މުވައްޒަފުން މާލެއަށް ޖަމާކުރަމުންދާ ކަމުގެ ހެކި އެބަހުރި ކަމަށްވެސް އަލީ ނިޔާޒު ވިދާޅުވި އެވެ.
އަލީ ނިޔާޒު އިތުރަށް ވިދާޅުވީ، ފެންނަ ނުފެންނަ ވޯޓު މޮނިޓަރކޮށް އޮބްޒާވް ކުރާނީ ކޮން ބައެއްކަންވެސް އިލެކްޝަންސް ކޮމިޝަނުން މިހާތަނަށް ސާފުކޮށްދީފައި ނުވާ ކަމަށެވެ. މި ހުރިހާ ކަމަކީވެސް އިންތިޚާބުގެ ނަތީޖާ ސަރުކާރުން ބޭނުންވާ ގޮތަކަށް އަނބުރާލުމަށް ކުރާ ކަންތައްތަކެއް ކަމަށް އޭނާ ތުހުމަތު ކުރެއްވި އެވެ.
