މި ރަމަޟާން މަހު ހުޅުވި 15 މިސްކިތުގެ ތެރެއިން 10 މިސްކިތަކީ ހެޔޮ އެދޭ ފަރާތްތަކުގެ ދީލަތި އެހީގައި އިމާރާތްކޮށް ހުޅުވި މިސްކިތްކަން ހާމަވެއްޖެ
މި ރަމަޟާން މަހު ހުޅުވި 15 މިސްކިތުގެ ތެރެއިން 10 މިސްކިތަކީ އަމިއްލަ ފަރާތްތަކުގެ އެހީގައި ބިނާކޮށްފައިވާ ތަންތަން ކަމަށާއި، ދައުލަތުގެ ބަޖެޓުން ހަރަދުކޮށްގެން ހުޅުވާފައިވަނީ 5 މިސްކިތްކަން ވަނީ ހާމަވެފައި. މި ސަރުކާރުން ހުޅުވި މި 5 މިސްކިތަކީ ވެސް ކުރީ ސަރުކާރުގައި އިމާރާތް ކުރުމަށް ހަވާލުކޮށްފައިވާ މަޝްރޫއުުތަކެއް. އިސްލާމިކް މިނިސްޓަރު ޝަހީމް ވިދާޅުވި ގޮތުގައި، މި މަސް ނިމޭއިރު އަލަށް ހުޅުވޭ މިސްކިތްތަކުގެ އަދަދު 20 އަށް އަރާނެ.
ރައީސް ޑރ.މުހައްމަދު މުއިއްޒު އާއި، އިސްލާމިކް މިނިސްޓަރު ޑރ.ޝަހީމް އަލީ ސައީދު. | މިނިސްޓްރީ އޮފް އިސްލާމިކް އެފެއަރޒް
މި ރަމަޟާން މަހަށް މިސަރުކާރުން ހުޅުވި 15 މިސްކިތުގެ ތެރެއިން 10 މިސްކިތަކީ ހެޔޮ އެދޭ ފަރާތްތަކުގެ ދީލަތި އެހީގައި އިމާރާތްކޮށް ހުޅުވި މިސްކިތްކަން ހާމަވެއްޖެ އެވެ.
އިތުބާރު ހުރި ފަރާތަކުން ރާއްޖެއެމްވީއަށް ވިދާޅުވީ، މި ރަމަޟާން މަހު ހުޅުވި 15 މިސްކިތުގެ ތެރެއިން 10 މިސްކިތަކީ ހެޔޮ އެދޭ ފަރާތްތަކުގެ ދީލަތި އެހީގައި އިމާރާތްކޮށް ހުޅުވި މިސްކިތްތައް ކަމަށާއި، މި މިސްކިތްތައް އިމާރާތް ކުރުމުގައި ސަރުކާރުގެ ހިއްސާއެއް ނެތް ކަމަށެވެ. އަދި ދައުލަތުން ހަރަދު ކޮށްގެން ހުޅުވާފައިވަނީ އެންމެ 5 މިސްކިތް ކަމަށް އޭނާ ވިދާޅުވި އެވެ.
އެގޮތުން ދައުލަތުން ހަރަދުކޮށްގެން ހުޅުވި މިސްކިތްތަކަކީ، ދިއްދޫ އިސްލާމިކް ސެންޓަރު، ކުރެންދޫ މިސްކިތް، މަނަދޫ މިސްކިތް، މަރަދޫ މިސްކިތް، އަދި ގަން މިސްކިތެވެ. އަދި އަމިއްލަ ފަރާތްތަކުގެ ދީލަތި އެހީގައި އިމާރާތްކޮށް ހުޅުވި މިސްކިތްތަކަކީ، ފޯކައިދޫ މިސްކިތް، އޮޅުވެލިފުށި މިސްކިތް، ގަން ބަނދަރު މިސްކިތް، އިހަވަންދޫ މިސްކިތް، ހުޅުމާލެ ފޭސް-2 ގައި ހުޅުވި މިސްކިތް، ބަރުބަރީ މިސްކިތް، އދ.އޮމަދޫ މިސްކިތް، ނ.މަނަދޫ މިސްކިތް (ބަނދަރު)، ކުޑަފަރީ މިސްކިތް، އަދި ކެނދިކުޅުދޫ މިސްކިތެވެ.
މީގެ އިތުރުން އޭނާ ވިދާޅުވީ ސަރުކާރުން ހުޅުވި ފަސް މިސްކިތަކީ ވެސް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އިމާރާތް ކުުރުމަށް ހުރިހާ ކަމެއް ނިންމާ ހަވާލު ކޮށްފައިވާ މަޝްރޫއު ތަކެއް ކަމަށެވެ.
މި މަޝްރޫއުތަކާ ގުޅޭގޮތުން އިސްލާމިކް މިނިސްޓަރު ޑރ.ޝަހީމް އަލީ ސައީދު ވިދާޅުވީ ރައީސް ޑރ.މުހައްމަދު މުއިއްޒު އިއުލާން ކުރެއްވި ގޮތަށް 15 މިސްކިތް ރޯދައަށް ހުޅުވާފައިވާ ކަމަށެވެ. އޭގެ ތެރޭގައި ސަރުކާރުގެ މަޝްރޫއުތަކާއި، އަމިއްލަ ފަރާތްތަކާ ގުޅިގެން ގެންދިޔަ މަޝްރޫއުތައް ހިމެނޭ ކަމަށެވެ. އަދި ރޯދަ މަސް ނިމޭއިރު، ހުޅުވޭ އަދަދު 20 ށް އަރާނެ ކަމަށް ބެލެވޭ ކަމަށާއި، ރޯދަ މަސް ތެރޭގައި ވެސް ބައެއް މިސްކިތްތައް ހުޅުވާނެ ކަމަށް މިނިސްޓަރު ޝަހީމް ވިދާޅުވި އެވެ.
މީގެ އިތުރުން މިއަހަރުގެ ރިޔާސީ ބަޔާނުގައި ވެސް ރައީސް މުއިއްޒު ވަނީ ކުރީ ސަރުކާރުގައި ކުރިއަށް ގެންދިޔަ މިސްކިތްތައް އިމާރާތް ކުރުމުގެ މަޝްރޫއުތައް މިސަރުކާރުގެ މަޝްރޫއުތަކެއްގެ ގޮތުގައި ފާހަގަކުރައްވާފަ އެވެ.
ރައީސް މުއިއްޒު ވިދާޅުވީ، މިސްކިތްތަކަކީ އިސްލާމީ އަޤީދާގެ އެންމެ މުހިންމު ބިނާތައް ކަމަށެވެ. އެހެންކަމުން، މި ސަރުކާރުން މިސްކިތްތައް މަރާމާތު ކުރުމާއި، އައު އިމާރާތްތައް ބިނާ ކުރުމަށް ޚާއްސަ ސަމާލު ކަމެއް ދެއްވާ ކަމަށް ރައީސް މުއިއްޒު ފާހަގަ ކުރެއްވި އެވެ.
އެއާ އެކު ރައީސް މުއިއްޒު ވިދާޅުވީ ވޭތުވެ ދިޔަ އަހަރުގެ ތެރޭގައި 74 މިސްކިތާއި، ހަތް އިިސްލާމީ މަރުކަޒާއި، ތިން ގުރުއާން މަރުކަޒު އަދި ހަ ވަގުފު ބިނާ އާއެކު، ޖުމުލަ 90 މަޝްރޫއުގެ އަމަލީ މަސައްކަތް ކުރިއަށް ގެންގޮސްފައިވާ ކަމަށެވެ. އޭގެ ތެރެއިން ހއ.ދިއްދޫގެ އިސްލާމިކް ސެންޓަރާއި، 10 ރަށެއްގެ މަސައްކަތް ނިންމައި ހުޅުވާފައިވާ ކަމަށް ރައީސް މުއިއްޒު ވިދާޅުވި އެވެ.
