ރޯދައަށް ހުންނަވާ ރައީސް މުއިއްޒު އެންޓިކެމްޕޭން ކުރައްވާ އިތުރުފުޅު ހައްދަވައިފި: ޣާލިބު ވިދާޅުވީ އެ ލެވެލް އަށް ދުނިޔެއިން މޮޔަނުވާ ކަމަށް
ހުޅުމާލެ ދެކުނު ދާއިރާގެ އެމްޑީޕީ ކެންޑިޑޭޓް އަހުމަދު ޣާލިބަށް ރައީސް ޑރ. މުއިއްޒުގެ ތާއީދު އޮތް ކަމަށް ބުނެ ދެކެވޭ ވާހަކަތައް ޣާލިބު ވަނީ ކަނޑައެޅިގެން ދޮގުކުރައްވާފަ. ރައީސްގެ އެ ވާހަކަފުޅުތަކާ ގުޅިގެން ޣާލިބު ވިދާޅުވީ، އޭނާއަކީ އިދިކޮޅު ކެންޑިޑޭޓަކަށް ވީހިނދު، ރައީސްގެ ތާއީދު އޮތް ކަމަށް ބުނެ ރައްޔިތުންގެ ގާތުގައި ދޮގު ހަދަންޖެހޭ އެއްވެސް ސަބަބެއް ނެތް ކަމަށް. މިއީ އިންތިޚާބާ ދިމާކޮށް އެންޓި-ކެމްޕޭން ކުރުމުގެ މަގުސަދުގައި ރައީސް ދެއްކެވި ވާހަކަފުޅެއް ކަމަށް ބެލެވޭ.
އެމްޑީޕީ އިން ހުޅުމާލެ ދެކުނު ދާއިރާއަށް ވާދަކުރައްވާ ކެންޑިޑޭޓް އަހުމަދު ޣާލިބު އަދި ރައީސް މުއިއްޒު | ރާއްޖެ އެމްވީ
ރޯދައަށް ހުންނަވައި ރައީސް ޑރ. މުހައްމަދު މުއިއްޒު އެންޓިކެމްޕޭން ކުރައްވައި އިތުރުފުޅު ހައްދަވައިފި އެވެ.
ހުޅުމާލެ ދެކުނު ދާއިރާގައި ކުރެއްވި ކެމްޕޭނުގައި މީޑިއާއާއި ވާހަކަ ދައްކަވަމުން ރައީސް މުއިއްޒު އިތުރުފުޅު ހައްދަވާފައިވަނީ، އެމަނިކުފާނުގެ ތާއީދު، އެމްޑީޕީއިން އެ ދާއިރާއަށް ނެރެފައިވާ ކެންޑިޑޭޓް އަހުމަދު ޣާލިބަށް އޮތް ކަމަށް ބުނާކަމަށް ވިދާޅުވެ އެވެ. ރައީސް މުއިއްޒު ވިދާޅުވެފައިވަނީ އެމަނިކުފާނަށް ހަބަރު ލިބިވަޑައިގެންފައި ވަނީ އެމްޑީޕީ އިން ނުކުމެ ހުންނެވި ކެންޑިޑޭޓަށް، އެމަނިކުފާނުގެ ތާއިދު އޮތް ކަމަށް ބުނާ ކަމުގެ ހަބަރު ލިބިފައިވާ ކަމަށެވެ.
ރައީސް މުއިއްޒުގެ މި ވާހަކަފުޅަށް ރައްދު ދެއްވައި އެމްޑީޕީގެ ކެންޑިޑޭޓް އަހުމަދު ޣާލިބު ވިދާޅުވީ ރަމަޟާންމަހު ރޯދައަށް ހުރެ މީހަކު ހަދާނެ އެންމެ ބޮޑު ދޮގަކީ އެއީ ކަަމަށެވެ. ޣާލިބު ވިދާޅުވީ އެއްވެސް ރައްޔިތެއްގެ ކައިރީގައި، "ރައީސް އަޅުގަނޑަށް ތާޢީދުކުރާ ކަމަށް" ބުނެފައެއް ނޯންނާނެ ކަމަށް ﷲ ގަންދީ ހުވާކޮށްފަ ވިދާޅުވާ ކަމަށެވެ. އަދި ނުވެސް ބުނާނެ ކަމަށާއި، އޭނާ ހުރީ އިދިކޮޅު ޕާޓީގައި ކަމަށެވެ. އަދި އޭނާ އަކީ އިދިކޮޅު ޕާޓީ ކެންޑިޑޭޓަށް ޤައުމުގެ ރައީސް ތާއީދުކުރާ ކަމަށް ބުނެގެން ކަމެއް ޙާޞިލްކުރަން އުޅޭނެ މޮޔައެއް ނޫން ކަމަށް ޣާލިބު ވިދާޅުވި އެވެ.
ޣާލިބު ވިދާޅުވީ އެއީ ޤައުމެއްގެ ރައީސަކު ވެއްޓެންޖެހޭ ދަރަޖައެއް ނޫން ކަމަށެވެ. އަދި އިންތިޚާބުގައި ކާމިޔާބު ވިޔަސް، ނުވިޔަސް ހުންނާނީ ހަލާލު ފައިސާއިން ބަނޑު ފުރާނަ މުއްތިކޮށްގެން ކަމަށް ޣާލިބު ވިދާޅުވި އެވެ. އޭނާ ވިދާޅުވީ ރައީސް މުއިއްޒު ދެއްކެވި ވާހަކަފުޅު ހަމަ ބުއްދިން ވިސްނާ އިންސާނަކުތޯ ގަބޫލެއް ނުކުރާނެ ކަމަށެވެ.
އަދި ސަރުކާރު ދެކެ ރައްޔިތުން އިންތިހާއަށް ރުޅިއައިސް ތިއްބާ، އިދިކޮޅު އެމްޑީޕީން ވާދަ ކުރާ ކެންޑީޑޭޓް ރައްޔިތުންގާތަށް ގޮސް ތިމަންނާނީ ސަރުކާރުން ނުވަތަ ރައީސް ތާއީދު ކުރައްވާ ކެންޑިޑޭޓޭ ބުނާނެ ކަމަށް ޤަބޫލްކުރެވޭނީ ކޮން ސިކުނޑިއަކަށްތޯ ސުވާލު އުފައްދަވާ. އޭނާ އެ ލެވެލްއަށް ދުނިޔެއަށް މޮޔައެއް ނުވާ ކަމަށް ޣާލިބު ވިދާޅުވި އެވެ.
ރައީސް މިފަދައިން ވިދާޅުވެފައިވަނީ އެންޓި ކެމްޕޭން ކުރުމުގެ ނިޔަތުގައި ކަމަށް ބެލެވެ އެވެ. އެއީ ސަރުކާރު ދެކެ ރައްޔިތުން އިންތިހާއަށް ރުޅި އަައިސްފައި ތިއްބާ އިދިކޮޅު ކެންޑިޑޭޓަށް ތާއިދުކުރާ ކަމަށް ވިދާޅުވެ، އިދިކޮޅު ކެންޑިޑޭޓަށް ރައްޔިތުން ކުރާ ތާއީދު ކުޑަކުރުމަށް ކަމަށް ބެލެވެ އެވެ.
