ވޯޓު ލުމުގެ ހައްގު ލިބޭ މީހުންގެ ފައިނަލް ލިސްޓް: އެ ހައްގު ލިބެނީ 294،876 މީހުންނަށް
އޭޕްރީލް 4 ގައި ބާއްވާ އިންތިޚާބުގައި 294,876 މީހުންނަށް ވޯޓުލުމުގެ ހައްގު ލިބިފައިވާއިރު، ރާއްޖޭގެ އެކި ސަރަހައްދުތަކުގައި ޖުމުލަ 588 ވޯޓު ފޮށި ބެހެއްޓުމަށް އިލެކްޝަންސް ކޮމިޝަނުން ވަނީ ނިންމާފަ. މީގެ ތެރެއިން 240 ފޮށި މާލެ ސަރަހައްދުގައި ބަހައްޓާއިރު، ބޭނުންވާ އަދަދަށް މީހުން ރަޖިސްޓްރީ ނުވުމުގެ ސަބަބުން ރާއްޖެއިން ބޭރާއި ސިނާއީ ރަށްތަކުގައި މިފަހަރު ފޮށި ނުބަހައްޓާނެ. ކޮމިޝަނުން މިހާރު ވަނީ ވޯޓުލާ މީހުންގެ ދާއިރާތަކާއި ފޮށިތައް އެނގޭނެހެން ފައިނަލް ލިސްޓު އާންމުކޮށްފަ.
މި އިންތިޚާބުގައި ވޯޓު ލުމުގެ ހައްގު ލިބެނީ 294،876 މީހުންނަށް - އެއީ 144،506 އަންހެނުންނާއި 150،370 ފިރިހެނުން | އިލެކްޝަންސް ކޮމިޝަން
ލޯކަލް ކައުންސިލް އިންތިޚާބާ އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ވޯޓުގައި ވޯޓު ލެވޭ މީހުންގެ ފައިނަލް ލިސްޓު، އިލެކްޝަންސް ކޮމިޝަން (އީސީ) އިން އާންމު ކޮށްފި އެވެ.
އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ މި އިންތިޚާބުގައި ވޯޓު ލުމުގެ ހައްގު ލިބިފައިވާ މީހުންގެ ފައިނަލް ލިސްޓު އެ ކޮމިޝަންގެ ވެބްސައިޓުގައި މިހާރު އާންމު ކޮށްފައިވާއިރު މި އިންތިޚާބުގައި ވޯޓު ލުމުގެ ހައްގު ލިބެނީ 294،876 މީހުންނަށް ކަމަށް އެ ލިސްޓުގައި ވެ އެވެ. އެއީ 144،506 އަންހެނުންނާއި 150،370 ފިރިހެނުންނެވެ.
ވޯޓުލުމުގެ ހައްގު ލިބިފައިވާ މީހުންގެ ލިސްޓު އެ ކޮމިޝަނުން އާންމު ކޮށްފައި ވަނީ އެ މީހަކު ވޯޓުލާ ދާއިރާ އެނގޭނެ ގޮތަށެވެ. އެގޮތުން ކޮންމެ ފޮއްޓަކަށް ވޯޓު ލުމުގެ ހައްގު ލިބިފައިވާ މީހުންގެ ލިސްޓު އެ ކޮމިޝަނުން ވަނީ އާންމު ކޮށްފަ އެވެ.
އިލެކްޝަންސް ކޮމިޝަނުން ބުުނެފައި ވަނީ އިންތިޚާބުގައި ވޯޓުލުމަށްޓަކައި ރާއްޖޭގެ އެކި ސަރަޙައްދުތަކުގައި ޖުމުލަ 588 ވޯޓު ފޮށި ބެހެއްޓުމަށް ނިންމާފައިވާ ކަމަށެވެ.
އެގޮތުން އަތޮޅުތެރޭގައި 322 ވޯޓު ފޮށި ބެހެއްޓުމަށް ވަނީ ނިންމާފަ އެވެ. މާލެ ސަރަޙައްދަށް ބަލާއިރު، މާލެ އާއި ހުޅުމާލެ އަދި ވިލިމާލެ ހިމެނޭހެން ޖުމުލަ 240 ވޯޓު ފޮށި ބަހައްޓާނެ އެވެ. މީގެ ތެރޭގައި ހިމެނެނީ މާލޭގައި ބަހައްޓާ 180 ފޮށްޓާއި، ހުޅުމާލޭގައި ބަހައްޓާ 51 ފޮށީގެ އިތުރުން ވިލިމާލޭގައި ބަހައްޓާ 9 ފޮށްޓެވެ.
މާލެ ސަރަޙައްދުގައި ބަހައްޓާ ފޮށިތަކުގެ ތެރެއިން 98 ފޮށްޓަކީ މާލޭގެ ރައްޔިތުން ވޯޓުލުމަށް ޚާއްޞަ ފޮށިތަކެވެ. އަދި އަތޮޅުތަކާއި ސިޓީތަކަށް ނިސްބަތްވާ، މާލޭގައި ދިރިއުޅޭ ރައްޔިތުން ވޯޓުލުމަށް 142 ފޮށި ބެހެއްޓުމަށް ވަނީ ހަމަޖެހިފަ އެވެ.
އިލެކްޝަންސް ކޮމިޝަނުން ބުނި ގޮތުގައި، ވޯޓު ފޮށި ބެހެއްޓުމަށް ބޭނުންވާ އަދަދަށް މީހުން ރަޖިސްޓްރީވެފައި ނުވާތީ، މިފަހަރުގެ އިންތިޚާބުގައި ރާއްޖެއިން ބޭރުގެ އެއްވެސް ގައުމެއްގައި އަދި ސިނާއީ މަސައްކަތްކުރާ އެއްވެސް ރަށެއްގައި ވޯޓު ފޮށި ނުބެހެއްޓުމަށް ވަނީ ނިންމާފަ އެވެ.
