22 ސްޕޯޓްސް ކްލަބް ބަދުނާމް ވާ ގޮތަށް މެމްބަރު މުހައްމަދު އިސްމާއިލް ދެއްކި ވާހަކަތައް އެ ކްލަބުން ކުށްވެރިކޮށްފި
އެ ކްލަބްގެ ނަމާއި އަބުރު ސިޔާސީ އެކި ބޭނުންތަކަށް ބޭނުން ނުކުރުމަށާއި، ކްލަބް ބަދުނާމު ނުކުރުމަށް އެ ކްލަބުން ގޮވާލާފައިވޭ.
ވިލިމާލެ ދާއިރާގެ މެމްބަރު މުހައްމަދު އިސްމާއިލް
22 ސްޕޯޓްސް ކްލަބް ބަދުނާމް ވާ ގޮތަށް ވިލިމާލެ ދާއިރާގެ މެމްބަރު މުހައްމަދު އިސްމާއިލް ދެއްކި ވާހަކަތައް އެ ކްލަބުން ކުށްވެރިކޮށްފި އެވެ.
22 ސްޕޯޓްސް ކްލަބް އިން ނެރެފައިވަ ބަޔާނެއްގައި ބުނެފައި ވަނީ އެ ކްލަބް ބަދުނާމު ވާ ގޮތަށް މުހައްމަދު އިސްމާއިލް ވާހަކަދައްކަވާފައިވާ ކަމަށެވެ. އެގޮތުން ފޭސްބުކްގައި އެ ކްލަބަށް ނިސްބަތްކޮށް ދައްކާފައިވާ ވާހަކަތަކަށް އެ ކްލަބުން ރައްދު ދީފައިވެ އެވެ.
އެ ކްލަބަކީ ވަކި ސިޔާސީ ފިކުރަކަށް ތާއީދު ކުރާ ވަކި ސިޔާސީ ޕާޓީ އެއްގެ މަސްލަހަތު ކުރިއަރުވަން މަސައްކަތް ކުރާ ކްލަބެއް ނޫން ކަމަށް އެ ކްލަބުން ވަނީ ބުނެފަ އެވެ. އެހެންނަމަ ވެސް ކްލަބްގެ ވަކި ވަކި މެމްބަރުންނަކީ އެ މެމްބަރަކު ބޭނުންވާ ސިޔާސީ ފިކުރަކަށް ތާއީދުކުރުމުގެ މިނިވަންކަން ޤާނޫނުއަސާސީ އިން ލިބިދީފައިވާ ބައެއް ކަމަށް ވެސް އެ ކްލަބުން ބުނެފައިވެ އެވެ.
ކްލަބްތަކަށް ބިން ކަނޑައެޅުމަކީ އެ ކްލަބުން ވަކާލާތުކުރާ ކަމެއްކަން ފާހަގަކޮށް ބުނެފައި ވަނީ ސަރުކާރުތަކުން ކްލަބް ޖަމިއްޔާތަކަށް ބިން ހަމަޖައްސާ ދިނުމަކީ ކުޅިވަރާއި އިޖްތިމާއީ ދާއިރާ އަށް މުހިންމު ކަމެއް ކަމަށް އެ ކްލަބުން ދެކޭ ކަމަށެވެ. އެ ކްލަބުން ބާއްވާ އެކި ކުޅިވަރު މުބާރާތްތަކާއި ހިންގާ ހަރަކާތްތަކުގައި ތަފާތު އެކި ފަރާތްތަކުގެ އެހީތެރިކަން އަބަދުވެސް ހޯދާ ކަމަށް އެ ކްލަބުގެ ބަޔާނުގައި ވަނީ ބުނެފަ އެވެ. ނަމަވެސް ކްލަބަށް ވެދީފައިވާ އެހީތެރިކަމަކީ ފަހުން ސިޔާސީ ބޭނުމަށް ބޭނުންކޮށް އެ ވާހަކަ އާއްމުކޮށް ގޮވުމަކީ ހިތާމަ ކުރާ ކަމެއް ކަމަށް ވަނީ ބުނެފަ އެވެ. އެފަދަ އަމަލުތަކުގެ ސަބަބުން ކްލަބްގެ ދާއިރާގެ ގަދަރާއި އިތުބާރު ގެއްލޭ ކަމަށް ވެސް އެ ކްލަބުން ވަނީ ބުނެފަ އެވެ.
އެ ކްލަބްގެ ނަމާއި އަބުރު ސިޔާސީ އެކި ބޭނުންތަކަށް ބޭނުން ނުކުރުމަށާއި ކްލަބް ބަދުނާމު ނުކުރުމަށް އެ ކްލަބުން ގޮވާލާފައިވެ އެވެ.
