އުރީދޫ ނޭޝަނުން ކުރިއަށް ގެންދިޔަ "ރަމަޟާން އީ-ސްޕޯޓްސް ފެސްޓިވަލް 2K26" ކާމިޔާބުކަމާއެކު ނިންމާލައިފި
ޔޫތު މިނިސްޓްރީއާއި އުރީދޫ ނޭޝަން ގުޅިގެން ބޭއްވި މި ފެސްޓިވަލްގައި ޕަބްޖީ، މޮބައިލް ލެޖެންޑްސް، އީއޭއެފްސީ އަދި ޓެކެން ހިމެނޭހެން ގިނަ އަދަދެއްގެ ކުޅުންތެރިންނާއި ޓީމުތަކުން ވަނީ އޮންލައިންކޮށް އަދި ލޭން ފޯމެޓަށް ވާދަކޮށްފަ. މި މުބާރާތުގެ އެކި ކެޓަގަރީތަކުން ވަނަތައް ހޯދި ފަރާތްތަކަށް އިނާމު ދިނުމަށް ބޭއްވި ރަސްމިއްޔާތު ޝަރަފުވެރިކޮށްދެއްވީ ޔޫތު މިނިސްޓަރު އިބްރާހީމް ވަޙީދު. މިއީ ރާއްޖޭގެ ގޭމިންގ ދާއިރާ ކުރިއަރުވައި ޒުވާނުން ބާރުވެރިކުރުވުމަށް ލިބުނު މުހިންމު ފުރުސަތެއް. ޖެހިޖެހިގެން ދެވަނަ އަހަރު މި ފެސްޓިވަލް ކާމިޔާބުކަމާއެކު ނިންމާލުމުން ރާއްޖޭގައި އީ-ސްޕޯޓްސްއަށް އޮތް ތަރުހީބު އިތުރުވަމުންދާކަން ހާމަވެގެންދޭ.
ރަމަޟާން އީ-ސްޕޯޓްސް ފެސްޓިވަލް 2K26 ގެ ތެރެއިން. | އުރީދޫ
މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސްއާ ގުޅިގެން އުރީދޫ ނޭޝަނުން އިންތިޒާމުކޮށްގެން ކުރިއަށް ގެންދިޔަ "ރަމަޟާން އީ-ސްޕޯޓްސް ފެސްޓިވަލް 2K26" ކާމިޔާބުކަމާއެކު ނިންމާލައިފި އެވެ.
މި މުބާރާތް ނިންމުމުގެ ގޮތުން ސޯޝަލް ސެންޓަރުގައި ހުންނަ ޔޫތު ހަބްގައި ކުލަގަދަ ރަސްމިއްޔާތެއް ވަނީ ބާއްވާފަ އެވެ.
މި ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް އިބްރާހީމް ވަޙީދެވެ. މި ހަފުލާގައި އުރީދޫ މޯލްޑިވްސްގެ މެނޭޖިންގ ޑިރެކްޓަރ އަދި ސީއީއޯ ޝާދީ ޤަވާސްމީ އާއި ޗީފް ކޮމާޝަލް އޮފިސަރ ޙުސައިން ނިޔާޒުގެ އިތުރުން ކުންފުނީގެ އިސްވެރިން ބައިވެރިވެވަޑައިގެންނެވި އެވެ.
ރާއްޖޭގެ އެކި ކޮޅުތަކުގައި ތިބި ގޭމަރުންނަށް ވާދަވެރި މާހައުލެއް ފަހިކޮށްދިނުމުގެ ގޮތުން ބޭއްވި މި ފެސްޓިވަލް ކުރިއަށް ގެންގޮސްފައިވަނީ އޮންލައިންކޮށް އަދި ލޭން (LAN) ފޯމެޓަށެވެ. އެގޮތުން ޓެކެން އަދި އީއޭއެފްސީ މުބާރާތްތައް ޔޫތު ހަބްގައި ލޭން އިވެންޓްތަކެއްގެ ގޮތުގައި ކުރިއަށް ދިޔައިރު، ޕަބްޖީ މޮބައިލް (PUBGM) އަދި މޮބައިލް ލެޖެންޑްސް: ބޭންގ ބޭންގ (MLBB) ކުރިއަށް ގެންދިޔައީ އޮންލައިންކޮށެވެ. މީގެ ސަބަބުން މުޅި ރާއްޖެއިން ގިނަ އަދަދެއްގެ ކުޅުންތެރިންނަށް މުބާރާތުގައި ބައިވެރިވުމުގެ ފުރުސަތު ވަނީ ލިބިފަ އެވެ.
މި ފެސްޓިވަލްގައި ބައިވެރިވި ކުޅުންތެރިންގެ ތަފްސީލަށް ބަލާއިރު، އީއޭއެފްސީގައި 20 ބައިވެރިން އަދި ޓެކެންގައި 16 ބައިވެރިން ވަނީ ވާދަކޮށްފަ އެވެ. މީގެ އިތުރުން ޕަބްޖީ މޮބައިލްގައި 38 ޓީމު އަދި މޮބައިލް ލެޖެންޑްސްގައި ވެސް 38 ޓީމު ބައިވެރިވެ، މުބާރާތުގެ ހުރިހާ ކެޓަގަރީއެއްގައި ވެސް ފެނިގެންދިޔައީ ފޯރިގަދަ ކުޅުމަކާއި ވަރުގަދަ ޓީމު ވޯކެކެވެ.
މުބާރާތުގެ ވަނަތަކަށް ބަލާއިރު، ޕަބްޖީ މޮބައިލް ކެޓަގަރީގެ އެއްވަނަ ޑީޖީއެން ސިންޑިކޭޓް ހޯދިއިރު، ދެވަނަ ހޯދީ ގޭމްއޯވަރ ރިޖެކްޓް އެވެ. ތިންވަނަ ލިބުނީ އެލްއެފް އަކަޒާޔާ އަށެވެ. މޮބައިލް ލެޖެންޑްސްއިން އެއްވަނަ އެލްއެންއެން ސްލީޕިންގ ފޮރެސްޓް ހޯދިއިރު، ދެވަނަ ކަޅުއޮށްފުމި އަދި ތިންވަނަ ކުއިސް ވެންގާޑްސް ވަނީ ހޯދާފަ އެވެ. އީއޭއެފްސީ ކެޓަގަރީގެ އެއްވަނަ އެމްޔޫޖީ ޔާއިޝް، ދެވަނަ އެމްޔޫޖީ ރާއިދު އަދި ތިންވަނަ ޒަމީލް ހޯދިއިރު، ޓެކެން މުބާރާތުގެ އެއްވަނަ ހޯދީ އެމްޔޫޖީ އަބާން އެވެ. މި ކެޓަގަރީގެ ދެވަނަ ކުއިސް އީ-ސްޕޯޓްސް ތާބިޝް ހޯދިއިރު ތިންވަނަ ލިބުނީ އެމްޔޫޖީ އަޝްވާން އަށެވެ.
ރަމަޟާން އީ-ސްޕޯޓްސް ފެސްޓިވަލް 2K26 އިން އަނެއްކާވެސް ހާމަވެގެންދިޔައީ ރާއްޖޭގައި ވާދަވެރި ގޭމިންގ ހަލުވިކަމާއެކު ކުރިއަރަމުންދާ މިންވަރު ކަމަށް އުރީދޫ އިން ބުނެ އެވެ. އަދި މިއީ ޒުވާނުންނަށް އެކުދިންގެ ހުނަރު ދައްކާލުމަށާއި، ޑިޖިޓަލް ހުނަރުތައް ތަރައްގީކުރުމުގެ އިތުރުން މުޖުތަމައުގެ ބައިވެރިވުން އޮތް ފޯރިގަދަ މާހައުލެއްގައި ވާދަކުރުމަށް ލިބުނު ރަނގަޅު ފުރުސަތެކެވެ.
ޖެހިޖެހިގެން ދެވަނަ އަހަރު މި ފެސްޓިވަލް ކާމިޔާބުކަމާއެކު ނިންމާލުމުން ދޭހަވަނީ ރާއްޖޭގައި އީ-ސްޕޯޓްސްއަށް އޮތް ޝައުގުވެރިކަން އިތުރުވަމުންދާ މިންވަރެވެ. އަދި މިއީ ކުރިމަގުގައި މިއަށްވުރެ ބޮޑެތި މުބާރާތްތަކަކަށް މަގުފަހިވެގެންދާނެ ކަމެއް ކަމަށް އުރީދޫން ގަބޫލުކުރެ އެވެ.
