ދުނިޔޭގެ އެކި ގައުމުތަކުގައި ހިންގާ ގަތުލުއާންމުތަކާއި އިންސާނިއްޔަތާ ހިލާފު އަމަލުތަކާ ދެކޮޅަށް އދ. ގެ ޖެނެރަލް އެސެމްބްލީގެ އެޖެންޑާގައި ހިމެނުމަށް ނެގި ވޯޓުގައި ރާއްޖެއިން ބައިވެރިނުވުމުން ރާއްޖޭގެ ހާރިޖީ ސިޔާސަތު އޮތީ ބޭރުގެ ބަޔަކަށް ވިއްކާލާފައިކަން އިތުރަށް ހާމަވެއްޖެ ކަމަށް އިދިކޮޅު އިއްތިހާދުން ބުނެފި އެވެ.

މ.ކުނޫޒުގައި ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު ވިދާޅުވީ އިން ގަތުލު އާންމާއި ހަނގުރާމައިގެ ޖަރީމާތަކާއި ނަސްލު ނައްތާލުމާއި އިންސާނިއްޔަތާ ހިލާފަށް ހިންގާ ޖަރީމާތަކާ ގުޅޭ މައްސަލަ އދ.ގެ އެޖެންޑާގައި ހިމެނުމަށް ނެގި ވޯޓުގައި ބައިވެރިވުމަށް ރާއްޖެއިން ނުދިއުމުން އަނިޔާވެރިކަމާ ދެކޮޅަށް ބަސްބުނުމުގެ ހިތްވަރު ސަރުކާރުގައި ނެތްކަން ދައްކުވާދީފި ކަމަށެވެ.

" ދޮލަނގަލަށް ލައިގެން ދިވެހި ރާއްޖޭގެ ހާރިޖީ ސިޔާސަތު ވިއްކުމަށް މަސައްކަތް ކުރައްވާ އޭގެ ނަތީޖާއެއް ގޮތުން މިއަދު ދިވެހި ރާއްޖޭގެ ހާރިޖީ ސިޔާސަތުގެ މައްޗަށް ބަސް ކިޔަމުންދާތަން މި ފެނުނީ ބޭރު ގައުމުތަކުން. އިއްޔެ ނެގުނު ވޯޓުގައި 113 ގައުމަކުން މި ވަނީ އެ އެޖެންޑާ އިތުރުކުރަން ފެންނަ ކަމަށް ވޯޓު ދެއްވާފައި. 21 ގައުމަކުން ނޫނެކޭ ބުނެފައި. ސަތާރަ ގައުމަކުން ވަކި ފަރާތަކަށް ވޯޓު ނުދޭން ނިންމި. މިއިން އެއްވެސް ބައެއްގައި ނުހިމެނޭ ގޮތައް ދިވެހި ރާއްޖެއިން އެ ޖަލްސާއަށްވެސް ހާޒިރުވެފައިނުވޭ. އެއީ އަޅުގަނޑުމެން ގުޅިފައިވާ ޕާޓީތަކުން ކުށްވެރިކުރާ ކަމެއް،" އޭނާ ވިދާޅުވި އެވެ.

އެ ވޯޓުގައި ބައިވެރިވުމަށް ރާއްޖެއިން ނުދިއުމުން މިޔަންމާގެ އިސްލާމީ ދަރިފަސްކޮޅެއް ނައްތާލުމަށް ހިންގާ ޖަރީމާތަކާއި އިންސާނިއްޔާ ހިލާފު އަމަލުތައް ހިންގަން ދިވެހި ސަރުކާރުން ބޭނުންވާކަން ދައްކަދީފި ކަމަށްވެސް ޝާހިދު ވިދާޅުވި އެވެ. ރާއްޖެއިން އެ ވޯޓުގައި ބައިވެރިވުމަށް ގޮސްފައިނުވާއިރު އެ ގަރާރާ ދެކޮޅަށް އދ.ގައި ވޯޓުލާފައިވާ ގައުމުތަކުގެ ތެރޭގައި ރާއްޖޭގައި ތަރައްގީގެ މަޝްރޫތައް ހިންގުމުގެ ނަމުގައި އިސްތިއުމާރީ ބާރު ފޯރުވުމަށް މަސައްކަތްކުރާ ގައުމުވެސް ހިމެނޭ ކަމަށާއި ރާއްޖެއިން އަމަލު ކޮށްފައިވަނީ ޗައިނާއިން އެންގި ގޮތައް ކަމަށް މާނަ ކުރެވިދާނެ ކަމަށްވެސް އޭނާ ވިދާޅުވި އެވެ.

 އދ.ގައި ނެގި އެ ވޯޓާއި މިޔަންމާގައި ހިންގަމުންދާ ކަންކަމާ ގުޅުމެއް ނެތް ކަމަށް ސަރުކާރުން ބުނެފައިވާތީ އެ ވާހަކައަށް ޝާހިދު ވަނީ ރައްދު ދެއްވާފަ އެވެ.

" މި މައުޞޫލުގެ ދަށުން އެއީ ރޮހިންޖާގެ މުސްލިމުންގެ ވާހަކަ ކަމަށްވިއަސް އަނިޔާ ލިބެމުންދާ އެހެން ދަރިފަސްކޮޅުގެ ވާހަކަ ކަމަށްވިއަސް މި އެޖެންޑާގެ ދަށުން އދ. މަޖިލީހުގައި އެ ވާހަކަ ދެއްކޭނީ. އެހެންވީމަ ދެއްކެން އޮތް މަގު ރާއްޖެއިން މި ބަންދުކޮށްލީ،" ޝާހިދު ވިދާޅުވި އެވެ.

މި ބައްދަލުވުމުގައި ކުރީގެ ރައީސް މައުމޫނު އަބްދުލް ގައްޔޫމްގެ ދަރިކަލުން ޔުމްނާ މައުމޫނު ވިދާޅުވީ ރާއްޖެއިން އދ.ގެ ވޯޓުގައި ބައިވެރިނުވީ އެހެން ގައުމެއްގެ ނުފޫޒާހެދިތޯ ސުވާލު އުފެދޭ ކަމަށް ވިދާޅުވި އެވެ. އަދި ރާއްޖޭގެ މިނިވަންކަމާއިމެދުވެސް ސުވާލު އުފެދޭތީ އެކަން ކުށްވެރިކުރާ ކަމަށް ޔުމްނާ ފާހަގަ ކުރެއްވި އެވެ.

އަދާލަތު ޕާޓީ މެމްބަރު ޝިދާތާ ޝަރީފު ވިދާޅުވީ އަނިޔާވެރިކަމާ ދެކޮޅަށް އަދި މިޔަންމާގެ ރައްޔިތުންނާމެދު ހިންގާ ލާއިންސާނީ އަމަލުތަކާ ދެކޮޅަށް ދިވެހިން ތެދުވެ މަސައްކަތް ކުރަމުންދަނިކޮށް ދިވެހި ސަރުކާރުން އަމަލު ކުރިގޮތުމާދު ރައްޔިތުން ލަދުވެތިވާ ކަމަށެވެ. އަދި ރާއްޖޭގެ ނަން ބައިނަލްއަގުވާމީ ދުނިޔޭގައި ކިލަނބުކުރަމުންދާ ދިއުން ކުށްވެރިކުރާ ކަމަށް އޭނާ ވިދާޅުވި އެވެ.

މީގެ އިތުރުން ޖުމްހޫރީ ޕާޓީގެ ޑެޕިއުޓީ ލީޑަރު އަބްދުﷲ ކަމާލުއްދީން ވެސް ވަނީ ރާއްޖެއިން އދ.ގެ އާންމު މަޖިލީހުގައި ނެގި އެ ވޯޓުގައި ބައިވެރިވެފައިނުވާތީ ކަންބޮޑުވާން ޖެހޭ ކަމަށާއި މިޔަންމާގައި ހިންގާ ކަންކަން ހުއްޓުވުމަށް ފިޔަވަޅު އެޅުމަށް އޮތް މަގަކީ ވެސް އެއީ ކަމަށެވެ.