ދިގުރަށުގައި ސާފުކުރުމުގެ ހަރަކާތެއް ބާއްވައިފި
ސާފުކުރުމުގެ ހަރަކާތުގައި 150 މީހުން ބައިވެރިވެފައިވޭ
ދިގުރަށުގެ މޫދު ސަރަހައްދު ސާފުކުރުމުގައި ރަށުގެ ބަޔަކު
ދިގުރަށު ކައުންސިލް އިދާރާއިން އިސްނަގައިގެން، ރަށުގެ ވަށައިގެން އޮންނަ ސަރަހައްދު ސާފު ކުރުމުގެ ހަރަކާތެއް ކުރިއަށްގެންގޮސްފި އެވެ.
މިކަމާ ގުޅޭ ގޮތުން މައުލޫމާތުދެއްވަމުން އެރަށު ކައުންސިލްގެ މެންބަރު އިމްރާނު އާދަމް ވިދާޅުވީ، ހޮނިހިރު ދުވަހު ރަށުގެ ރައްޔިތުން އިސްނަގައިގެން ކުރިއަށްގެންދިޔަ ސާފުކުރުމުގެ ހަރަކާތުގައި ރަށުގެ ގާތްގަނޑަކަށް 4 ކިލޯ މީޓަރު ސާފުކުރެވިފައިވާ ކަމަށެވެ.
އިމްރާނު ވިދާޅުވީ ސާފު ކުރުމުގެ ހަރަކާތުގެ ތެރެއިން އެރަށުގެ ހުޅަނގު ފަރާތް އެއްކޮށް ސާފުކޮށްފައިވާއިރު ޑައިވް ޕޮއިންޓްތައްވެސް ސާފުކޮށްފައިވާ ކަމަށެވެ. މިހަރަކާތުގައި ފަތުރުވެރިކަމުގެ ދާއިރާގައި އެރަށުގައި މަސައްކަތްކުރާ ހުރިހާ ފަރާތްތަކުން އިސްކޮށް ހަރަކާތްތެރިވެފައިވާ ކަމަށާއި މިއީ އެރަށުގައި ބޭއްވޭސާފުކުރުމުގެ މިފަދަ ދެ ވަނަ ހަރަކާތް ކަމަށް އިމްރާނު ވިދާޅުވި އެވެ.
ކުރިއަށް އޮތްތަނުގައިވެސް ތިން މަހުން ތިން މަހުން ރަށް ސާފުކުރުމުގެ ހަރަކާތެއް ކުރިއަށްގެންދިއުމަށް ވަނީ ހަމަޖައްސައިފަ އެވެ.
އދ.ދިގުރަށަކީ ގެސްޓްހައުސް ވަރަށް ބޮޑަށް ފުޅާވަމުން އަންނަ ރަށެކެވެ. އެގޮތުން މިހާރު އެރަށުގައި ހަ ގެސްޓް ހައުސް ހުރި އިރު އެއް ވޯޓަރ ސްޕޯޓްސް ހިންގާ ފަރާތެއްގެ އިތުރުން ތިން ޑައިވް ސެންޓަރު ވަނީ ގާއިމްވެފަ އެވެ. އެރަށަކީ 600 މީހުންގެ އާބާދީއެއް އޮންނަ ރަށެކެވެ.
