ކެނދިކުޅުދޫ ސްކޫލް ޖާގަ އިތުރުކުރުން: ފިނިޝިންގ މަސައްކަތް ނިންމަން މި ސަރުކާރުން 2 އަހަރު ވީއިރު ވެސް ކޮންޓްރެކްޓަރަށް ފައިސާ ނުދޭ
ނ. ކެނދިކުޅުދޫ ސްކޫލުގެ ޖާގައިގެ ދަތިކަން ހައްލުކުރުމަށް ފެށި މަޝްރޫއު ނިމުމަކާ ގާތްވެފައި ވަނިކޮށް، ކޮންޓްރެކްޓަރަށް ދޭންޖެހޭ ފައިސާ މި ސަރުކާރުން ނުދޭތީ މަސައްކަތް ހުއްޓިފައިވާ ކަމަށް އެ ރަށު ކައުންސިލުން ވަނީ ބުނެފަ. ފިނިޝިންގެ ކުދި މަސައްކަތްތަކެއް ނުނިމި އޮތުމުގެ ސަބަބުން އައު ދިރާސީ އަހަރުގެ ކިޔެވުމަށް ބޮޑެތި ދަތިތަކެއް ކުރިމަތިވަމުން ދާކަން ސްކޫލުން ފާހަގަކުރޭ. ކުރީ ސަރުކާރުން ބާރު ސްޕީޑުގައި ކުރިއަށް ގެންދިޔަ މި މަޝްރޫއު ނުނިމި ދިގުލައިގެން ދިއުމަކީ ރަށުގެ ރައްޔިތުންނާއި ސްކޫލުގެ ވަރަށް ބޮޑު ކަންބޮޑުވުމެއް.
ނ. ކެނދިކުޅުދޫ ސްކޫލްގެ ޖާގަ އިތުރު ކުރުމުގެ މަސައްކަތް ރައީސް ސޯލިހު ސަރުކާރުން ފެށި ނަމަވެސް މި ސަރުކާރުން އެ މަޝްރޫއު ނުނިންމާ 2 އަހަރު ވެފައިވާ ކަމަށް ކައުންސިލުން ބުނޭ | ރާއްޖެ އެމްވީ
ނ. ކެނދިކުޅުދޫ ސްކޫލުގެ ޖާގައިގެ ދަތިކަން ހައްލު ކުރުމަށް ރައީސް އިބްރާހިމް މުހައްމަދު ސޯލިހުގެ ސަރުކާރުން ފެށި މަޝްރޫއުގެ ފިނިޝިންގ މަސައްކަތް ކުރަން 2 އަހަރު ވީއިރު ވެސް މި ސަރުކާރުން ކޮންޓްރެކްޓަރަށް ފައިސާ ނުދޭތީ އެ މަސައްކަތް އަދި ވެސް ނުނިމޭ ކަމަށް އެ ރަށު ކައުންސިލް ގެ ރައީސް މުހައްމަދު ޝާހިދު ވިދާޅުވެއްޖެ އެވެ.
މި މަޝްރޫއު އަކީ 2023 ވަނަ އަހަރުގެ ޖެނުއަރީ މަހު ރައީސް ސޯލިހުގެ ސަރުކާރުން ފަށައި، ބާރު ސްޕީޑުގައި ކުރިއަށް ގެންގޮސްފައިވާ މަޝްރޫއުއެކެވެ. މިކަމުގެ މައުލޫމާތު ރާއްޖެޓީވީ އާ ހިއްސާކުރައްވާ ޝާހިދު ވިދާޅުވީ މި ސަރުކާރު ވެރިކަމާ ހަވާލުވިއިރު މަޝްރޫއު އެއްކޮށްހެން ނިމިފައިވާ ކަމަށެވެ.
އެގޮތުން ނުނިމި ހުރީ ފިނިޝިންގ މަސައްކަތް އެކަނި ކަމަށާ ނަމަވެސް އަދިވެސް އެ މަސައްކަތް ނުނިމޭ ކަމަށެވެ. ޝާހިދު ވިދާޅުވީ މަޝްރޫއު ކޮންޓްރެކްޓަރުން ނުނިންމާ ހިފަހައްޓާފައިވަނީ މި ސަރުކާރުން އެ ފަރާތަށް ދޭން ޖެހޭ ޕޭމަންޓްތަކެއް ނުދީ ހުރުމުން ކަމަށެވެ. އެގޮތުން ސަރުކާރަށް 2 އަހަރު ވީއިރު ވެސް ފައިސާ ނުދައްކާ ކަމަށް އޭނާ ވިދާޅުވި އެވެ.
މިއަހަރު މިތަނުގަ ކިޔެވުން ފެށޭނެ ކަމަށް ޕްރިންސިޕަލް ވަރަށް އުއްމީދު ކުރި. އެހެންނަމަވެސް ކޮންޓްރެކްޓަރު އަދި ބިލްޑިންގ ހަވާލެއް ނުކުރޭ މިނިސްޓްރީ އަކާ. ބެލިބެލުމުން ޕޭމަންޓެއް ހިފަހައްޓާފަ އޮތީމަ ކޮންޓްރެކްޓަރު ވެސް މަސައްކަތް ހިފަހައްޓާފަ. ވަރަށް ކުދި ކުދި މަސައްކަތް ހުންނާނީ. ކުލަ ޓަޗް ކޮށްލުން ކަހަލަ ވަރަށް ކުދިކުދި ކަންތައްތަކެއް ހުރީ. އަޅުގަނޑުމެން ކޮންޓްރެކްޓަރަށް ގުޅައިގެން ސާފުކޮށްލިން. ޕޭމަންޓް ލިބިގެން ކަމަށް ކަންކަން ނިންމާލެވޭނީ.ނ. ކެނދިކުޅުދޫ ކައުންސިލް ގެ ރައީސް މުހައްމަދު ޝާހިދު
ޝާހިދު ވިދާޅުވީ މި އަހަރުގެ ދިރާސީ އައު އަހަރު ފެށުނު އިރު ވެސް ސްކޫލް މަސައްކަތް ނުނިމުމުން ސްކޫލުން އެކަމުގެ ކަންބޮޑުވުން ފާޅު ކުރި ކަމަށެވެ.
އެގޮތުން އެ މަސައްކަތް ނިމުމުން އިތުރު 3 ކްލާސް ރޫމް ވެސް ބޭނުން ކުރެވޭނެ ކަމަށް ސްކޫލުން އުއްމީދު ކޮށް މަސައްކަތް ބައްޓަން ކުރި ނަމަވެސް މަސައްކަތް ނުނިމުމުން ވަރަށް ބޮޑު ދަތިތަކެއް ކުރިމަތި ވި ކަން ސްކޫލުގެ ފަރާތުން ފާހަގަކުރި ކަމަށް ވެސް ޝާހިދު ވިދާޅުވި އެވެ.
ޝާހިދު ވިދާޅުވީ މި މަޝްރޫއު ކުރީ ސަރުކާރުން ކުރިއަށް ގެންދިޔައީ ވަރަށް ބާރު ސްޕީޑުގައި ކަމަށެވެ. އަދި އޭރު ޕްލޭން ކުރި މުއްދަތަށް ނިމޭނެ ކަމުގެ ޔަގީންކަން އޮތް ކަމަށާ އެކަމަށް އެ ރަށު ސްކޫލުން ވަރަށް ބޮޑު އުއްމީދެއް ކުރި ކަމަށް ވެސް އޭނާ ވިދާޅުވި އެވެ.
