އެމްޓީސީސީ ނޯތު ލީގު ދެވަނަ ޑިވިޝަންގެ ގްރޫޕް ސީގެ އެންމެ ކުރީގައި އޮތް ދެޓީމް ވާދަކުރި މެޗު އެއްވަރުވެއްޖެއެވެ.

އެއްވަނާގައި އޮތް ކެނދިކުޅުދޫއާއި ދެވަނާގައި އޮތް ހޮޅުދޫ ވާދަކުރި މެޗު އެއްވަރުވީ 1-1ންނެވެ. މެޗުގައި ފުރަތަމަ ލަނޑުޖަހައި ކުރިހޯދީ ކެނދިކުޅުދޫއެވެ. ލަނޑު ޖެހީ އަބްދުﷲ ސުއާދުއެވެ. ހޮޅުދޫގައި ކުޅުނު މެޗު ނިމެން ތިން މިނިޓަށް ވެފައިވަނިކޮށް ހޮޅުދޫއަށް އެއްވަރުކޮށްދިނީ އަހުމަދު އާސިފްއެވެ. މި ގްރޫޕްގައި ކުޑަފަރީ އަތުން މޮޅުވެ މާޅެންދޫ ވަނީ ތިންވަނައަށް ޖެހިލާފައެވެ. މެޗަށް ނުކުތްއިރު ފުލުގައި އޮތް މާޅެންދޫން ކުޑަފަރި ބަލިކުރީ 3-1ންނެވެ. ހަސަން ޖަވާދު ލަނޑު ޖަހައި މާޅެންދޫއަށް ކުރިހޯދައިދީފައި ވަނިކޮށް, މުހައްމަދު ވަހީދު ކުޑަފަރިއަށް ނަތީޖާ ހަމަހަމަކޮށްދިނެވެ. ނަމަވެސް ދެވަނަ ހާފްގައި މާޅެންދޫން ވަނީ އިތުރު ދެ ލަނޑު ޖަހައި މެޗު ކާމިޔާބުކޮށްފައެވެ. ދެވަނަ ހާފްގައި ދެ ލަނޑު ޖެހީ މޫސާ މުހައްމަދާއި އިބްރާހީމް ނިޔާޒުއެވެ.

ކޮންމެ ޓީމެއް ފަސް މެޗު ކުޅެނިމުނުއިރު ކެނދިކުޅުދޫ އެއްވަނާގައި އޮތީ 10 ޕޮއިންޓާއެކުއެވެ. ހޮޅުދޫ ދެވަނާގައި އޮތީ އަށް ޕޮއިންޓާއެކުއެވެ. ތިންވަނާގައި މާޅެންދޫ އޮތީ ހަ ޕޮއިންޓާއެކުއެވެ. ކުޑަފަރި އޮތީ ހަތަރު ޕޮއިންޓާއެކުއެވެ. ކޮންމެ ޓީމަކަށް ބާކީ އޮތީ އެއް މެޗެވެ.