އެމްޓީސީސީން ކެނދިކުޅުދޫ ސްކޫލަށް ބަހެއް ހަދިޔާ ކޮށްފި

ނ. ކެނދިކުޅުދޫ ސްކޫލްގެ ދަރިވަރުންނަށް ސްކޫލަށް ދިއުމުގައި ދަތިތަކާ ދިމާވާތީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން އެ ރަށަށް ބަހެއް ހަދިޔާކޮށްފިއެވެ.

ކެނދިކުޅުދޫ ކައުންސިލްގެ ރައީސް މުހައްމަދު ރައޫފު "ރާއްޖެ އެމްވީ" އަށް މައުލޫމާތު ދެއްވި ގޮތުގައި އެ ރަށަކީ 2010 ވަނަ އަހަރުން ފެށިގެން ސްކޫލް ދަރިވަރުންނަށް ބަހުގެ ޚިދުމަތް ފޯރުކޮށްދެމުން އައި ރަށެކެވެ. މި ޚިދުމަތް ފޯރުކޮށްދެމުން އައީ އެ ރަށަކީ ބޮޑު ރަށަކަށްވެފައި ދެ އަވަށް އޮންނައިރު ސްކޫލް ހުންނަނީ ދެ އަވަށުގެ މެދަށްވާ ގޮތަށް ކަމަށްވާތީއެވެ. މީގެ ސަބަބުން ދަރިވަރުންނަށް ސްކޫލަށް ދިއުމުގައި ދަތިތަކާ ދިމާވުމުގެ ސަބަބުން ބަހުގެ ޚިދުމަތް ދޭން ފެށީ ކުދިން އަތުން ފީއެއް ނަގާ ގޮތަށް ކަމަށް އޭނާ ވިދާޅުވިއެވެ.

ރައޫފު ވިދާޅުވީ އެ ރަށުގައި ބަހުގެ ޚިދުމަތުން ކުރިން ފީއެއް ނެގި ނަމަވެސް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އެ ރަށަށް ވަޑައިގެން ވެވަޑައިގެންނެވި ވައުދުފުޅާ އެއްގޮތަށް ދަރިވަރުންނަށް ހިލޭ ބަހުގެ ޚިދުމަތް ލިބޭ ގޮތް ހައްދަވައި ދެއްވި ކަމަށެވެ. އެހެންވެ، މި ސަރުކާރު އައި ފަހުން ދަރިވަރުންނަށް ޚިދުމަތް ދެމުން އައީ ހިލޭ ކަމަށް އޭނާ ވިދާޅުވިއެވެ.

ކެނދިކުޅުދޫ ސްކޫލް ކުދިންނަށް ޚިދުމަތް ދިނުމަށް ދެ އަވަށަށް ދަތުރު ކުރާ ދެ ބަސް އޮވެއެވެ. ނަމަވެސް މިއަހަރުގެ ފެބްރުއަރީ މަހުގެ ތެރޭގައި އެއް ބަސް ހަލާކުވުމުން ބަހުގެ ޚިދުމަތް އެއްކޮށް މެދުކަނޑާލަން ޖެހުނު ކަމަށް ރައޫފު ވިދާޅުވިއެވެ. އެކަން ރަށު ސްކޫލުން މިނިސްޓްރީ އާއި ރައީސްގެ ސަމާލުކަމަށް ގެނެސްފައިވާއިރު މިދިޔަ ހަފްތާގައި ބަސް ލިބިފައިވާ ކަމަށް ވެސް އޭނާ ވިދާޅުވިއެވެ.

މިދިޔަ ހަފްތާގައި އެމްޓީސީސީން ހަދިޔާ ކޮށްފައިވާ ބަހަކީ އެ ކުންފުނީގެ އިޖުތިމާއީ ޒިންމާގެ ދަށުން ހަދިޔާ ކުރި ބަހެކެވެ. މި ބަހަކީ 46 މީހުންގެ ޖާގައިގެ ބަހެކެވެ. މި ބަސް ހަދިޔާ ކުރުމުން ކެނދިކުޅުދޫ ކައުންސިލާއި އެ ރަށު ސްކޫލުން ވަނީ ސަރުކާރާއި އެމްޓީސީސީއަށް ޝުކުރު އަދާކޮށްފައެވެ.

އެމްޓީސީސީން ބުނީ މި އެހީގެ ސަބަބުން އެ ރަށުގެ ސްކޫލްކުދިންނަށް ސްކޫލަށް ދިއުމަށް ދިމާވެފައިވާ ދަތިތަކަށް ހައްލު ލިބިގެންދާނެ ކަމަށް އުއްމީދު ކުރާ ކަމަށެވެ.

ކެނދިކުޅުދޫ ސްކޫލުގައި މިވަގުތު 433 ދަރިވަރުން ދަނީ ތައުލީމު ހާސިލް ކުރަމުންނެވެ.