ހާޓްސީން ޓްރެވެލް ފެއަރގައި ފަތުރުވެރިކަމުގެ މަންޒިލެއްގެ ގޮތުގައި ނ. ކެނދިކުޅުދޫ އިޝްތިހާރުކޮށްފިއެވެ.

ހާޓްސީން ޓްރެވެލް ފެއަރއަކީ އަމިއްލަ ކުންފުންޏެއްކަމަށް "ޕްލޭޑޭ މޯލްޑިވްސް"އިން ހުޅުމާލޭގައި ކުރިއަށްދިޔަ ފެއަރއެކެވެ. މި ފެއަރއަކީ ރާއްޖޭގެ ރަށްތަކުގައި ލޯކަލް ޓުއަރިޒަމް އިސްތިހާރުކޮށް ރަށްތަކަށް އިތުރު ފުރުސަތުތައް ހޯދައިދިނުމަށް ބޭއްވި ފެއަރއެކެވެ. ދެ ދުވަހުގެ މުއްދަތަކަށް ކުރިއަށްދިޔަ މި ފެއަރގައި ވަނީ ކެނދިކުޅުދޫގައި ހުރި ޓުއަރިޒަމްއާއި ވިޔަފާރީގެ ފުރުސަތުތައް ދައްކާލާފައެވެ.

މިފެއަރއާ ބެހޭގޮތުން "ރާއްޖެއެމްވީ"އަށް މައުލޫމާތުދެއްވަމުން ކެނދިކުޅުދޫ ކައުންސިލްގެ ސެކްރެޓަރީ ޖެނެރަލް މުހައްމަދު ހުޒާމް ވިދާޅުވީ، މިފެއަރގެ މައިގަނޑު ބޭނުމަކީ ކެނދިކުޅުދޫ މުޅި ރާއްޖެއަށް ތައާރަފްކޮށްދިނުންކަމަށެވެ. އެގޮތުން މިފެއަރގެ ތެރޭގައި ކެނދިކުޅުދޫގައި ކުރާ މަސައްކަތްތަކާއި ރަށުގައި އުފައްދާ އުފެއްދުންތަކާއި ރަށުގެ މައުލޫމާތު ދައްކާލާފައިވާނެކަމަށް ހުޒާމް ވިދާޅުވިއެވެ.

ދެ މަސްދުވަސްވަންދެން މުޅި ރަށުގެ ހުރިހާ ރައްޔިތުން މިފެއަރއަށް ތައްޔާރުވެފައިވާއިރު ކެނދިކުޅުދޫއަށް ލިބިފައިވާ އެންމެ ޚާއްސަ ސިފަކަމުގައިވާ އެރަށުގެ ކުޅިތަކާބެހޭ މައުލޫމާތާއި ކުޅިތަކުގެ އުޅޭ ޚާއްސަ ދޫނިސޫފާސޫތްޕާއި ކުޅިތަކުގައި ހެދޭ ގަސްގަހާގެހީގެ މައުލޫމާތު، ފެއަރގައި ދީފައިވާނެކަމަށް ހުޒާމް ވިދާޅުވިއެވެ.

ދެދުވަހުގެ މުއްދަތަށް ކުރިޔަށްދިޔަ މިފެއަރއަށް ދެހާސް މީހުން ވަދެފައިވާނެކަމަށް ހުޒާމް ވިދާޅުވިއެވެ.

މިފެއަރއާއެކު ލިބޭ އެންމެ ބޮޑު ފައިދާއަކީ ކެނދިކުޅުދޫ މަޝްހޫރުވެ ކެނދިކުޅުދޫގެ ބިންވެރިކަމާއި ލޯކަލް ޓޫރިޒަމާއި އެނޫންވެސް ވިޔަފާރިތަކަށް ރަށުގައި ހުރި ފުރުސަތުތައް އެނގިގެންދިއުންކަމަށް ހުޒާމް ވިދާޅުވިއެވެ. މިއާއެކު ކެނދިކުޅުދޫގައި އެކި ވިޔަފާރިތަކަށް އިންވެސްޓްކުރާނެ އިންވެސްޓަރުން ލިބިގެންދާނެކަމަށް އުންމީދުކުރައްވާކަމަށް ހުޒާމް ވިދާޅުވިއެވެ.

ކެނދިކުޅުދޫއަކީ ފަތުރުވެރިކަމުގެ މަންޒިލެއްގެގޮތުގައި ދިވެހިންނާއި ބޭރުން އަންނަ މީހުންނަށް އިޝްތިހާރުކުރުމަށް ކުރިއަށް ގެންދިޔަ ހަރަކާތުގައި ވަނީ، އެރަށުން ފާހަގަކޮށްލެވޭ ކެއުންތައް ދައްކާލައި ރަހަބަލާލުމުގެ ފުރުސަތު ފަހިކޮށްދީފައެވެ. އެގޮތުން ވަކިން ޚާއްސަކޮށް ކަނަމަދުގެ ބާވަތްތައް ދައްކާލާފައިވާކަމަށް ހުޒާމް ވިދާޅުވިއެވެ.

އަދި ރަށުގެ އާދަކާދައާއި ސަގާފަތް ވަނީ ދައްކުވައިދީފައެވެ. މީގެ އިތުރަށް އެ ރަށުގެ 3ޑީ މޮޑެލްއެއް މެދުވެރިކޮށް ރަށުގައި ހުރި ފުރުސަތުތަކާއި ރަށުގެ މައުލޫމާތުތައްވެސް ވަނީ ފެއަރއަށް ޒިޔާރަތްކުރި މީހުންނަށް ހިއްސާކޮށްފައެވެ. މިމޮޑެލްގެ ޒަރީއާއިން ކެނދިކުޅުދޫގެ ތާރީޚާއި ކެނދިކުޅުދޫ އުފެދިފައިވާ ގޮތާއި ރަށުގެ ސިފަތައް ކިޔައިދީފައިވާއިރު، އެކަމުގެ ސަބަބުން ރަށަށް މީހުން އައުމަށް ބާރަކަށް ވެގެންދާނެކަމަށް ހުޒާމް ވިދާޅުވިއެވެ.

މީގެއިތުރުން މިއަހަރުގެ ޑިސެމްބަރ މަހު ހަމަ މިފަދަ ފެއަރއެއް ށ، ނ، ރ، ބ އަދި ޅ އަތޮޅަށް ޚާއްސަކޮށް ކެނދިކުޅުދޫގައި ބޭއްވުމަށް ހަމަޖެހިފައިވާކަމަށް ހުޒާމް ވިދާޅުވިއެވެ.

ގުދުރަތީގޮތުން މުއްސަނދި ނ. ކެނދިކުޅުދޫއަކީ ހިތްގައިމު ރަށެކެވެ. މުޅި ރަށަށް ލިބިގެންވާ އެންމެ ޚާއްސަ އެއް ސިފައަކީ ގިނަ ކުޅިތަކެއް ހިމެނުމެވެ. މިއީ ރާއްޖޭގެ ނިސްބަތުންވެސް ވަރަށް މަދު ރަށަކުން ނޫނީ ނުފެންނަ ސިފައެކެވެ. ގާތްގަނޑަކަށް 207 ހެކްޓަރުގެ މި ރަށުގައި ގުދުރަތީގޮތުން އުފެދިފައިވާ 7 ކުޅި އެބައޮތެވެ. މީގެ ތެރޭގައި 400 ފޫޓުން ފެށިގެން 3000 ފޫޓާއި ދެމެދުގެ ދިގުމިންހުރި 3 ކުޅިއެއް ހިމެނެއެވެ. މި ކުޅިތަކުގައި ކަނޑޫފަލާއި، އާއްމުކޮށް ނުފެންނަ ގިނަ ދޫނިސޫފާސޫތްޕާއި، މަސްމަހާމެއްސާއި، އެކި ބާވަތުގެ ގަސްގަހާގެހި ހިމެނެއެވެ.