ކެނދިކުޅުދޫ ޕޮލިސް ސްޓޭޝަން ހުޅުވައިފި

ނ. އަތޮޅު ކެނދިކުޅުދޫގައި ފުލުހުންގެ މަރުކަޒެއް ރަސްމީކޮށް ހުޅުވައި ޚިދުމަތްދޭން ފަށައިފިއެވެ.

އެކަމަށްޓަކައި ކެނދިކުޅުދޫގައި ބޭއްވި ހާއްސަ ރަސްމިއްޔާތުގައި އެ ޕޮލިސް ސްޓޭޝަން ހުޅުވައިދެއްވީ މިނިސްޓަރ އޮފް ހޯމްއެފެއާޒް އިމްރާން ޢަބްދުﷲ އާއި ކޮމިޝަނަރ އޮފް ޕޮލިސް މުޙައްމަދު ހަމީދް އެވެ. އަދި ޕޮލިސް ސްޓޭޝަން ހުޅުވައި ދެއްވުމަށްފަހު ޕޮލިސް ސްޓޭޝަންގައި ގައުމީ ދިދަ އާއި ފުލުހުންގެ ދިދަ ނަންގަވައި ދެއްވާފައިއެވެ.

Advertisement

އެ ރަސްމިއްޔާތުގައި، ޑެޕިއުޓީ ކޮމިޝަނަރ އޮފް ޕޮލިސް ޢަބްދުލް މަންނާން ޔޫސުފާއި ފުލުހުންގެ އެގްޒެކެޓިވް އޮފިސަރުންނާއި، ކޮމިޝަންޑް އޮފިސަރުންނާއި ނޯތު ޕޮލިސް ރީޖަން ކޮމާންޑަރު އަދި ނ. އަތޮޅު ކޮމާންޑަރާއި ކެނދިކުޅުދޫ ކައުންސިލް އިދާރާގެ އިސްވެރިންނާއި ރަށުގެ މުއައްސަސާތަކުގެ ވެރިން ބައިވެރިވެވަޑައިގެންނެވިއެވެ.

މި ރަސްމިއްޔާތު ޝަރަފުވެރިކޮށްދެއްވައި މިނިސްޓަރ އޮފް ހޯމް އެފެއާޒް އިމްރާން ޢަބްދުﷲ ދެއްކެވި ވާހަކަ ފުޅުގައި، މީހުން ދިރިއުޅޭ ހުރިހާ ރަށެއްގައި ފުލުހުންގެ ހިދުމަތް ގާއިމުކުރުމުގެ މަސައްކަތުގެ ތެރެއިން، ކޮންމެ ރަށެއްގައި ގާއިމުކުރާ ޕޮލިސް ސްޓޭޝަނަކީވެސް ރާއްޖޭގެ އަމާންކަން ކަށަވަރުކުރުމަށް ސަރުކާރުން ގަތާލާ ޗޭނުގެ ބޮޅެއްކަމުގައި ވިދާޅުވިއެވެ. އަދި ރާއްޖޭގެ އަމާންކަމާއި ސުލްހަވެރިކަން ކަށަވަރުކުރުމަށް، މީހުން ދިރިއުޅޭ 187 ރަށުގައި ފުލުހުން ގާއިމުވުމުން މެނުވީ މި ޗެއިން ނުވަތަ މި ބޮޅު އެއްކޮށް ފުރިހަމަ ވެގެން ނުދާނެކަމަށް މިނިސްޓަރ ފާހަގަކުރެއްވިއެވެ.

އެގޮތުން ސްޓޭޝަނަކުން ސްޓޭޝަނަކުން ގުޅުވަމުންގޮސް މުޅި ރާއްޖޭގެ ހުރިހާ ރަށެއްގައި ސްޓޭޝަންތައް ގާއިމު ކުރެވުމުން އޭގައި ޖައްސަންވީ ރީތިކުލަޔާއި ހަމައަށްދެވޭނެކަމާއި، އެންމެ ފުރަތަމަ އެންމެ އާދައިގެ ގޮތެއްގައި އެންމެ ކުޑަމިނުން ހިދުމަތް ފަށައިލުން އެއީ މި ޗެއިން ދެކޮޅު ޖެއްސުމަށްޓަކައި ކުރަންޖެހޭ މަސައްކަތްކަމަށް ވިދާޅުވިއެވެ. އަދި އެއަށްފަހު ހިދުމަތް ފުރިހަމަކޮށް ތަރައްގީކޮށް އޭގައި ޖައްސަންޖެހޭ ރީތި ކުލަތައް ޖެއްސުމަށް އެ މަސައްކަތް ފަށައިގަނެވޭނެކަމަށް ވިދާޅުވިއެވެ. އެގޮތުން މިއަދު މިކުރެވޭ މަސައްކަތަކީ އެންމެ އާދައިގެ ގޮތެއްގައި ނަމަވެސް އެ ހިދުމަތް ގާއިމު ކުރުމަށް ކުރެވޭ ބުރަ މަސައްކަތް ކަމަށް މިނިސްޓަރ ވިދާޅުވިއެވެ.

ރަސްމިއްޔާތުގައި ކޮމިޝަނަރ އޮފް ޕޮލިސް މުހައްމަދު ހަމީދު ދެއްކެވި ވާހަކަ ފުޅުގައި، ކެނދިކުޅުދޫގައި ޕޮލިސް ސްޓޭޝަނެއް ގާއިމުކުރުމުގެ އެންމެ ބޮޑު އެއްބޭނުމަކީ ރައްޔިތުންނަށް ރައްކާތެރި މާހައުލެއް ގާއިމުކޮށްދިނުން ކަމަށާއި އަދި ރަށަކީ ބޮޑު އާބާދީއެއް އޮތް ރަށަކަށްވުމާއި ގުޅިގެން މަދުން ނަމަވެސް ރަށުގައި ހިންގާ ކުށްތަކާއި ރަށަށް ތައާރަފު ވުމަށް އޮތް ކުށްތަކުން ރަށުގެ މުޖުތަމައު ސަލާމަތްކޮށް ރައްކާތެރިކޮށް ދެމެހެއްޓުމަށްޓަކައި ކެނދިކުޅުދޫގައި ފުލުހުން ގާއިމުވެ ތިބުމަކީ މުހިންމު ކަމެއްކަން ފާހަގަކުރެއްވިއެވެ. އަދި ފުލުހުންގެ މުއައްސަސާގެ ހިންގުން މިހާރަށްވުރެވެސް ހަރުދަނާކޮށް ރައްޔިތުންނަށް ފޯރުކޮށްދޭ ހިދުމަތްތަކުގެ ފެންވަރު މަތިކޮށް ހިދުމަތް ކުރިއެރުވުމަށް ބޭނުންވާ ބަދަލުތައް މިއަދު މިއަންނަނީ ފެންނަމުންކަމަށް ވިދާޅުވިއެވެ. އެގޮތުން އަތޮޅުތެރޭގައި ފުލުހުން މަސައްކަތްކުރާނެ ރަނގަޅު އޮނިގަނޑެއް އެކުލަވާލެވިފައިވާކަމަށާ އަދި ރަށުގެ މުޖުތަމައު އަށް ކައުންސިލް އަދި ރަށު ފެންވަރުގެ އެހެނިހެން އިދާރާތަކާއެކު ދެމެހެއްޓެނިވި މަސައްކަތްތަކެއް ހަރުދަނާކަމާއެކު ކުރުމަށް ކުރިއަށް އޮތްތަނުގައި މި އޮނިގަނޑުން މަގުފަހިވެގެން ދާނެކަމަށް ވިދާޅުވިއެވެ.

އޭގެ އިތުރުން ގެވެށި އަނިޔާއާއި ކުޑަކުދިންނާމެދު ކުރާ ކުށްތަކާއި އިޖުތިމާއީ މިންގަނޑުތަކާއި ހިލާފު މައްސަލަތަކުގެ ސަބަބުން ނުކުންނަ އެތައް މައްސަލަތަކަށް ހައްލުހޯދައިދިނުމަށް ފަސޭހަވެ އަދި އެކި ކާރިސާތަކުގެ ހާލަތުގައި ފުލުހުންގެ އެހީތެރިކަން ރައްޔިތުންނަށް ފޯރުކޮށްދިނުމަށް އިތުރު ފަސޭހަތަކެއް ވެގެންދާނެކަމަށާއި އަދި ފުލުހުން ތިބުމުން އިޖުތިމާއީ އަދި އިގުތިޞާދީ ތަރައްގީއަށް ރަށުގެ ރައްޔިތުން ކުރަމުންގެންދާ މަސައްކަތްތަކަށް އިތުރު އެހީތެރިކަމެއް ލިބިގެންދާނެކަމުގައި ފާހަގަކުރެއްވިއެވެ.