ނ. ކެނދިކުޅުދޫގައި ކުރިއަށްގެންދިޔަ ކޭމްޕުގައި ކުޅުނު އެކުވެރިކަމުގެ ފަހު މެޗުގައި ކެނދިކުޅުދޫ ފުޓްބޯލް ކުލަބު އަތުން ފަސޭހަކަމާއެކު އެންމެ ފަހުގެ ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން މޮޅުވެއްޖެއެވެ.

ހުކުރު ދުވަހުގެ ހަވީރު ކެނދިކުޅުދޫ ޓާފް ދަނޑުގައި ކުޅުނު މި މެޗުން މާޒިޔާ މޮޅުވީ 9-1 ގެ ތަފާތު ބޮޑު ނަތީޖާއަކުންނެވެ.

މި މެޗުގައި މާޒިޔާއިން މޮޅު ކުޅުމެއް ދެއްކިއިރު، މާޒިޔާގެ ލަނޑުތައް ޖަހައިދިނީ ހެޓްރިކް ހެދި އަބްދުﷲ ޖުނައިދާއި، ދެ ލަނޑު ޖެހި ހައިޝަމް ހަސަން (ބިޑި) ގެ އިތުރުން ކޮނޭލިއަސް ސްޓެވާޓް (ކޯނޭ) އާއި، ކެޕްޓަން އަސަދުﷲ އަބްދުﷲ (އަސަކޮ) އަދި މުޙައްމަދު އުމެއިރެވެ. އަދި މި މެޗުގައި ކެނދިކުޅުދޫގެ ކުޅުންތެރިއެއްގެ އަތުން ބައިކޮޅަށް ވަނީ ލަނޑެއް ވަދެފައެވެ.

މި މެޗުން މާޒިޔާ މޮޅުވިއިރު، މި ކޭމްޕުގައި ކުޅުނު ފުރަތަމަ މެޗުގައިވެސް މާޒިޔާ ވާދަކުރީ ކެނދިކުޅުދޫއާއެވެ. އެ މެޗުން މާޒިޔާ މޮޅުވީ 9-0 ގެ ނަތީޖާއަކުންނެވެ. އަދި ކޭމްޕުގެ ދެވަނަ މެޗުގައި މާޅެންދޫ އަތުން 11-0 ގެ ތަފާތު ބޮޑު ނަތީޖާއަކުން މާޒޮޔާ މޮޅުވިއިރު، ތިންވަނަ މެޗުން ވަނީ މާފަރު އަތުން 9-1 ގެ ތަފާތު ބޮޑު ނަތީޖާއަކުން މޮޅުވެފައެވެ.

މާޒިޔާއިން ކެނދިކުޅުދޫގައި ކުރިއަށްގެންދިޔަ ކޭމްޕުން ފާހަގަކޮށްލެވުނު ކެނދިކުޅުދޫ ޓީމުގެ އުމުރުން 19 އަހަރުގެ ގޯލްކީޕަރު އިސްމާޢީލް ރާއިފް މިހާރު ވަނީ މާޒިޔާއަށް ސޮއިކޮށްފައެވެ. މާޒިޔާއިން ކުރިއަށްގެންދިޔަ ތަމްރީނުތަކުގައިވެސް މީގެ ކުރިން ރާއިފް ބައިވެރިވިއިރު، އޭނާ ވަނީ މާޒިޔާއާ ދެކޮޅަށް ކުޅުނު ދެ މެޗުގައިވެސް މޮޅު ކުޅުމެއް ދައްކާފައެވެ.

ކުރިއަށް އޮތް ސީޒަނަށް ތައްޔާރުވާން މާޒިޔާއިން ކެނދިކުޅުދޫގައި ކޭމްޕުކުރިއިރު، އައު ސީޒަނާ މާޒިޔާއިން ކުރިމަތިލާނީ ޕްރޯ ލައިސަންސް ކޯޗު މުޙައްމަދު ޝިޔާޒް (މޯހަން) ގެ އިރުޝާދުގެ ދަށުންނެވެ. އަދި އައު ސީޒަނަށް ސްކޮޑު ވަރުގަދަކުރުމުގެ ގޮތުން މާޒިޔާއިން ވަނީ ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) އާއި، ޒުވާން ޑިފެންޑަރު ހައިޝަމް ހަސަން (ބިޑި) އަދި ނޭޕާލުގެ ގައުމީ ފުޓްބޯޅަ ޓީމުގެ އެއްވަނަ ގޯލްކީޕަރު ކިރަން ކުމާރް ލިމްބޫ އެ ޓީމަށް ގެނެސްފައެވެ.

މި މަހުގެ 15 ވަނަ ދުވަހު ރާއްޖޭގެ ފުޓްބޯޅަ ސީޒަން ފަށާއިރު، ސީޒަން ފެށުމަށް ކުޅޭ ޗެރިޓީ ޝީލްޑް މެޗުގައި ބައްދަލުކުރާނީ މާޒިޔާ އާއި މިދިޔަ ސީޒަނުގެ ލީގުގެ ދެވަނަ ހޯދި ކުލަބު ވެލެންސިއާއެވެ. މިދިޔަ ސީޒަނުގެ ޗެރިޓީ ޝީލްޑް މެޗުގައިވެސް މާޒިޔާ ވާދަކުރިއިރު، އެ މެޗުން ކުލަބު އީގަލްސް ވަނީ މާޒިޔާ ބަލިކޮށް މުޅިން އަލަށް ޗެރިޓީ ޝީލްޑް އުފުލާލާފައެވެ. އޭރު އީގަލްސްގެ ކޯޗަކަށް ހުރީ މިހާރު މާޒިޔާގެ ކޯޗު މޯހަންއެވެ.

ޗެރިޓީ ޝީލްޑް މެޗަށްފަހު މި މަހުގެ 19 ވަނަ ދުވަހު ޕްރެޒިޑެންޓްސް ލީގު ފަށާއިރު، ކުރިއަށް އޮތް ސީޒަނުގެ ދިވެހި ޕްރިމިއާ ލީގު ފެށުމަށް ތާވަލުކޮށްފައިވަނީ އަންނަ އަހަރުގެ ފެބްރުއަރީ މަހުގެ ތެރޭގައެވެ. މާޒިޔާއަކީ އެންމެ ފަހުގެ ދެ ސީޒަނުގެވެސް ލީގު ޗެމްޕިއަނުންނެވެ.