އަނިޔާވެރިކަން ނައްތާލުމުގެ މައްޗަށް ތަރުތީބު ކުރެވިފައިވާ ބާރަކަށް ޝަރުއީ ކޯޓުތައް ހެދޭނީ، މިނިވަން މާހައުލެއް އޮތް ފަނޑިޔާރުގެ އެއް އޮވެގެން: ފަނޑިޔާރު ޢަބްދުލްޣަނީ މުޙައްމަދު
8 ފެބުރުއަރީ 2026 | އާދީއްތަ 19:31ޤަޟާޢީ އަހަރު 2026 އިފްތިތާހުކުރުމުގެ ރަސްމިއްޔާތުގައި އުއްތަމަފަނޑިޔާރު ވަނީ ކޯޓުތަކުގެ މިނިވަންކަން ކަށަވަރު ކުރުމަކީ ދައުލަތުގެ އެންމެންގެ ޒިންމާއެއްކަން ފާހަގަކުރައްވާފަ. މީގެ އިތުރުން، ކޯޓުތަކުގެ ހިންގުމާއި، ޚިދުމަތްތައް ރަނގަޅުކުރުމަށް މަސައްކަތް ކުރައްވާ ކަމަށް ވެސް އެ މަނިކުފާނު ވިދާޅުވި.
އުއްތަމަ ފަނޑިޔާރު އަބްދުލް ޣަނީ މުހައްމަދު, ޤަޟާއީ އަހަރު އިފުތިތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަނީ | ސްކްރީން އިމޭޖް
އަނިޔާވެރިކަން ނައްތާލުމުގެ މައްޗަށް ތަރުތީބުކުރެވިފައިވާ ބާރަކަށް ޝަރުއީ ކޯޓުތައް ހެދޭނީ ފަނޑިޔާރުގެ އަކީ އެންމެހާ ނުފޫޒުތަކުން އެއްކިބާވެ ތިބެ، މަސައްކަތ ކުރެވޭނެ މިނިވަން މާހައުލެއް ގާއިމްވެފައިވާ ތަނަކަށް ވެގެން ކަމަށް އުއްތަމަފަނޑިޔާރު ޢަބްދުލްޣަނީ މުޙައްމަދު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ޤަޟާޢީ އަހަރު 2026 އިފްތިތާހުކުރުމަށް އާދިއްތަ ދުވަހުގެ ރޭ ބޭއްވި ރަސްމިއްޔާތުގައި ޤަޟާޢީ ބަޔާން އިއްވަވަމުންނެވެ. އަދުލު އިންސާފު ގާއިމް ކުރުމުގެ ބާރަކީ ދައުލަތުގެ ހުރިހާ ބަހާތަކެއްގައި އަދުލުވެރިކަން ގާއިމް ކުރެވޭކަން ކަށަވަރުކުރުމުގެ މައްޗަށް ތަރުތީބުވެފައިވާ ބާރަކަށް ވާން ޖެހޭ ކަމަށް ވެސް އެ މަނިކުފާނު ވިދާޅުވި އެވެ.
"ރާއްޖޭގެ ޖުމުހޫރިއްޔާގައި ކޯޓުތަކުގެ މިނިވަންކަން ރައްކާތެެރިކޮށްދީ އެތަންތަނަކީ ކޮންމެ މީހަކަށް މައްސަލަ ހުށަހެޅޭ ވަކި ފަރާތަކަށް ނުޖެހި ހަރުދަނާ ގޮތެއްގައި މަސައްތަތް ކުރާ ތަންތަނަކަށް ހެދުމަކީ ދައުލަތުގެ އެންމެހާ ކަންކަން ހިންގެވުމާއި ހަވާލުވެ ތިއްބެވި އެންމެންގެ ޒިންމާ އެއް ކަމުގައި ބަޔާންކޮށްފައި ވަނީ މި މަގްސަދުގައި." އުއްތަމަ ފަނޑިޔާރު ވިދާޅުވި އެވެ.
މީގެ އިތުރުން ކޯޓުތަކުގެ މަސައްކަތް ހަލުވި ކުރުމަށް، ޝަރުއީ ކޯޓުތަކުގެ މަސައްކަތްތައް ޑިޖިޓަލައިޒް ކުރުމުގެ މަސައްކަތް މިހާރު ޖުޑީޝަލް އެޑްމިނިސްޓްރޭޝަނުން ކުރަމުންދާ ކަމަށް އެ މަނިކުފާނު ވިދާޅުވި އެވެ. އެގޮތުން ކުށުގެ ރެކޯޑް ސާފުކުރުމަށް މެނުއަލްކޮށް ކުރަމުން އަންނަ މަސައްކަތް އެކަމަށް ޚާއްސަ ޑޭޓާ ބޭސް އެއް މެދުވެރިކޮށް ޒަމާނާއި އެއްހަމަ ކުރުމުގެ މަސައްކަތް ކުރަމުންދާ ކަމަށް އެ މަނިކުފާނު ވިދާޅުވި އެވެ. އެ މަސައްކަތް ނިމުމުން ކުރިން ކުށުގެ ރެކޯޑް ސާފުކުރުމަށް ހޭދަވާ 7 ދުވަހުގެ މުއްދަތު 1 ދުވަހަށް ބަދަލުވާނެ ކަމަށް އުއްތަމަ ފަނޑިޔާރު ވިދާޅުވި އެވެ.
"ޝަރީއަތުގެ މަޖިލީހުގައި ދެ ފަރާތުން ހުށަހަޅާ ބަޔާން ތާނަ އަކުރުން އަކުރަށް ލިޔުމުގެ މަސައްކަތުގެ ފޮނިމީރުކަން އަދި ނުލިބޭތީ މި މަސައްކަތް ވެސް ޚާއްސަ އިސްކަމެއް ދީގެން ކުރުމަށް ޖުޑީޝަލް އެޑްމިނިސްޓްރޭޝަނަށް ވާނީ އިރުޝާދު ދީފައި." ޢަބްދުލްޣަނީ ވިދާޅުވި އެވެ.
އެ ޖަލްސާގައި ވާހަކަދައްކަވަމުން އުއްތަމަ ފަނޑިޔާރު ވަނީ ޝަރުއީ ދާއިރާ އަށް ދިމާވެފައިވާ ބައެއް ދަތިތަކަށް އަލިއަޅުވާލައްވާފަ އެވެ. ކުރިން ޝަރުއީ ދާއިރާގެ މުވައްޒަފުންގެ މުސާރަ މުރާޖައާ ނުވުމުގެ ސަބަބުން ގިނަ ދަތިތަކެއް ދިމާވި ކަމަށާއި ކޯޓުތަކަށް ދިމާވެފައިވާ ޖާގައިގެ ދަތިކަމަކީ ވެސް ބޮޑު މައްސަލަ އެއް ކަމަށް ވިދާޅުވި އެވެ.
މީގެ އިތުރުން ކޯޓުތަކުގެ އިދާރީ އޮނިގަނޑަށް ގެންނަން ޖެހޭ ބަދަލުތައް ގެނައުމަށް ވެސް މަސައްކަތްތަކެއް ކުރެވެމުންދާ ކަމަށް އުއްތަމަފަނޑިޔާރު ވިދާޅުވި އެވެ. އެ މަނިކުފާނު ވަނީ ކޯޓުތައް ހިނގާ ނިޒާމް ދެމެހެއްޓެނެވި ގޮތެއްގައި މޮނިޓަރ ކުރުމަކީ ވެސް މުހިންމު ކަމެއް ކަމަށް ވިދާޅުވެފަ އެވެ.
