ސައީދުގެ ހުކުމާއެކު އެނގިގެންދިޔައީ ވަކި ފަރާތަކުން އަންގާ ގޮތަށް ހުކުމް ކުރާކަން - މައުރޫފް
ދެދުވަހުން އެއްދުވަހު ކަހަލަ ގޮތަކަށް ޝަރީއަތް ކުރިއަށް ގެންދިޔައީ އެތައްހާސް މައްސަލަތައް ފުނިޖެހިފައި ހުއްޓާ
އެމްޑީޕީ ގާނޫނީ ވަކީލުންގެ ޓީމުގެ މެންބަރު އަހުމަދު މައުރޫފް
ފެނަކައިގެން ކުރީގެ މެނޭޖިންގ ޑިރެކްޓަރު އަހުމަދު ސައީދު މުހައްމަދު އަށް އިއްވި ހުކުމާއެކު ޖުޑިޝަރީ މިނިވަން ނޫން ކަމާއި، ވަކި ފަރާތަކުން އަންގާ ގޮތަކަށް ހުކުމް ކުރާކަން އެނގިގެން ދިޔަކަމަށް އެމްޑީޕީ ގެ ލީގަލް ޑިރަކްޓަރ އަހުމަދު މައުރޫފް ވިދާޅުވެއްޖެއެވެ.
އެމްޑީޕީގެ ގާނޫނީ ވަކީލުންގެ ޓީމުން ބޭއްވި ނޫސްވެރިންގެ ބައްދަލުވުމުގައި މައުރޫފް ވިދާޅުވީ އެއްވެސް ދިވެހި ރައްޔިތަކާ މެދު ބޭއިންސާފުން ކަމެއްކުރާކަމުގައިވާނަމަ ނުވަތަ ދައުލަތުން އަނިޔާކުރާނަމަ އެވާހަކަ ދައްކާނެ ކަމަށެވެ. މައުރޫފް ވިދާޅުވީ ފެނަކައިގެ ކުރީގެ އެމްޑީ ސައީދުގެ މައްސަލައިގައި ތަހުގީގު ކުރެވުނު އިރުވެސް އަދި ޝަރީއަތް ކުރިއަށް ދިޔައިރު ވެސް ދެދުވަހުން އެއްދުވަހު ކަހަލަ ގޮތަކަށް ޝަރީއަތް ކުރިއަށް ގެންދިޔައީ އެތައްހާސް މައްސަލަތައް ފުނިޖެހިފައި ހުއްޓާ ކަމަށެވެ.
މައުރޫފް ވިދާޅުވީ އެތައް މައްސަލައެއް ހުއްޓާވެސް ސައީދުގެ މައްސަލަ އަވަސް އަރުވާލައިގެން ކުރިއަށް ގެންދިއުމުން ވެސް އެއްޗެއް ބުނެފައި ނުވާނެ ކަމަށާއި، އެއީ ޖުޑިޝަރީ އެއްވެސް ނުފޫޒެއް ނެތި މިނިވަންކަމާއެކު ކުރިއަށްދާންޖެހޭނެ ކަމަށް ދެކޭތީ ޕާޓީ އިން ވެސް އަދި އެއްވެސް މީހަކުވެސް އެކަމާއި އެއްޗެއް ބުނެފައި ނުވާނެ ކަމަށެވެ. ނަމަވެސް ސައީދު އަށް އިއްވި ހުކުމާއެކު ޖުޑިޝަރީ މިނިވަން ނޫން ކަމާއި، ވަކި ފަރާތަކުން އަންގާ ގޮތަކަށް ހުކުމް ކުރަން ފެށީ ކަން އެނގިގެން ދިޔަކަމަށް މައުރޫފް ވިދާޅުވިއެވެ.
ކޮށްފައި އޮތް ދައުވާއަށް ބަލާއިރުގައި، ދައުލަތުގެ ފަރާތުން ދައުވާ ކުރީ ޕްރޮސެކިއުޓަރ ޖެނެރަލް. ޕްރޮސެކިއުޓަރ ޖެނެރަލް އަދަބު ކަނޑައެޅުމުގެ މަރުހަލާގައި އެދުނު އަދަބަށްވުރެ މާބޮޑު އަދަބެއް ކަނޑައަޅާފައި މިއޮތީ. ދެން އެކަމާއި މެދު ވިސްނާލާ އިރު އިނގޭ އެއީ ދައުވާ ކުރާ ފަރާތުން އެދިގެން ނުވަތަ ދައުވާއާއި ގުޅިގެން ކަނޑައެޅުނު އަދަބެއް ނޫންކަން. އެއީ ސަރުކާރުން އަންގައިގެން، ރައީސުލްޖުމްހޫރިއްޔާގެ ފަރާތުން އަންގައިގެން ކުރި ހުކުމެއް ކަން އަޅުގަނޑުމެންނަށް އެބައިނގޭ.އެމްޑީޕީ ގާނޫނީ ވަކީލުންގެ ޓީމުގެ މެންބަރު އަހުމަދު މައުރޫފް
މަައުރޫފް ވިދާޅުވީ މި މައްސަލައިގެ މާގިނަ ވާހަކަތަކެއް ދެކެވިފައިނުވާތީ ހަގީގަތް އޮޅިފައިވާ ކަމަށާއި، ސަރުކާރުން ގިނަ މީޑިއާތަކެއް ކޮންޓްރޯލް ކުރާ އިރު އެ މީޑިއާތަކުން ޕްރޮޕެގެންޑާ ފަތުރަމުން އަންނަ ކަމަށެވެ.
މައުރޫފް ވަނީ ބްލޭޒަން އާއެކު ހެދި އެއްބަސްވުމާއި ސެޓްލްމަންޓް އެގްރީމަންޓް ހަދަންޖެހެނު ސަބަބު ވެސް ތަފްސީލުކޮށްދެއްވާފައެވެ.
މުޅީ މައްސަލައަކީ ސައީދު މެނޭޖިންގ ޑިރެކްޓަރުކަމުގައި ހުންނަވައިގެން ސޮއިކުރި ކަމަށް ބުނެ އެ ސޮއިކުރި ކުރުމަކީ ވަކި ބަޔަކަށް ނާޖާއިޒް ފައިދާ ހޯދައިދިނުމަށް ކުރިކަމެއް ކަމަށް ބުނެ ދައުލަތުން ކުރި ދައުވާއެއް. މި މައްސަލައިގައި އެކަމުގައި ކަން ހިނގާފައިވާ ގޮތަށް ބަލާއިރު، ސައީދު މަގާމާއި ހަވާލުވުމުގެ މާ ކުރިން އެއްބަސްވުމެއް އެއީ ބަޔަކާއި ރިޓައިނާ ބޭސިސްގައި މަސައްކަތް ހަވާލުކުރަން. ދެން ބައެއްފަހަރު މަސައްކަތް ހަވާލުކޮށްފައި އަނެއްބައި ފަހަރު މަސައްކަތް ހަވާލުނުކޮށް އޮތީ. ސައީދު މަގާމާއި ހަވާލުވި އިރުގައި އެފަރާތުން ޝަކުވާ އަދި މައްސަލަ ފެނަކައިގައި ޖައްސަމުން ދިޔައީ އެއްބަސްވި އަގު އެފަރާތަށް ދޭން. ރިޓައިނާ ބޭސިސްގައި ހަވާލުކުރާ މަސައްކަތަކީ މަހުން މަހަށް ދޭންޖެހޭ އަގު މަސައްކަތެއް ހަވާލުކުރިޔަސް ނުކުރިޔަސް ދޭންޖެހޭ. ސައީދު މަގާމާއި ހަވާލުވުމަށްފަހު ވަކިގޮތެއް ނުނިމި ހުރި ގިނަ މައްސަލަތަކުގައި ގޮތެއް ނިންމުމަށް މަސައްކަތް ކުރީ ކުންފުނީގެ އެކިއެކި ޑިޕާޓްމަންޓުގެ ލެވެލްގައި ހާއްސަކޮށް ލީގަލް ޑީޕާޓްމަންޓުގެ ލަފާ އެކީގައި. ސައީދު މަސައްކަތް ކޮށްފައި އޮތީ ގާނޫނާއި އެއްގޮތަށް ޒިންމާދާރުކަމާއެކީގައި އެ މަގާމުގައި ހުންނަވާ ބޭފުޅަކު އަމަލުކުރަންޖެހޭ ގޮތަށް.އެމްޑީޕީ ގާނޫނީ ވަކީލުންގެ ޓީމުގެ މެންބަރު އަހުމަދު މައުރޫފް
މައުރޫފް ވިދާޅުވީ މި މައްސަލައިގައި ކުންފުނީގެ ގާނޫނީ ލަފާ ހޯދާފައިވާ ކަމަށާއި، އެ ލަފާގައި ފާހަގަކޮށްފައި އޮންނަނީ ގެއްލުމުގެ ބަދަލު ހޯދުމަށް ދައުވާއެއް ކޮށްފި ނަމަ ފެނަކައިން މާބޮޑު އަދަދެއް ދައްކަންޖެހިދާނެ ކަމަށާއި، އެހެންކަމުން ކުންފުންޏަށް އެންމެ ރަނގަޅު ގޮތަކީ ސެޓަލްމެންޓް އެގްރީމެންޓެއްގައި ސޮއިކުރުން ކަމަށެވެ.
މައުރޫފް ވިދާޅުވީ ސެޓްލްމަންޓް އެގްރީމެންޓަކަށް ދިޔައީ ދޭން ޖެހޭ އަދަދުވެސް އެތައް ގުނައަކުން ކުޑަކުރުމަށްފަހު އިތުރު 17 މަސް ދުވަހު ކުންފުންޏަށް މަސައްކަތް ކޮށްދޭންޖެހޭ ގޮތަށް ކަމަށެވެ. އަދި ސައީދުގެ މައްޗަށް މި މައްސަލައިގައި ހުކުމް ކުރި ނަމަވެސް މިއީ ސައީދުގެ އެކަނި ނިންމުމެއް ނޫން ކަމަށާއި، ނިންމުން ނިންމުމުގައި ކުންފުނީގެ ގާނޫނީ ވަކީލުންގެ ލަފާވެސް ހޯދާފައިވާ ކަމަށް މައުރޫފް ވިދާޅުވިއެވެ.
މައުރޫފް ވިދާޅުވީ ފެނިގެންދިޔައީ ދައުލަތުން އެދުނު ވަރަށް ވުރެ ބޮޑު އަދަބެއް ކަނޑައެޅިގެން ދިޔަތަން ކަމަށާއި، ޝަރީއަތް ކުރިއަށް ދިޔަ އިރު ދިފާއީ ހެކިންގެ ގޮތުގައި ކުންފުނީގެ ކުރީގެ ލީގަލްގައި މަސައްކަތް ކުރި ފަރާތްތައް ހެކިބަސް ދީ، ސެޓްލްމަންޓް އެގްރީމެންޓަކަށް ދިއުމަށް ލަފާދިން ކަމަށް ހެކި ދިން ކަމަށާއި، ނަމަވެސް ފެނިގެން ދިޔައީ ކޯޓުން މި މައްސަލަ ސައީދުގެ މައްޗަށް ސާބިތުވާކަމަށް ނިންމި ކަމަށެވެ.
