ޕްރޮސެކިއުޓަރ ޖެނެރަލްގެ އޮފީހުން އިސްތިއުނާފު ރަޖިސްޓްރީކުރަން ދައްކަން ޖެހޭ 300 ރުފިޔާ ނުދައްކައިގެން 72 ކިލޯގެ މަސްތުވާތަކެތީގެ މައްސަލަ ހައިކޯޓުން ބޭރުކޮށްލި މައްސަލަ މުރާޖާ ކުރުމަށް ހުށަހަޅާ، އެ މައްސަލަ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އަށް ހުށަހަޅައިފިއެވެ.

މި މައްސަލައަކީ 72 ކިލޯ މަސްތުވާތަކެތި ދިވެހިރާއްޖެ އަށް އެތެރެކޮށް އެތަކެތި ޓްރެފިކް ކުރަން އުޅުނު މައްސަލައިގައި އެންމެ އިސްކޮށް ހުރި ކަމަށް ތުހުމަތު ކުރާ އިރުފާން ތަގިއްޔުގެ މައްސަލައެވެ. މި މައްސަލައިގައި ދައުވާ ލިބުނު ތިން މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ހުކުމް ކުރުމުން ޕްރޮސެކިއުޓަރ ޖެނެރަލްގެ އޮފީހުން އެ މައްސަލަ އިސްތިއުނާފު ކުރުމަށް ހައިކޯޓަށް ހުށަހެޅިއެވެ.

ހައިކޯޓަށް ހުށަހެޅި މައްސަލަ ބަލައިގަނެވެން ނެތްކަމަށް ބުނެ ހައިކޯޓުގެ ރަޖިސްޓްރާރ މަރިޔަމް ހޫރުޝިދާ ސޮއިކޮށް އެންގެވި އެންގެވުމުގައި ބުނެފައިވަނީ ކްރިމިނަލް ކޯޓުގެ ގަޒިއްޔާ އިސްތިއުނާފު ކުރުމަށް އެދި ސ. ހުޅުދޫ ދޭލިޔާގެ / އިރުފާން ތަގިއްޔު އަށް ދައުވާ ރައްދުވާގޮތަށް ޕްރޮސެކިއުޓަރ ޖެނެރަލްގެ އޮފީހުގެ ފަރާތުން ހުށަހަޅާފައިވާ މައްސަލައިގެ ރަޖިސްޓްރޭޝަން ފީ ދެއްކުމަށް އަންގައި، "ހައިކޯޓަށް މައްސަލަ ބަލައިގަތްކަން އަންގާ އެންގުން" 5 އޮކްޓޫބަރު 2025 ގައި މެއިލް ކުރެވިފައިވާ އިރު، އެ އެންގުމުގައި ބަޔާންކޮށްފައިވާ މުއްދަތުގެ ތެރޭގައި ރަޖިސްޓްރޭޝަން ފީ ދައްކާފައިނުވާތީ ހައިކޯޓުގެ ގަވާއިދު (2011) ގެ 33 ވަނަ މާއްދާގެ (ނ) އާއި ހަވާލާދީ، މި މައްސަލަ ބަލައިގަނެވެން ނެތްކަމަށް އަންގާ ކަމަށެވެ.

މި މައްސަލައިގައި ޕީޖީ އޮފީހުން ދެން އަަމަލުކުރާނެ ގޮތެއް ސާފުކުރުމަށް ޕީޖީ އޮފީހުގެ މީޑިއާ އޮފިޝަލްއާއި ސުވާލުކުރުމުން ވިދާޅުވީ މި މައްސަލައިގައި ދެ ފިޔަވަޅެއް އެޅި ކަމަށެވެ. އޭގެ ތެރޭގައި ހިމެނެނީ މި މައްސަލަ މުރާޖާ ކުރުމަށް ހައިކޯޓަށް ވަނީ ހުށަހަޅާފައެވެ. އެގޮތުން ރަޖިސްޓްރާގެ ނިންމުން މުރާޖާ ކޮށްދިނުމަށް އެދި ހުށަހަޅާފައިވަނީ ފަނޑިޔާރުގެ ޕެނަލަށެވެ.

މީގެ އިތުރުން ދެވަނަ ކަމެއްގެ ގޮތުގައި މި މައްސަލަ ވަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އަށް ހުށަޅާފައެވެ. އެގޮތުން ޑީޖޭއޭ އަށް ހުށަހެޅި މައްސަލައިގައި ޕީޖީ އޮފީހުން އެދިފައިވަނީ ކޯޓުގެ އިދާރީ ކަންކަމާއި ހުރެ އެފަދަ ކަންކަން ދިމާނުވާނެ ގޮތަށް ކަންކަން ހަމަޖައްސައިދިނުމަށެވެ. ދެ މައްސަލަ ވެސް ހުށަހެޅީ ބުރާސްފަތި ދުވަހު އެވެ.

މި މައްސަލައާއި ގުޅީގެން ޕީޖީ އޮފީހުން ކުރީން ބުނީ ސ. ހުޅުދޫ، ދޭލިޔާގެ، ޢިރުފާން ތަޤިއްޔުގެ މައްޗަށް ރައްދުވާގޮތަށް މި އޮފީހުން ދިވެހިރާއްޖޭގެ ހައިކޯޓަށް ހުށަހެޅި އިސްތިއުނާފުގެ ރަޖިސްޓްރޭޝަން ފީ ދައްކާފައިނުވާތީކަމަށް ބުނެ ރަޖިސްޓްރަރގެ ނިންމުމުން މައްސަލަ ބަލައިގަނެވެން ނެތްކަމަށް ނިންމާފައިވާ ކަމަށެވެ.

އެ ނިންމުމުގައި ރަޖިސްޓްރޭޝަން ފީ ދެއްކުމަށް އަންގާ ލިޔުން 5 އޮކްޓޫބަރު 2025 ގައި އެ އޮފީހަށް މެއިލްކުރިކަމަށް ބަޔާން ކޮށްފައިވީ ނަމަވެސް، އީމެއިލް އެ އޮފީހުގެ ކަނޑައެޅިފައިވާ އީމެއިލްއަށް ލިބިފައިނުވާ ކަމަށް ޕީޖީ އޮފީހުން ބުނެއެވެ.

އެފަދަ ލިޔުންތައް އެ އޮފީހަށް ފޮނުވުމަށް ކަނޑައެޅިފައިވާ އީމެއިލް އަށް އެ ދުވަހާއި ޖެހިގެން އައި ދުވަހުވެސް ހައިކޯޓުން އެކި އީމެއިލްތައް ކޮށްފައި ހުރިނަމަވެސް، އެ މައްސަަލައާ ގުޅޭ އީމެއިލް ލިބިފައި ނުވާކަމަށް ޕީޖީ އޮފީހުން ބުނެއެވެ.

އެހެންކަމުން އެ ނިންމުން މުރާޖަޢާކުރުމަށް އެ އޮފީހުން ހުށަހަޅާނެ ކަމަށާއި، އަދި މި ނިންމުމަކީ ހައިކޯޓުން އިސްވެ މުރާޖަޢާ ކުރަންޖެހޭ ނިންމުމެއް ކަމަށް ދެކޭ ކަމަށް ވެސް ޕީޖީ އޮފީހުން ބުނެއެވެ.