ޝަރުއީ ދާއިރާއަށް ނުފޫޒު ފޯރުވުން ނިމިފައިވާކަން ރައީސް އިއުލާން ކުރެއްވި ދުވަހަކީ ނުފޫޒު ފޯރުވުން ފެށުނު ދުވަސް: މެންބަރު އަމީން ފައިސަލް
ސުޕްރީމް ކޯޓުގެ ފަނޑިޔާރުން ވަކިކޮށް، ބެންޗު ބަދަލުކުރި ހިސާބުން އެއްކޮށް އިތުބާރު ވަނީ ގެއްލިފައި
ރާއްޖެޓީވީގެ ޓީވީޓޯކް ޕްރޮގްރާމްގައި ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް ވާހަކަ ދައްކަވަނީ
ޝަރުއީ ދާއިރާއަށް ނުފޫޒު ފޯރުވުން މިހިނދުން މިހިނދަށް ނިމިފައިވާކަން ރައީސް ޑރ. މުހައްމަދު މުއިއްޒު އިއުލާން ކުރެއްވި ދުވަހަކީ ސަރުކާރުގެ ނުފޫޒު ފޯރުވުން ފެށުނު ދުވަސް ކަމަށް ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު އަމީން ފައިސަލް ވަނީ 17 ނޮވެންބަރު 2023 ގައި ރައީސް ކަމުގެ މަގާމު ހުވާ ކުރައްވައި ރައީސް މުއިއްޒު ދެއްކެވި ވާހަކަފުޅަށް ފާޑު ވިދާޅުވެފަ އެވެ. މި ރަސްމިއްޔާތުގައި ރައީސް މުއިއްޒު ވަނީ ބާރުތަކުގެ މިނިވަންކަން ކަށަވަރު ކުރުމަށް އިސްކަން ދެއްވާނެ ކަމަށް ވިދާޅުވެފަ އެވެ.
މެންބަރު އަމީން ފައިސަލް ވިދާޅުވީ ޝަރުއީ ދާއިރާއަށް ނުފޫޒު ފޯރުވުން މިހިނދުން މިހިނދަށް މި ނިމުނީ ކަމަށް ރައީސް މުއިއްޒު ވިދާޅުވި ނަމަވެސް އެއީ ހަގީގީ މާނައިގައި ޝަރުއީ ދާއިރާއަށް ނުފޫޒު ފޯރުވަން ފެށި ދުވަސް ކަމަށާއި، މި ސަރުކާރުން ބޭނުންވާ ގޮތަކަށް ޝަރުއީ ދާއިރާ ބޭނުން ގޮތަކަށް ބައްޓަން ކުރަމުންދާ ކަމަށެވެ.
އަބަދުވެސް ޝަރުއީ ދާއިރާއަށް ޝައްކުގެ ނަޒަރުން ރައްޔިތުން ދެކޭކަން ފާހަގަ ކުރައްވައި މެންބަރު އަމީން ފައިސަލް ވިދާޅުވީ މިދިޔަ ސަރުކާރުގައި ކަންކަން ހިނގާފައިވާ ގޮތާއި، ރައްޔިތުންނަށް ފެނުނު ރަނގަޅު މަންޒަރުތަކުން ކޮންމެވެސް ވަރަކަށް ޝަރުއީ ދާއިރާއަށް ރައްޔިތުންގެ އިތުބާރު ލިބެމުން ދިޔަ ކަމަށެވެ. ނަމަވެސް މި ސަރުކާރުގައި ސުޕްރީމް ކޯޓުގެ ފަނޑިޔާރުން ވަކިކޮށް، ބެންޗު ބަދަލުކުރި ހިސާބުން އެއްކޮށް އިތުބާރު ގެއްލިފައިވާ ކަމަށް އޭނާ ވިދާޅުވި އެވެ.
މީގެ އިތުރުން މެންބަރު އަމީން ފައިސަލް ވިދާޅުވީ ޝަރުއީ ދާއިރާގެ ބަޖެޓު ބޮޑު ކޮށްދީފައިވާ ކަމަށާއި، މާލީ މިނިވަންކަން ދީފައިވާ ކަމަށް ސަރުކާރުން ބުނަމުން ދިޔަ ނަމަވެސް މިނިވަންކަމާއެކު މަސައްކަތް ގާބިލް ފަނޑިޔާރުންނަށް ބިރު ދައްކަމުންދާ ކަމަށާއި، ބައެއް ފަނޑިޔާރުން ވަކި ކުރަމުންދާ ކަމަށެވެ. މި ސަރުކާރަށް ކޮންޓްރޯލް ނުކުރެވޭ ބޭފުޅެއް ނަމަ އެ ހާލަތު ގެނެސްގެން ވެސް އެ ފަނޑިޔާރަކު ދުރު ކުރާ ކަމަށް އޭނާ ވިދާޅުވި އެވެ.
ވަރަށް ރަނގަޅު މިސާލެއް. ވަގުތަށް މައްސަލައެއް އެޖެންޑާ ކުރެވޭނެތީ މި ޒަމާނުގައި ސިޓީއެއް ގެންގޮސްގެން އީމެއިލް ކުރުމުގެ ބަދަލުގައި ސިޓީއެއް ގެންގޮސްގެން ސަބްމިޓް ކޮށްގެން ސަކަރާތެއް ޖަހައިގެން ތިން ފަނޑިޔާރެއް މި ވަކި ކުރީ. އެއާ ގުޅުން ވެސް ނެތް ހާލަތެއް އުފައްދައިގެން. އެހެންވީމަ މިހާލަތުގައި މި ބޭފުޅުން ބޭނުންވާ ގޮތަށް މި ނިޒާމުގެ ތެރެއިން ކަންކަން ހިނގަންވާނެ ކަމަށް ދިވެހިން ގަބޫލުކޮށްގެން ތިއްބާ އެއަށް ނޫނެކޭ މިއޭ އެންމެ ރަނގަޅު ގޮތަކީ ކިޔާފައި ވަކި މަންޒަރެއް ދިވެހިންނަށް ދައްކާފައި ހަގީގަތުގައި މިބޭފުޅުން ބޭނުންވާ ގޮތަށް ޖުޑީޝަރީ ބައްޓަން ކުރުމުގެ ހާލަތްތަކެއް މިހާރު މިދަނީ. އެއްވެސް ހާލަތެއްގައި ޖުޑީޝަރީ މިނިވަންކޮށް އަތް ބޭނުން މި ބޭފުޅުންގެ ނުފޫޒު ފޯރުވުން ހަގީގަތުގައި އަދި މިފެށުނީ.ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް
މެންބަރު އަމީން ފައިސަލް ވިދާޅުވީ މި ސަރުކާރުން ޝަރުއީ ދާއިރާ ހިންގަން ބޭނުންވަނީ މިހާރު ރައްޔިތުންގެ މަޖިލިސް ހިންގާ އުސޫލުން ކަމަށެވެ. އެއީ މިއަދު ރައްޔިތުންގެ މަޖިލީހަކީ ރައީސް އޮފީހުން ހިންގާ އޮފީހެއް ކަމަށާއި، ހުރިހާ ކޮމާންޑެއް އަންނަނީ ރައީސް އޮފީހުން ކަމަށެވެ.
